‏ Matthew 14

Yoni tauꞌabiye bapitaiso yana mwalowoi

(Maki 6:14-29; Luke 9:7-9)

1Hauga tenem ainai Helodi iya Galili ana Tauwasawasa, Yeisu yana paihowa wasana ibenalei, 2na yana taupaihowao iwalo aulidi, iwalo, ‘Nuwana towahone iya Yoni tauꞌabiye bapitaiso bada ebeha mwalowoiyena itowolouyo ta wahiyala teina ipaipaihowaine’.

3Wuwuna mwalona Helodi Yoni iꞌabi avivini na ipai ta vada abapai ainai imwamwauwine. Na Yoni ana abimomohi ehebo waihiu yehana Helodiyasa neta Helodi tahina Pilipi asolena, 4na Helodi ihaloi ta itatawaholaine, na Yoni Helodi iwalo auline, iwalo, ‘Neta nigele mumuga namwanmawana wuwuna tahim mwanena utatawaholaine’. 5Neta wuwuna Helodi nuwanuwana Yoni iꞌoiye mwalowoi, na hesi tomowa bagibagilidi Yoni hiꞌawa tauwalo mahalavaei, eeta Helodi imeheuhi ta nigele Yoni iyaꞌoiye mwalowoi.

6Mulitai Helodi yana ahubena abalabahina ana abanuwatuwu avivini guyauna ainai tomowa bagibagilidi hitauꞌahaiyama, na Helodiyasa natuna waihiuna boda mehediyai iselo na Helodi iꞌabiye yaliyaya. 7Na Helodi vahalane ainai iwalovelau yo ebeha hava nuwanuwana imohei taꞌi, na hinage iꞌawa tamada. 8Eeta hinanane iwalo vahalawa ainai ta ainaena vahalawa Helodi iwalo auline, iwalo, ‘Nuwanuwagu Yoni tauꞌabiye bapitaiso uluꞌuluna gaeba ainai umwauwi na umohegau’. 9Eeta Helodi nuwana iyababa mwalaꞌina. Na hesi yana awatamadawa vehabana inuwatuwu avivini, na boda bada yana walo hibenalenaꞌo, eeta italam, 10na yana taupaihowao ivetamaledi vada abapaiyai, ta Yoni gadona hitotomne, 11na uluꞌuluna gaebai hidoꞌoi ta hilawenama, na vahalawa himomoheine. Na vahalawa ivai ta ilalaweine hinanane ainai. 12Na Yoni ana taumulitao hilaoma ta Yoni tauna hivai ta himamagaiyeine, na mulitai hilau Yeisu ainai na ginauli teina hiwalo mahalavaei.

Boda mwalaꞌina Yeisu iveꞌaidi

(Maki 6:30-44; Luke 9:10-17; Yoni 6:1-14)

13Na Yeisu ginauli teina ibenaledi, ainaena imahalava ta wagai igelu ta ilalaune balabala awawai. Na bodaone Yeisu yana lau wasana hibenalei, eeta yadi dalava aidiyena himahalava ta amwahaena hilalaune Yeisu ainai.

14Na hauganane Yeisu wagaena iꞌaitulu maguwai boda mwalaꞌina iꞌiꞌitadine, na atemuyamuyaena tauꞌasiꞌasiyebwao iꞌabiye namwanamwadi.

15Na lavilaviyena ana taumulitaone Yeisu hiwalo auline, hiwalo, ‘Taubada, tupwa teina balabala awawa na mata iguguyou. Na boda teina uvetamaledi ta hilau, na adi higimwala dalava vahalidiyai.’

16Na Yeisu iwalo, ‘Havena hilaulau, omiu hesi aiꞌai ammohedi ta hiꞌai’.

17Eena hiwalo, ‘Ya! Amaine nigele bahuna, neta bada beledi nima eheꞌehebo na yama bwau.’

