Mark 16
Jiisasnoŋ koomunoŋga waaro.
Mat 28.1-8; Luuk 24.1-12; Jon 20.1-10
1Sabat kendoŋ ragi tegoro iikanoŋ Maria Magdalaga, Maria Jeimswaa nemuŋa ano Salome yoŋonoŋ “Jiisaswaa qamoya kema moriwoŋa,” jeŋ jiniŋ marae uŋkoowagawo sewaŋa megi. 2Meŋ eŋ Sonda umugawodeeŋ waama gomaŋ ano weeŋ jiliŋjolaŋ kouro qasirinoŋ keŋgi. 3Kema amiŋ moma jegi, “Qasiriwaa qaa ootanoŋ jamo somata raji, ii mono moronoŋ qetambaa?” 4Kaeŋ jeŋ uugi keno iigi: Jamo somata qatawo ii mono qetaŋgi kema ero. 5Qasiriwaa jamo qaa oota kaeŋ aantama nano uutanoŋ ugi. Ugi dindiŋgiaageŋ eja gbaworo moŋ malekuya koriga taaŋa raro iigi. Kaeŋ iima mamaga awawaligi.6Awawaligito, kokaeŋ iŋijoro, “Mono toroko mende mobu. Oŋo Nazaret eja Jiisaswaajoŋ moŋganju. Ii maripoonoŋ qegito, iinoŋ mono gbiliŋ waaja. Kawaajoŋ koi mende eja. Iibu! Duŋa koi, iikanoŋ sulugi ero. 7Kawaajoŋ mono kema Piito ano gowokouruta kuuya buju kokaeŋ iŋijowu, ‘Iinoŋ mono jeta meŋ oŋoma waladeeŋ Galili prowinsnoŋ kembaa. Oŋo kaaŋagadeeŋ iikanoŋ kema qaaya jerotiwaa so ii iibu.” ’
8Kaeŋ iŋijoro aaruŋ jeneŋgia ororo jamo ootanoŋga kamaaŋ bobogariŋ keŋgi. Sombugia mogitiwaajoŋ qaa moŋ mende jegito, qaagia bogoro. Kiaŋ. a
Jiisasnoŋ Maria Magdalaga iwaanoŋ asugiro.
Mat 28.9-10; Jon 20.11-18
9Jiisasnoŋ Maria Magdalaga iwaa uutanoŋga omejiilaŋ 7 oŋotaaro laligoro. Jiisasnoŋ koomunoŋga waama Sonda gomaamba amandiinoŋ wala Maria ii asugiŋ muro. 10Asugiŋ muro alaurutanoŋ Jiisaswo laligoŋ kouma kambaŋ iikanoŋ jiŋgeŋ qama saagiti, Marianoŋ mono iyoŋoonoŋ kema bujuya iŋijoro. 11Iŋijoroto, Jiisasnoŋ gbiliŋ laligoro Marianoŋ iiroti, ii mende moma laarigi. Kiaŋ.Jiisasnoŋ alawoita yoroonoŋ asugiro.
Luuk 24.13-35
12Kawaa gematanoŋ alawoitanoŋ Jerusalem siti mesaoŋ gomaŋ moŋnoŋ kembojoŋ kananoŋ keni Jiisasnoŋ kaitania meleema asugiŋ orono. 13Yoronoŋ kaaŋagadeeŋ kema bujuya ii alauruta iŋijorito, yoŋonoŋ ii kaaŋagadeeŋ mende moma laarigi. Kiaŋ.Jiisasnoŋ gowokouruta asugiŋ oŋono.
Mat 28.16-20; Luuk 24.36-49; Jon 20.19-23; Apo 1.6-8
14Kanageŋ gowokouruta 11 yoŋonoŋ ajorooŋ nene neŋ ragi yoŋoonoŋ kaaŋagadeeŋ asugiro. Asugiŋ uugia kotiirotiwaajoŋ temboma koomunoŋga waaro iigiti, iinoŋ bujuya iŋijogi ii mende moma laarigitiwaajoŋ ii jeŋ oŋono. 15Jiisasnoŋ kokaeŋ iŋijoro, “Oŋo mono kantri so kema gomaŋa gomaŋa liligoŋ ejemba laligoŋ kenjutiwaa so Oligaa Buŋana jeŋ asarigi mobu. 16Moŋnoŋ Anutu moma laariro oomulu meŋ mugi uuta meleembaati, iinoŋ mono letoma Siwewaa buŋa koloowaa. Moŋnoŋ mende moma laariŋ yaŋgiseŋ laligowaati, Anutunoŋ mono iwaa qaa jeŋ tegoro gere siawaa buŋa koloowaa. 17Moma laariŋ noma laligowuti, ii aiwese meŋ oŋombe kaniagia kokaeŋ koloowaa: Yoŋonoŋ noo qanoŋ omejiilaŋ oŋotaawuya. Kantri tosia yoŋoonoŋ qaa jeŋ laligowuya. 18Mokoleŋ borogianoŋ meŋ metaambuya. Nombeŋ warabe apu iwoi negi iikanoŋ mono mende meŋ boliŋ oŋombaa. Borogia ji ejemba qagianoŋ aŋgi qeaŋgowuya.” Kiaŋ. bJiisasnoŋ Siwe gomanoŋ uro.
Luuk 24.50-53; Apo 1.9-11
19Poŋ Jiisasnoŋ qaaya kaeŋ iŋijoro Anutunoŋ wano Siwenoŋ uma Anutuwaa boro dindiŋanoŋ rama laligoja. 20Eu laligojato, gowokourutanoŋ mesaoŋ gomaŋ baloŋ so kema Buŋa qaaya jeŋ seiŋ laligogi. Kaeŋ laligogi Poŋnoŋ yoŋowo gawoŋ meŋ inaaŋ oŋono aŋgoleto asugiro qaagianoŋ kotiiro. Kiaŋ. c
Copyright information for
KSR