‏ Psalms 92

A kakailai na pite varpa

A kakailai ure ra Bung Sabat.

1I kat ba da pite pa ra Luluai,
Ma ba da kakailai tadav ra iangim, u ra Ngala Kakit!
2Ba da vaarike kaum varmari na malana,
Ma kaum dovot na mangamangana ta ra bungbung na marum par,
3Da ubu ra pagol, nina a vinun na vinau tana,
Ma da ubu mal ra ngap.
4Tago u, Luluai, u tar vagagane iau ma kaum papalum;
Ina ngenge ma ra gugu ure ra lavur papalum na limam.

5Luluai, i ngala kaum lavur papalum!
A lavur nuknukim dia pidik na kaia.
6A koloata pa i nunure;
Ma ra lunga pa i matoto tana.
7Ba ra umana tena varpiam dia lubalubang da ra vura,
Ma ba ra lavur tena pait ra kaina dia pupu,
I damana upi diat a virua tukum;
8Ma u, Luluai, u ti lia vatvatikai.
9Tago kaum lavur ebar, Luluai,
Kaum lavur ebar diat a virua,
Ma ra lavur tena pait ra kaina da kabu varbaiane diat.
10Ma ra ramugu i tar dekdek da ra ram u ra bulumakau i leing;
Di tar tap iau ma ra kalamana dangi.
11A matagu i tar gire ra bunura kadiat dia parau upi iau,
A talingagu i valongore ra varvai ure ra vinirua kadiat dia tut upi diat a vakaina iau.
12A umana tena takodo diat a lubalubang da ra inaina lama,
Diat a tavua da ra tagatagal aro Lebanon,
13Diat di ga vaume diat ta ra kuba i ra Luluai,
Diat a lubalubang ta ra gunan kai kada God.
14Diat a vuavuai boko ba dia kua,
Na tup ia kadia bulit ma ra mapmap i diat;
Upi da nunure tana ba ra Luluai i dovot;
Ia kaugu vat ki, ma pa ta mangamangana gegagege i ki pirana.
15