Jam 2 | KUE | STEP | Angrima wagle, Yaglkande Yesus Krais kangiye kande pangwa heven nem i ene pirngi dingwa ipre ene yomba kangino kande pangwa wagle erewakai erete ana kiuglgiunde wagle kankinde yeitekriyo.

‏ James 2

Yomba prapra nono mambuno wakai eretenamniwo

1 Angrima wagle, Yaglkande Yesus Krais kangiye kande pangwa heven nem i ene pirngi dingwa ipre ene yomba kangino kande pangwa wagle erewakai erete ana kiuglgiunde wagle kankinde yeitekriyo. 2 Ene makai sinaglmara dumo yomba ta gaglsuna muno wakai pangwa ya ongo bomgo gol mina bekingwa i ende pandigl unambuka, te kiuglgiunde yomba ta gaglsuna goglo bagla dungwa ta ende pandigl ama unambuka. 3 Yegl eur ana ene yomba gaglsuna wakai ende ungwa ikra kanwakai yei yegl ditenaglkwa, “Ene wu bogl wakai yomara ya amedi moglo.” Te kiuglgiunde yomba yegl ditenaglkwa, “Ene egliro andigl moglo, mo na katna mina manginagle ya amedi moglo.” 4 Ene mambuno yegl erimbi, enene pirmere ere yomba embriyeno yumbu singwa. Ene pirdime dindre yomba prapra mambuno kuno keunde ere yumbu sikrikwa. Tamanga. Ene ka tange teingwa yomba mereyegl mogl nomano kinde mina yomba yumbu singwa.

5 Angrima wagle, ene piryo yomba tau makandle yomba ongumutno mina kiuglgiunde meglkwa i God pinde i-pere endungo, ye pirngi dimara i taragl merkinde paitongwa. Ana yomba God deno munduno teingwa mere ye ka okuna dipandiglmara i mina ye kingdomo tenan kiuglgiunde yomba suna igle moraglkwa. 6 Ba ene kiuglgiunde yomba angai goraglmedi erekinde ere teingwa, ene piryo, yomba ira ene engre atne endete yumbun tendre ana gundo ipi ka tange teingwa yomba moglmara kot orme? Yomba taragl mere pai tongwa ye keunde mambuno yegl erikwa. 7 Ana Yesus Krais kangiye wakai ikra God i ene mina pandigl tongwa. Ana ira mere ye kangiye wakai i dikinde yeitome? I taragl mere paitongwa yomba ka i dingwa.

8 God nono kingno moglkwa, ye kamambuno pepa mina okuna lomo suwarata norkwa i gigle dungwa, “Enene pre wakai pitnere yegl yomba ene motnara magl meglkwa kanwakai yeiyo.” ^{▼▼2:8Wok Pris 19:18} Ene lo dumere yegl etne ana mambuno wakai pamere etnga. 9 Ana ene yomba ta kanwakai yendre te ta kankinde yembi mambuno i mina ene tandaglme erikwa. Ana lo dipene endungwa i ene lo sendingwa yomba meglkwa. 10 Ana yomba ta lo prapra sika sinambuka ba lo suwara kaima ta duglo boglkran, ana ye aglau ertre lo prapra sendungwa. 11 God yegl dungwa, “Ene yagl ambu kunogl gundokraglkwa.” ^{▼▼2:11Kisim Bek 20:14; Lo 5:18} Te ye ama yegl dungwa, “Ene yomba ta sigoglkraglkwa.” ^{▼▼2:11Kisim Bek 20:13; Lo 5:17} Ene yagl ambu kunogl gundokrikwa ba ene yomba sigeglkwa ipre ana ene lo sendingwa yomba meglkwa.

12 Ene lo ka pirkan erikwa i tandaglme mina kane poko ende norkwa. Ana yomba tau lo ka i okuwo ka tange norambukra wondi pirtre meglmere yegl, ana ene ama ka dindre embriye mambuno erimere yegl ere wanmolo. 13 Yomba ta eremogl yomba ta miriye goglkrambuka. Ana God yombamo i miriye goglkre ka-tange tenambuka. Ba yomba mitno goglkwa yomba i ana God ka-tange tenambara ye pir oglmba sinambuka.

Pirngi dindre kongunmo erekrikwa

14 Angrima wagle, yomba ta pirngi diye dinambuka ba kongunmo ta erekran, ye pirngi dungwa i sraglmere ere-inambe? Tamanga, ye pirngi yoko dungwa akeple ta ditekrambuka. 15 Ene angitn mo ambatn ta kungugl gaglmo mo kaiya mokna ta yeikran doko morambuka. 16 Ene meglmara suwarata ka yegl di yomba tenambuka, “Ene den mundun pokndi yenan endpi ana bi gagl ende te kaiya mokna ne kau suo,” ba ye nangiye akeple dinambuka taragl ta tekran, ka dungwa i mongo wakai sraglmere pame? 17 Pirngi dingwa i kuno yegl keunde, yoko pirngi dindre ana kongunmo erekrikwa, pirngino i goglkwa.

18 Ba yomba ta yegl dinambuka, “Ene pirngi dingo te na kongunmo erikwa.” Ana na yegl diga, “Ene kongunmo erekitnga ba pirngi dinga i ombuno dinaro, te na kongun erika i na pirngina ombuno di tenaglka.” 19 God suwara kaima moglmedi ene pirngi dingwa ipre wakai kaima. Te spirit kinde wagle ama yegl pirngi dindre, ana kundugl gogl onguno katno sungwa.

20 Ene yomba kinde du wagle, ene pirngi yoko dindre kongunmo erekrikwa ana pirngi dingwa i sragl yoko orkwa i mambunomo ene piramnedi pirmo? 21 Nono kowano Abraham okuna ye wam Aisak kombuglange gagl God tenagledi pre alta bolamugl endungo, pango ana ye mambuno yegl orkwa ipre God eremogl ye yomba du-yene moglme dungwa. 22 Yeglpre ene kaniyo, Abraham pirngi dungwa ya te kongunmo i wu suwara kaima ongwa, yegl ormara i ye pirngi dungwa pangwa i kongun ormara mongomo kaima wu pene ongwa. 23 Kamambuno pepa mina okuna yegl dungwa muno beglko pangwa i kaima pai yungwa, “Abraham ye God wedi pirngidi tongo ana God eremogl ye yomba du-yene moglme dindre te yeinombuglka we dungwa.” ^{▼▼2:23Stat 15:6} 24 Ene erme pirkan erikwa pirngi keunde dimara i God yomba du-wakai meglme ta dikrukwa, tamanga. Ba pirngi dindre kongunmo akiye erimara igle God eremogl yomba du-wakai meglme dungwa.

25 Ama ambu ta yagl kunogl gundungwa kangiye Rehap. Ye kongun wakai yegl orkwa. Aglketa yagl suwo Josua diendungo dumo makan engre kana pre umbrika. Ana Rehap akewakai eretendre konbauna bange ta ombuno di endungo endimbrika. Ambumo mambuno wakai yegl ormara ipre God ye du-yene moglme dungwa. 26 Ipre, yomba ta nangiye mina spirit moglkran i ye goglko dundungwa. Kuno yeglmere yomba ta pirngi yoko dindre kongunmo wakai ta erekran ye pirngi dungwa i gogl kondungwa.