‏ Psalms 60

A niaring upi ra varvalaun

(Kak 108:6-13)

Kai nina i lue ra kakailai; a tiun Susan-Edut; a Miktam kai David upi ra vartovo, ba dia varubu ma Aram-Naraim ma Aram-Soba, ma Ioab i lilikun ma i ubu a vinun ma a ura arip na marmar ta ra tarai Edom ta ra male na solt.

1God u tar vung vue avet, u tar rip vue avet;
U tar kulot; boina una valagar pa avet mulai.
2U tar vaguria ra gunagunan; u tar pelegi ia;
Una mal mule nina i tapelegi, tago i dadadar.
3U tar vaarike tar ra umana dekdek na magit pire kaum tarai;
U tar vamomo avet ma ra tava longlong.

4U tar tul tar ra vakilang ta diat dia ru u,
Upi diat a lop kan ra panak. Sela.
5Upi na langalanga kaum vakak na tarai,
Una valavalaun ma ra limam tuna, ma una torom ta vevet.

6God i tar tata ma ra gomgom na maukuana; ina manga gugu.
Ina tibe Sekem, ma ina valar varbaiane ra male Sukot.
7Gilead kaugu, ma Manase kabila kaugu;
Epraim bula i da ra kere na vinarubu ta ra ulugu;
Iuda kaugu buka na varkurai,
8Moab kaugu la na dududur.
Ina vue tar ra pal a kaugu tai Edom,
Pilistia ina kukula ure u.

9To ia na agure vaolo iau ta ra dekdek na pia na pal?
To ia na ben vaolo iau ta ra gunan Edom?
10Dave, God, pa u ga vung vue avet?
Ma pa da varagur ma kaveve lavur kor.
11Una maravut avet ure ra ebar;
Tago a maramaravut kai ra tarai a magit vakuku.
Ba dat ma God, dat a ongaongor tuna;
Tago ia iat na ruarua taun kada lavur ebar.
12