‏ Psalms 64

A niaring upi ra varbalaurai

Kai nina i lue ra kakailai; a kakailai kai David.

1God una valongore ra nilaigu ta kaugu vartakun,
Una ga valaun iau kan ra varvaburut kai ra ebar.
2Una ga varavite iau kan ra varpit ivai kai ra umana tena varpiam,
Kan ra kor na tena varvabilak;
3Kan diat dia vamangi ra karamea i diat da di al vamangi ra pakat na vinarubu,
Ma dia tar al vaninare kadia lavur pu, maia, a umana tinata i mapak;
4Upi diat a ponok ive ra tarai ba dia ko kakit;
Dia ponok vakaian diat, ma pa dia burut.
5Dia varvargat vargiliane diat upi ra kaina magit;
Dia tata guvai ba diat a kapi kun ivai;
Dia biti: To ia na gire dat?
6Dia nuk tadav ra umana varpiam;
Dia biti: Da tar mal ot pa kada ninunuk;
Ma ra bala i ra tarai tikatikai ma ra nuknuk i diat i lulur.

7Ma God na ponok diat,
Ma ra pu na tur vakaian diat.
8Ma da vabura diat, a karamea i diat iat i takun diat;
Diat par dia gire ra balbali pire diat, diat a loe ra ulu i diat.
9Ma ra tarai par diat a burut,
Ma diat a varvai ta ra papalum kai God,
Ma diat a matoto ta kana varkurai.

A umana tena takodo diat a ga tai ra Luluai, ma diat a rivarivan tana,
Ma diat par ba i dovot ra bala i diat diat a pite varpa.
10