‏ Acts 5

Ánánáesinte Sáváeraantei kwaasái.

1Páánápáasi minóntámbá tímúwasarai moóráwai áwíꞋa Ánánáesi awainínkó áwíꞋa Sáváerae mésarai moórá-marama óꞋon-kwaasi kwétimesarai óntamba mairésarai 2taaináyauyo-aimba awainínkómbá simámuwana mirá íníyone súwana minóntámbá taaínkaar-urena évakaꞋa kwesáváí maéna évakaꞋa maimaéna aantá-kwaasi mói tiména kampaꞋá séna amápaꞋa timúne súwana 3Pítaa séna Ánánáesiyo Sáátáánigo áísaa umai isánáe sintáváí owé se mararákén-óntámbá amápaꞋa timúne siráanda Áánútun-amankomba kampaꞋá simáukaane. 4mimbárámá ená maramá isa tuwé óntamba mairé ená óntamba isa évakaꞋa timé íma sáwíꞋa éma mararákén-óntámbá évakaꞋa timúne íma sénda amápaꞋa timúne séndama sáwíꞋa ómpo íma kwaásiye suꞋmai kampaꞋá simátíyukaampo Áánútun-amankomba kampaꞋá simáukaane Pítaa súwana 5Ánánáesi iséna puꞋmaéna tuvamúwasa mináímbá ísaraan-kwaasi ávááraumai táátavai uwasá 6ívé-kwaasi tésa puwúmba taasááúmaesa maimaésa máutaraawe.

7máutaawana awainínkó sáwíyankaꞋa ména awaikómó puwún-aimba íma ísarena Pítaa-iyaitopaꞋa túwana 8Pítaa séna keináraiti mararákén-óntámbá amápara símakaiyo súwana minínínkó séna owé amápaꞋan-iye kampaꞋá súwana 9Pítaa séna enawaikóe esé mimbórá-ímáyáá ékai Ísóigon-amankomba kampaꞋá simáuꞋmai awánayae sirááiye. enawaiꞋó mágwéutaan-kwaasi tésa embá tamaimaésa máutanaaowe Pítaa súwana 10puꞋmaéna Pítaa aísamaivimba tuvamúwasa ívé-kwaasi tésa puwúmba taawánésa maimaésa awaikómbó utamánkópaꞋa máutowasa 11Ísóigona kwaásiye óꞋon-kwaasiye isésa táátavai uráawe.

óꞋon-oꞋom-bayai kaweꞋ-máyáígóná kwaasái.

12aantá-kwaasi kwaási túrankaꞋa óꞋon-oꞋom-bayai kaweꞋ-máyáímá maimaésa íyúwasa Ísuna aampaꞋá kwéguwai anóm-bonoꞋ-namba Sórómoni áúgwimai úmakopaꞋa aasiyaaí torupamái kwémauwasa 13óꞋon-oꞋon-akwaꞋa sáwívaꞋa Ísóigon-aaiyavesa áraire sésa miwísé torupamái maémáémbanivo óꞋon-kwaasi tuwánésa sésa kawe-kwáásín-owe sésa táátavai ésa íma miwísé torupamái máyówasa 15aantá-kwaasimo uráamba isésa tíꞋo ún-kwaasi tuvaipímbá taagwiyaꞋmaésa naambáruꞋa mátinkesa sésa Pítaa kwénaaena amankóꞋnaanko taaugwétáínasa asóvaigwae suwasá 16óꞋon-oꞋon-daopakemba tíꞋo ún-kwaasigwara tirumpimbá taraváá-kwámbá máyon-kwaasigwaraꞋa tíꞋmaesa Yérúsaremu-naopaꞋa mátínkówana Áánútu Pítaamba áwaꞋnaa úwasa amápaꞋa asóvasaraawe.

kawáá-kwáásí aantá-kwaasi sáwíꞋa umátínkaraan-kwasai.

17mirá kwéuwana aivaꞋ-mónó-káwáánákóe kwená kwaási Sátúsi-monor-aimbo sun-kwáásíyé sésa amáparawai íma kentáásiraaima kwáráavo aantá-kwaasi tirááíma kwáráawe sésa tíyántavai ésa 18tátoꞋmai ándávaꞋa tiyúwówana 19mindóꞋwáámbá kwáúnkaꞋa Ísóigona kwayóꞋnákó kwíyómpakendako ontamá tisuwéna tíꞋmaena máápaꞋa móruntinkena séna 20anóm-bonoꞋ-naumpaꞋa uméꞋa aúná-amba kwaási kaweꞋá umái maíꞋmaiꞋa ónááon-ankona ááimba usimátíméro súwasa 21isésa irataróꞋa anóm-bonoꞋ-naumpaꞋa umésa mináímbá simátímakaawe.

