‏ Psalms 8

A minamar i God ma ra variru kai ra tarai

Kai nina i lue ra kakailai; a tiun Gitit; a kakailai kai David.

1Luluai, kaveve Luluai,
I mamar tuna ra iangim ta ra rakarakan a gunagunan par!
U tar vaki kaum minamar urama ra ul a bakut.
2Ta ra ngie i ra umana kuramana, ma ta ra ngie i diat dia u boko u tar mal vaarike ra dekdek,
Ure kaum umana ebar,
Upi una vamut ra ebar ma ra tena varobo.

3Ba iau nuk pa ra bala na bakut, a papalum na limam,
A gai ma ra umana tagul, nina u ga vaki diat,
4Ava bar ra tarai, upi una nuk pa diat?
Ma ava ra tutana ba una laume kapi ia?
5Tago u ga vaki ia, ma i papait na varogop ma God,
U vatoke ra minamar ma ra variru tana.
6U ga tul tar ra varkurai tana ure ra lavur papalum na limam;
U ga vaki ra lavur magit par ta ra vavai na kauna;
7A lavur sip, ma ra umana bulumakau parika,
Maia pa, a umana leing bula ta ra pupui;
8A umana beo liuliu, ma ra umana en ta ra ta,
Ma ra lavur mangana i vanavana ta ra ta.

Luluai, kaveve Luluai, i mamar tuna ra iangim ta ra rakarakan a gunagunan parika!
9