‏ Song of Solomon 1

A taulai kalama, a vavina, ma ra umana natu i Ierusalem, a umana vavina

1A kakailai i lia ta ra lavur kakailai, nina ba kai Solomon.
2Boina ba na galum iau ma ra umana vargalum na ngiene;
Kaum varmari i boina ta dir ma ra polo na vuai na vain.
3Kaum lavur varku dia ang na vuai,
A iangim i da ra varku di ga lolonge,
Damana a umana inip na vavina dia mari u.
4Una al pa iau; ma avet a vutvut up u.
Ra king i ga ben pa iau tar ta ra kubana;
Avet a gugu ma avet a ga tam;
Avet a vala varvai ure kaum varmari, ma ure ra polo na vuai na vain pata;
Kadia varmari piram i dovot.

5I korong ra pakagu, a umana natu i
Ierusalem, a umana vavina,
Ia kaka iau a metek,
Da ra umana pal na mal Kedar,
Da ra umana mal na babak kutu kai Solomon.
6Koko avat a bobe iau tago i gogol ra pakagu,
Tago ra keake i ga tar rang vakubar ra pakagu.
A umana natu i tinagu, a umana tutana, dia ga kankan ure iau,
Ma dia ga vo pa iau pi ina tena varbalaurai ta ra umauma na vain;
Ma kaugu uma na vain pa iau ga balaure.

7U nina ba ra tulungeagu i mari ia, una ve iau
Ure ra pakana kaum kikil na sip dia iaian tana, ma ra pakana dia ngoango tana ari ra keake i ki tur;
Ta ra ava ina da ta tikai i tuba ra pal a matana
Maravai tar ta ra kikil na sip kai ra umana talaim?

8Gala pa u nunure, u nina u boina ta ra vaden par,
Una mur ra nga kai ra umana sip,
Ma una tabar kaum lavur nat na me maravai ta ra umana pal na mal kai ra umana tena balabalaure sip.

A taulai kalama, a vavina, ma ra taulai kalama, a tutana

9Kaugu vakak, iau tar valarue u ma ra nat na os ai ra kiki na vinavana kai Parao;
10A ura pagupagu na ngiem dir boina, ra pepe na ulum nina di vir ia i vamong dir,
Ma ra inoam bula, nina di vakurue ma ra kurkurua i ngatngat.
11Avet a vi kaum ta vivi na goled,
Ma avet a vapetep vanavana tar ta silva tana.
12Ba ra king i ga ki boko ta kana vatar,
Kaugu varku i ang na vuai.
13Kaugu vakak i da ra vinvin bira na davai
Nina i va ta ra bongobongogu.
14Kaugu vakak i da ra tur a pupu na davai i ang na vuai
Ta ra uma na vain aro En-Gedi.

15Ea, kaugu vakak, u a valilingina; ea, u a valilingina,
Ma a ura kiau na matam dir da ra kiau na mata i ra uka.

16Ea, kaugu vakak, u bula a valilingina, maia, a magit na varmananai;
Ma kador vava i limut.
Ra umana bolo ta kador pal, a umana tagatagal,
Ma ra umana ivarai tana a umana iara iat.
17