Ezra 6
Kiŋi Sairosena Pinya Leyamo Pii Doko Dee Kamba Koto Nyiyami
1Dokopa kiŋi Darisimi kiŋi dupwame pii lamaiyuo pepa pyasi yuu Bapilonena reteyami dupwana koto kandena leya. 2Dokona koteyaminyipape yuu Mitia yuu taone Ekepatana lenge dokona pepa rongo pisi siyamo dokona pii pyasi dasipa paleyamo doko kando nyiyami.3
- Ee kana mupwa banya kiŋi yulu kanda soo pyuo kareyamo dokopa kiŋi Sairose baame nakama lamaiyuo tembole anda Jerusaleme karenge doko kamba pinya leya. Dokona wambu dupwame Anatu mena pyao kiso maiyuo dee bange wakale lapo kiso mairami lao pinya leya. Tembole anda isa piso puu rombo minyuo ketae pao doko mita akalisa lama ipisu yanda ipingi (27) ingyuo para. Dee dopako pyuo pinjingi paki piso pao pakirena puu rombo minyuo mita akalisa lama ipisu yanda ipingiko minyarami.
Kiŋi Darisimi Yulu Pyuo Maleyami Dokona Nyokono Pinya Leya
6Dokopa kiŋi Darisimi dopa lao pepa isingi pyao maiya.- O Tatenai, ipwa Yuporisa neta anda penge dorena yuunya gapomane akali mupwa doko dee Setaposenaimoo akali yango isingi yulu role pyao pingi dupwape nakama peparae tembole anda dokona paa napala nyokono karalapape.
Tembole Anda Doko Kii Lumbuyami
13Dokopa gapomane akali mupwa Tatenaimoo Setaposenai dee akali yango isingi yulu role pyao pingi dupwape kiŋi banya pii leyamuli pyuo piyami. 14Poropeta Akaipa Sekarayapame nakama mona minyarambu porainyi pyambuyaminyisa Juu lita akali dupwame anda doko elya pyuo waiya lao au pyuo oteyami. Wamba Isaraele wambunya Anatu dokomepe dee Pesa wambunya kiŋi mupwa Sairosemoo Darisimoo Atasesisimoo dusipamepe pii reto leyaminyili pyuo pyuo oteyami. 15Dokopa kiŋi Darisi kareyamo yuu gii doko ee kana pakinyamange dokopa kana akalisa mendaki ipisu lama yuu gii rema dokona tembole anda doko pyuo oteyami. 16Oteyaminyipa Isaraele wambu purisi akalipi Lipae akalipi mee wambu dupwape karapusi ingyuo palyuo karo epeyami dupwa pipya rae wakasa maiyuo tembole anda doko misi lao kii lumbuyami. 17Kii lumbuyami dokopa nakamame mena bulamakao andete mendakipi (100) sipisipi andete lama (200) dee sipisipi yakane andete kisimape (400) pyapala Anatu kiso maiyami. Maipala Isaraele akali rara akalisa mendaki ipisu lama palenge doko suu pyao mena meme akalisa ipisu lamako nyepala nakamana koo dupwa nyuo kame sakana lao maiyami. 18Maipala Mosesena buku dokona pii leyamuli pyuo purisipi Lipaepe dupwa tembole anda dokona yulu pirami dupwana suu pyao rapa rapa piyami.Pasopa Nenge Nenge Yuu Gii Doko
19Ee kana enenge kana mupwa yuu gii akalisa ipisu kisima dokopa Pasopa Nenge Nenge yuu gii doko pyaka siyamopa wambu karapusi palyuo karo epeyaminyi dupwa rae maiyuo nenge nao peteyami. 20Purisi dupwape Lipae dupwape nakama ama yapasi ingyapala poo pyasi wakasa ingyuo peteyami. Dokopa Pasopa Nenge narami lao Lipae dupwame wambu karapusi palyuo paeyo karo epeyami dupwanape purisi dupwanape dee nakama rangenape lao mena pyao kisiyami. 21Kisiyaminyi dupwa Isaraele wambu karapusi palyuo karo Jerusaleme dee kapu kyuo epeyaminyi dupwame neyami. Dee yuu dokona wambu Anatu angi suu pyaa nao koo pyuo kareyaminyi dupwana lapo mona kapu kyuo Isaraelena Kamongo Anatu lakando kareyaminyi dupwa opetaeko neyami. 22Borete Isi Pyambwa Nao Nenge Yuu Gii doko pyaka siyamosa yuu gii yanda ipingi nyepo dusipana nakama rae maiyuo yalya kando nenge andake kiso nao kareyami. Doo rae maiyaminyi doko Anatumi Pesa wambunya kiŋi doko keta mona rambi lanyi pyambwakamiyamosa nakamana yulu dupwana nyisiyamo dokopa Isaraele wambunya Anatunya tembole anda doko kamba piyami.
Copyright information for
KYC