‏ Psalms 56

A niaring na nurnur tai God

Kai nina i lue ra kakailai; a tiun Ionat-Elem-Rekokim; a Miktam kai David, ba ra tarai Pilistia dia kinim ia aro Gat.

1God una mari iau, tago ra tarai dia mainge ba diat a konome iau;
Ta ra bungbung par i tup iau ra vinarubu,
2Kaugu lavur ebar dia mainge ba diat a konome iau ra bungbung par,
Tago mangoro diat dia varubu ure iau ma dia vavagia pa diat mulai.
3Ba ta bung iau burburut,
Ina nurnur uka tam.
4Ta ra varmari kai God ina pite pa kana tinata;
Iau tar nurnur tai God, ma pa ina burut;
Ava mulai ra tarai diat a pait ia piragu?

5A bungbung par dia pukpukue kaugu tinata,
Ma ra nuknuk i diat ba diat a vakaina iau.
6Dia vana varurung, dia kiki uai,
Dia gire vakilang kaugu vinavana;
Maia, da di kobot upi kaugu nilaun.
7Dave, diat a pila bar ta kadia varpiam?
God, una rapue ra umana vuna tarai.
8U nunure kaugu lavur vinavana vurvurbit;
Una varurue ra lavur lur na matagu ta kaum paura;
Dave, pa di tar tumu vake diat ta kaum buk?
9Nam ra bung ba iau tangi tadav u kaugu lavur ebar diat a lop uka;
Go ra magit iau tar nunure, ba God i tur maravut iau.
10Ta ra varmari kai God ina pite pa kana tinata,
Tai ra Luluai ina pite pa kana tinata.
11Iau tar nurnur tai God, pa ina burut.
Ava mulai ra tarai diat a pait ia tagu?

12Iau tar vavalima piram, God,
Ina tul tar ra tinabar na pite varpa piram.
Tago u tar valangalanga ra tulungeagu kan ra minat,
Maia, ma u tar balaure ra kaugu pi koko na tutukai,
Upi ina vanavana ta ra luaina mata i God
Ta ra kapa na nilaun.
13