Rom 6 | KUD | STEP | Yede hava mata tawaloweine? Ita ebeha mumuga yababana ainai besiwa tamiyamiya na Yaubada yana veꞌiꞌila alidai imwalaꞌi, bo?

‏ Romans 6

Ita na Besinana tavetoyatoyawa

1 Yede hava mata tawaloweine? Ita ebeha mumuga yababana ainai besiwa tamiyamiya na Yaubada yana veꞌiꞌila alidai imwalaꞌi, bo? 2 Nigele alili! Ita tamwalowoiꞌo yada yababao miyamiyadi ainaedi nigele howahowana talautowoi na vedova ta mata tamiyamiya alabili yababa holanai? 3 Wuwuna tahanapui neta haugana bapitaiso tavavaine, yada veꞌehebo Yeisu Besinana baidada hinage bapitaiso ainaena tamwalowoi toyatoyawa. 4 Ainaena haugana ta bapitaiso neta Besinana baidada tamwalowoi, ta hiyemagai eheboigitaꞌo. Teina vehabana na Besinana Tamana yana wasawasaena mwalowoiyena iꞌabiye towolouyoi neta dova hinage ita mata yawahi vauvauna ainai tamiya ilimani.

5 Na ita bada yana mwalowoine alonai taveꞌeheboꞌo. Eeta mata iya yo ita taveꞌehebo yana towolouyo ainaena. 6 Tahanapuiyaꞌo neta ada lautowoi miyamiyadi bada Besinana baidana hiveꞌabahi oviyediꞌo. Eeta tauda adi lautowoi biꞌibiꞌidi yadi wahiyala bada ibohoidiꞌo ta mata nigele yababa ainai tavetaupaihowa. 7 Wuwuna haugana tomowa imwalowoi, neta bada yababa yana pai ilotalivahiꞌo.

8 Na ebe Besinana baidada tamwalowoi toyawa tayemidi mata iya baidada mayawahida tamiya toyawa. 9 Wuwuna tahanapuiyaꞌo neta Besinana mwalowoiyena itowolouyoꞌo ta mata nigele hinage iyamwalowoiuyo. Mwalowoi yana wahiyala iya ainai bada iꞌoviꞌo. 10 Besinana maiꞌehebo imwalowoi eeta yababa yana wahiyala iya ainaena bada iꞌoviꞌo ta wau livahine imiyamiyane neta Yaubada vehabana imiyamiyane. 11 Ainaena ita yababa ana tupwa ainai tavahiliuyoigitaꞌo neta bada tamwalowoiꞌo na Yeisu Besinana ainaena Yaubada vehabana tamiyamiya.

12 Yababa havena amtalatalamwei ta taumiu yana paihowa biꞌibiꞌidi iloiloinaegomiu ta yadi nuwalelewo ammulimulitaedi. 13 Havena taumiu yaunao amtalatalamwedi ta tau ana yepaihowa yababana vehabadi. Na hesi Yaubada ainai amtalamwegomiu dova tomowa mwalowoiyena iꞌabiye yawahaigomiu. Yaubada ainai maudoina amtalamwedi ta iya mumuga dumwalu vehabana iyepaihowagomiu. 14 Yababa havena iloiloinaegomiu, wuwuna Yaubada yana veꞌiꞌila ammiyamiya, na nigele yana loina ainaena.

Dumwalu ana taupaihowao

15 Yede mata vedova? Howahowana yababa tamulitaei wuwuna nigele Mosese loinaena tayamiyamiya na Yaubada yana veꞌiꞌilaena ilivahigita, bo? Nigele alili! 16 Tahanapui iliꞌilimani neta ebe tauloina teya ainai tatalamyowegita ebeha tavetaupaihowa moihana ita neta tauloinane taꞌawaꞌawa abiyeine. Ebe yababa ainai tatalamyowegita mata tamwalowoi na ebe Yaubada taꞌawa abiyei mata imwau yedumwalugita. 17 Hesi Yaubada yaꞌawa yauwedowei wuwuna mwalona yababa iyepaihowagomiu na wau veꞌita teya ana ita amvai ta veꞌitane ainai yami nuwatuwu holadiyena amꞌawa abiyei. 18 Na yababaena Yaubada ivaivehulugomiu ta wau mumuga dumwaluna ana taupaihowao.

19 Yaiyadiwo tomowa hiꞌauꞌaubabada alimiyai neta dova yau yaꞌauꞌaubabada vetaupaihowa vehabana wuwuna yami hanapu nigele iyamwalaꞌi. Mwalona taumiu yaudiyao tupwadi amtalamwedi ta amyepaihowadi miya biꞌibiꞌidi ta yababadi aidiyai ta yababana iyepaihowagomiu. Howahowana dova wau, taumiu yaudiyao amtalamwedi ta amyepaihowadi mumuga dumwaluna ainai ta miya veꞌaveꞌahihina vehabana amvetaupaihowa. 20 Haugana ita yababa iyepaihowagita, nigele habuluna mumuga dumwaluna tayaꞌita lobai. 21 Neta mumugaone wau tahinimayaedi. Hesi mwalona tapaipaihowaidi hava namwanamwana aidiyena talolobaidine. Neta mumugaone tapaipaihowaidine tuluhanai mata mwalowoi taveꞌalo. 22 Hesi wau yababa yana paiyena Yaubada ivaivehulugita ta ita Yaubada yana taupaihowao. Yada vetaupaihowa maihana mata miya veꞌaveꞌahihina iya ainai talobai ta tuluhanai mata aiyawasi vateyai taveꞌalo. 23 Wuwuna yababa ana maiha neta mwalowoi, na hesi Yaubada yana aiyauya nigele maihana, neta yawahi vateyai yada Bada Yeisu Besinana ainai.