18Na Yeisu iwalo, ‘Beledine yo yamane ammohegau’.

19Na bodaowa iloinaedi ta awahine ainai himimiyane na beledi nima eheꞌehebo yo yama bwau ivaidi, na iꞌita hae galewai, ta aiꞌaiwone vehabadi iꞌawa yauwedo, na mulitai itomwahidi, na ana taumulitao imohedi ta hiya tomowa aidiyai higuguyauwedine. 20Eena maudoidi hiꞌai na hiꞌai iꞌiwahi moiha, na aiꞌai hiꞌai yetupwa hitano ahaidi, neta boha 12 hiꞌoiye mwaudi. 21Tauꞌaiwone towatowaho aꞌava adi bagibagili 5,000 dova, na waiwaihiu yo hedaheda maudoidi nigele hiyavahilidi.

Yeisu niꞌu ewanaena ilau

(Maki 6:45-52; Yoni 6:15-21)

22Tenem ainaena ana taumulitao iloinaedi ta wagaena higelu yo ebeha himugai vali tupwai. Na iya ebeha tomowa maudoidi ivetamaledi hiwuyo yadi dalavai. 23Eeta higelu, na Yeisu boda ivetamaledi, na mulitai ibom oyai ihae habi awanoi Yaubada ainai. Ta bada iboniꞌo, na Yeisu ibom imiyamiya.

24Na ana taumulitaowowa yadi wagane hiwohedobiyei niꞌu awawai, na bagodu mwalaꞌina hilobai ta yadi wagawa igohagoha buibuiyei na hinage yaumai mehediyena ilaolaoma. 25Na ahubena yana tupwa ainai Yeisu niꞌu ewanaena ilaolaoma ana taumulitao vahalidiyai. 26Tenem ainai ana taumulitaowa Yeisu hiꞌiꞌitane niꞌu ewanaena ilaolaoma, ta himeheuhi mwalaꞌina, eeta hilomaꞌayaꞌaya, yadi nuwatuwu ebeha alawai hiꞌiꞌitane.

27Na Yeisu iwalo, ‘Havena ammehemeheuhi! Yau taꞌi, bada yami Taubada.’

28Na Pita iꞌaubabada, iwalo, ‘Taubada, uwalo auligau ta niꞌu ewanaena yalaowa alimwai’.

29Na Yeisu iwalo, ‘Ulaoma!’ Eeta Pita wagaena iꞌaitulu na niꞌu ewanaena ilaulau Yeisu ainai. 30Hauganane ilaulau yaumai malaꞌina iꞌita, na imeheuhi, ta niꞌuwai ihahanenene, na iwui, ‘Taubada, uyayovigau!’.

31Na Yeisu ilomwayamwayau ta Pita iꞌabi avivini na iwalo, ‘Yam yemidi iuꞌiuna, hava vehabana unuwanuwatuwu bwaubwau?’

32Eena hitau bwauwowa higegelune wagai, na yaumai idaumwali. 33Na hiya wagane ana taumiyaone hipwagogo Yeisu ainai, na hiwalo, ‘Moiha taꞌi, owa Yaubada Natuna’.

Tauꞌasiyebwao iꞌabiye namwanamwadi tupwa Genesaleta ainai

(Maki 6:55-56)

34Ainaena higeyoꞌawa tupwa Genesaleta ainai ta hiꞌaꞌaitulune leꞌawai. 35Na tupwane ana taumiyaone Yeisu hiꞌataiyaꞌo, eeta wasa hivetamaledi dalavaone maudoidi aidiyai ta yadi taulovalovalao maudoidi hilawedi Yeisu ainai, 36na hiꞌawanoiyei, hiwalo, ‘Taubada, howahowana na taulovalovalaone teina am aleꞌo papali aꞌavana hiꞌabitowoi?’ Na Yeisu italam, ta yaiyadiwo hiya ana aleꞌo hiꞌabitowoine hinanamwanamwane.