‏ Song of Solomon 7

1Ea, u a natu i ra luluai, a vavina, i ti mamamar tuna ra ura kaum ba u vanavana!
A paparai na kaum i guaguar da ra pupu na irima
Varogop ba ra melemuna i ga madake.

2A bitom i da ra la na nimomo nina i vulu,
Ma nina pa i iba upi ra polo na vuai na vain;
Ra balam i da ra vinvin vit
Nina ba Ta umana vaigoara dia tur kikil ia.
3A ura um dir da ra kanga,
Da ra ura natu i ra leing, nina a bo na ginagira.
4A inoam i da ra bur na pal di pait ia ma ra loko na elepant;
A ura kiau na matam dir da ra umana lum aro Kesbon, maravai ta ra mataniolo Bat-Rabim;
A bilaum i da ra bur na pal Lebanon
Nina i vatale uro Damasko.
5A ulum i da Karmel,
Ma ra pepe na ulum i da ra mal i meme marut,
Nina di rau ra king me.

A ura taulai kalama dir gugu varurung

6Ea, a vakak u, a valilingina ma a boina,
Nina ba da gugu tana.
7Ra pal a pakam i da ra gelep,
Ma a ura um dir da ra vuaina i vo.
8Iau ga biti: Ina koe ra gelep,
Ina tatabai ta ra umana pagalina;
Boina ba a ura um dir a da ra vuaina i vo,
Ma kaum mamadang na vuvul da ra vuai na gamata;
9Ma ra ngiem na da ra polo na vuai na vain nina i manga boina,
Ma i kalami ure kaugu vakak,
Ta ra bul na ngiene ma ra pal a ngiene.

10Iau kai kaugu vakak,
Ma kana mamainga i tur tagu.
11Una mai, kaugu vakak, boina da dor a vana ta ra bala na vura;
Boina ba dor a ki ta ra gunagunan.
12Boina ba dor a vana na taptapke uro ta ra umauma na vain;
Dor a gire ba ra davai na vain i karakap boko, ma ra vuaina i arikai,
Ma ba ra umana gamata dia pupu;
Ma ina vaarike kaugu varmari piram abara.
Ra umana davai na pepe ure ra varmari dia ang na vuai,
Ma ra umana mangana vuaina davai dia boina, a kalamana ma ra maulana, dia va ta ra po,
Nina ba iau ga vung ia ure u, kaugu vakak.
13