Deu 34 | KYC | STEP | Mosese baa yuu lama yuu Moape dokona singi piso Nipo kyau lao siyamo dokona pao yuu kyau Pisika yuu taone Jereko doko neta pyakaenge dorena siyamo dokona mandarena peya. Pao dokona kareyamo dokopa Anatumi yuu andake doko peparae lasaka piya. Lasaka piyamo doko yuu Giliate wambunya yuu dokona piso lasaka pyuo pao Dane wambunya taone dokona peya.

‏ Deuteronomy 34

Mosese Kumuya

1 Mosese baa yuu lama yuu Moape dokona singi piso Nipo kyau lao siyamo dokona pao yuu kyau Pisika yuu taone Jereko doko neta pyakaenge dorena siyamo dokona mandarena peya. Pao dokona kareyamo dokopa Anatumi yuu andake doko peparae lasaka piya. Lasaka piyamo doko yuu Giliate wambunya yuu dokona piso lasaka pyuo pao Dane wambunya taone dokona peya. 2 Yuu lasaka piyamo dupwa Napatalai wambunya yuupi Eporaime wambupi dee Manasa wambupinya yuupi Juta wambunya yuu soo pao neta yalyingi kata dorena piso pao ipwa kota Metitaraniane pete dokonape liti pyuo suu lao lasaka piya. 3 Juta wambunya yuu donorena pao yuu Jowa dokona piso yuu lama lama soo pao yuu taone Jereko isa malu bona isa yale andenge dokona suu lao lasaka piya. 4 Dokopa dokona karo Kamongome Mosese baa dopa lamaiya. Wamba nambame Aporakame Aisake Jekopemoo nakamana wai kiso nyeraminyi dupwa mairu lao lao kana minyuo leyono yuu doko dakeŋe. Dokona nambame emba mee kanda lao pilyu. Dopa pipunupape nambame emba dokona puu laa nalapono, leya. ^{▼▼Anatumi yuu andake doko peparae lasaka piya. (34:1)}

5 Dokopa Kamongona kendemande Mosese baa Moape wambunya yuu dokona Kamongome dopande piraŋa leyamuli pyuo kumuya. 6 Dopa piyasa Kamongome Mosese yuu Moape dokona yuu taone Betepiyo lama kanda kanda singi dokona nyuo malu piya. Dopa pyuo malu piyamopape yuu dusape panda dasape malu pisi karamo lao malu piya doko mendemepe kando soo gisa nalyaminyi. 7 Mosese baa ee kana andete mendaki dee akalisa lama (120) nembo karapala kumuya. Baa lenge nyuope pii nayamo mee kana yale doko karo kumuya. 8 Isaraele wambu dupwa banya lao yuu gii akalisa rema Moape yuu dokona kumanda ee lao peteyami.

9 Ee lao piso oteyaminyi dokopa akali Nanena ikinyingi Josua mona palenge renge palyuo pyoko pyoko leya. Renge doko Mosese baame banya panda nyera lao rombo palyuo dokopa leyamuli pyuo piya. Isaraele wambu nakamame Mosese keta Anatunya mawa pii epeyamo dupwa Josuame leyamo dokona rape rape lao minyiyami.

10 Mosese kumapeyamo mange dokopa enakana Isaraele wambunya poropeta baa yale mende sipuro kara naya. Kamongopa baa angi rolae lenge kambu kando pii lenge. 11 Kamongome Mosese keta yulu wambumi pii nangepe yulu wambumi kando yamarangungipi Isipi kiŋipi dee dokona isingi akalipi minyanyi palyuo yuu liti doko peparaena piyamo dopale mende poropeta akali mendemepe pii naya. 12 Moseseme Isaraele wambunya lenge kambu dorena pakanyi pyambuo yamarangunyi sero yulu andake pingi dopale poropeta mendeme kapa pirami ingya nange.