Exo 33 | KYC | STEP | Kamongo dokome Mosese lamaiyuo lao, Embape embena wambu yuu Isipi yaki nyuo lanyuo epee dupwape yuu dake yaki nyepala nambame Aporakame Aisake Jekopemoope dee dupwana para pyaraminyi dupwape kando yuu mairuŋu lao lalu lao leyono dokona pupwape.

‏ Exodus 33

Yuu Kyau Sainai Doko Yaki Nyinya Lao Lamaiya

1 Kamongo dokome Mosese lamaiyuo lao, Embape embena wambu yuu Isipi yaki nyuo lanyuo epee dupwape yuu dake yaki nyepala nambame Aporakame Aisake Jekopemoope dee dupwana para pyaraminyi dupwape kando yuu mairuŋu lao lalu lao leyono dokona pupwape. 2 Nambame aŋala mende nakama rapu pinya lao mapanyi peeyapala nambame Kenane rangepe Amo rangepe Ipi rangepe Perasi rangepe Iti rangepe dee Jepusi rangepe peparae ralinyi nembaro. 3 Dokopa nakama yuu keyange amenge kapape pingi dokona parami. Dopa pyuo paraminyipape nakama waiya lao mona kana pokonge dokona nambame katasa nakama pyao kokwa soo nembasaroŋo namba range role pyao paa narama, leya.

4 Wambu dupwame pii porai doko sepala nakama kondome kumuo ee lao mona kendo karo nakamana kalya pingi bange dupwa dee nyuo pirami ingya nayami. 5 Dopa piyaminyi dokopa Kamongome Mosese kando wambu dupwa lamainya lao lao, Nakama wambu mona kana pokonge dapwa namba nakama role pyao mee kuki lama pao lapuli doko nambame nakama pyao kokwa soo nembalu nembo nembapuli. Namba nakama keta aki mende piru lao suu pyarole. Epapu nakamana kalya pingi bange dupwa kako lao nyisa nyelapape, leya. 6 Leyamo dokona lao nakama yuu kyau Sainai yaki nyuo papeyaminyi dokopa Isaraele wambu dupwa kalya pingi bange dupwa pyuo kara nayami.

Kamongona Komau Anda Doko

7 Yuu dupwana mendepe Isaraele wambu komau anda dupwa pyuo palenge dokopa Mosese baame komau anda poo pyasi doko nyepala yuu palenge dokona mee mende nanesale ingyuo piya. Pipala doko komau anda dokona Kamongo karenge doko leyami. Dokopa wambu lapo Anatu pii mende piso selana masiyami dupwa dokona pao pii lamaiyami. 8 Yuu gii lapo Mosese komau anda dokona panya peyamo dokopa wambu dupwa peparae nakamana komau anda kambu dokona kando karo pao konandeyamo dokopa kaeyami. 9 Enakana Mosese baa andakare pao oteyamo dokopa kopa rau doko epo komau anda kambu dowa dokona siya. Dokopa kopa rakapana piso Kamongome Mosese pii lamaiya. 10 Dokopa wambu dupwame kopa rau komau anda kambu dokona epo siyamo doko kandapala aopa wapambu pii pyaro pangu soo Anatu lakandeyami. 11 Doko wambu puu minyingi dupwa rolae lenge kambu kando pii lenge dokoko suu pyao Kamongome Mosese role pyao karo lenge kambu kando pii lamaiya. Lamaipala Mosese baa wambu dupwa palenge yuu dokona peya. Dopa pyuo peyamopape banya nyisingi wane parange akali Nanena ikinyingi Josua lenge doko komau anda dokona yaki nyii nao mee andakare kareya.

Kamongo Dokome Banya Wambu Dupwa Pipya Role Kararo lao Pii Lalu Lao Leya

12 Dokopa Mosese Kamongo doko lamaiyuo lao, Doko kinyi. Emba namba langyuo, Wambu dapwa minyuo yuu dokona puu lee. Leenepape embame wambu mende nambapa role parambi peeyaro lao namba langi nae. Embame lao, Namba emba soo oto rae mailyu, lee. 13 Epapu embame namba kando rae mairi ramo doko embena rapa rapa piinyi dupwa namba langipi. Dokona nambame embena yulu pyakao emba rae maiyuo puu paro. Dee wambu rara dake emba rangena ingyara lao rombo palyinyi doko suu pyao karape, leya.

14 Leyamo dokopa Kamongo dokome lao, Namba nakama role paramanopa nakamame anamasi minyuo wini pirami, leya.

15 Dokopa Moseseme isingi lao, Emba namwa role pyao paa narama ramo doko namwa yuu dake yaki nyelapa lao laa napipi. 16 Emba namwa pipya paa narama ramo doko embame embena wambupi nambape kando rae mailiŋi lao apa pyuo wambu mendeme soo nyerase? Emba namwa pipya role parama ramo doko wambu dupwame namwa rara wakaleŋe lao soo nyerami, leya.

17 Dokopa Kamongome Mosese lamaiyuo lao, Nambame emba soo giso rae maiyuo pilyu dokona embame piso silinyili pyuo piru, leya.

18 Dokopa Moseseme piso soo lao, Embena yanga paupau lao lepo lepo pingi doko namba lasaka pii, leya.

19 Kamongo dokome isingi lao, Nambame nambana yanga paupau lenge peparae emba lasaka pyuo embena lenge kambu dokona nambana kingi poo pyasi doko polo langiru. Namba Kamongo doko. Namba rangeme mendali sakame kumuo kondo nyiso kararo laro ramo doko sakame kumuo kondo nyiso kararo. 20 Mendeme namba kandapala lete paa nange dokona emba nambana lenge kambu doko kanda laa naro. 21 Dopa piramopape emba kanana ketae karare lao namba karo dakena paki panda mende silyamo. 22 Nambana yanga paupau lao lepo lepo pingi doko embena lenge kambu dokona eparamo dokopa nambame kana dokona kata silyamo koko dokona emba palyapala nambana kingi dokome emba yambe pyaro. Yambe pyapala namba pao otaro. 23 Pao otapala enakana nambana kingi neta nyero dokopa embame nambana matarena yeelyo kandare. Nambana lenge kamburena kanda nare, leya.