anóm-bonoꞋ-naumpaꞋa moórávaꞋa kwésimatimuwasa moórávaꞋa aivaꞋ-mónó-káwáánákóe kwená kwaásiye tésa ándá-kwaasi táái isánáe sésa Ísareri-anon-kwaasi tááyowasa tésa monoꞋ-nánkár-í-kwáásíyávésa sésa aantá-kwaasi ándávaꞋa máyáavo kotíꞋmaeꞋa teró suwasá 22kumbá íma máyówasa koyauwerésa tésa sésa 23ándá-namba ontamá umásuwesa i-kwáásí ontaráꞋá máyáawata onta tisuwéta awánáúndaya íma máyáawata úne suwasá 24mono-káwáá-kwáásíyé monoꞋ-nánkáꞋó kárákwirowaiye isésa táátavai ésa sésa mindá nóraya ónaundayaꞋiyo simásuwesa sáwívar-imayaa kwéuwana 25moóráwai téna séna ándávaꞋa mátíyukaan-kwaasi anóm-bonoꞋ-naumpaꞋa mésa kwésimatimewaꞋa tuwánáúmne súwasa 26monoꞋ-nánkáꞋó kárákwirowaiye kwembó áwaꞋnaa un-kwáásíyé kotíꞋmaesa kwempaꞋá tésa sésa úwoi-kwaasi miwí táái isésa sínkamovo sésa kwempaꞋá 27tíꞋmaesa aaimó isáí-kwáásítópaꞋa mátínkówana aivaꞋ-mónó-káwáánákó 28séna áꞋa simátimeta séta minkwáásígón-áái kwenáwíkaꞋa íma simátímaꞋmaeꞋa koróyá siráundaya isaꞋá áꞋa simátíméwasa Yérúsaremuvaken-kwaasi amápaꞋa ísáyaraawaꞋa ke kampa-kúvímbá sinkéta minkwáásí tuvúkáawe kwésewe aivaꞋ-mónó-káwáánákó súwasa 29Pítaa-iyai óꞋon-aanta-kwaasiyonkwaraꞋa sésa Áánútun-aai aivar-áínkómá póna kwaási tááigomba usáyaaitaraimba póta kentááiya íya iséta Áánútun-aaiya iséta miráyá ónaumne. 30keinárawaꞋa Ísumba taairaꞋá inkámúwana puwúwana kentáá síkwáꞋnáona Ísóigo Áánútu Ísumba pukáimpinkemba usásinankena 31séna anón-kwaasi póna sáwíꞋo umáímo máyáampinkemba kawer-ámpáꞋá métinkaniye séna ayáánúrapaꞋa asirayán-áyámpáꞋá móankena Ísareri-kwaasi kentí sáwí-imayaa tuwéꞋa ÁánútunopaꞋa tíyana kentí sáwí-imayaa maitiyuwáníye séna Áánútu Ísumba pukáimpinkemba usásinankena ayáánúrapaꞋa asirayán-áyámpáꞋá móankaraiye. 32mináímbá iséta kaweꞋá umáíya kwésimatimunanaya Áánútun-amanko mináímbá kaweꞋá umái kwésimatimiye. Áánútuma kwenáái ísámai kaweꞋá kwéowai kwenamambá kwétimisana Áánútun-amanko mináímbá kwésimatimiye aantá-kwaasi siráawe.

33simásúwówasa aaimó isáí-kwáásí isésa tirumbá sáwíte úwasa tínkamonae-imayaa uwaná 34miwítí avumpinkémbá moóráwai usásinena ámáán-kawaa-kwaasigo áwíꞋa Kámérieri kwemá usásinena miwí táái káráyuwena kwemá Áánútun-aai aúváí-kwandaaivinkemba aasiyaasí simáti simati kwéuwasa kwenáwíꞋa mósá makáawai kwemá usásinena aantá-kwaasiyavena séna sáwíyankaꞋa máápaꞋa kumónááowe súwasa máápaꞋa kúmúwana 35séna Ísareri-kwaasiyono. minkwáásíyáváí mirá ónáemo síyamba kakaariyá íma mirá éꞋa ísáíyuweꞋa mirán-oro. 36ááéma moóráwai áwíꞋa Tiutaásí usásinena séna anón-kwaasi únda póꞋa kesirááíye séꞋa kwaránááowe súwasa sáwíva-kwaasi 400 kwaasi kwarówana moóráwai Tiutaásímbá tuvuwúwana puwúwasa kwembó kwaꞋmaésamo nááún-kwaasi kóyáwé ésa kwená mayáí ivátukaawe. 37minkákémbá túwíꞋo aawásó-tawai moóráwai Kárírivakewai áwíꞋa Yútási usásinena tááyowasa sáwíva-kwaasi kwenarááíma kwaꞋmaésa kwéguwana moóráwai tuvuwúwana puwúwasa kwembó kwaꞋmaésamo nááún-kwaasi kóyáwé umáguraawe. 38mindáyavai imáyáa éꞋa minkwáásíyómbá íma ándávaꞋa mátiyuweꞋa tíyúwéwasa máéro. miwítí mayáígóná ááimbo marará-kwáásítí imáyáavinkembo énamo éna ánásaniye. 39miwítí mayáígóná ááimbo Áánútuna imáyáavinkembo ínaꞋo éꞋa íma kanaán-umai karánááovo úwoi kwaíkwaiꞋa íníye. Áánútumpakembo ínaꞋo éꞋa minkwáásí sáwíꞋo umátinkeꞋo éꞋa ÁánútunkwaraꞋa sáwíꞋa umánkanaaowe Kámérieri súwasa aaimó isáí-kwáásí isésa kwenááiyavesa owé sésa 40aantá-kwaasi tááyowasa íyúwasa túwírukuꞋa nésa asiramái sésa Ísun-aai kwená asirayámbá íma simátíméro sésa tiꞋmákaawe.

41tiꞋmárówasa kwéesa tigaeyáváí uráasina Áánútu imáyáa timúwana tirunkó kaweꞋá úwasa sésa Áánútu asirayámbá símakaisata Ísuntaveta asiramáíya máyaundaya pósa síꞋo iníꞋa umásínkáantaanivo sirunkó kawetá isatá máyaumne aantá-kwaasi simásuwesa 42aasiyaasi-táwai anóm-bonoꞋ-naumpaꞋa kwaásiti naúmpimpaꞋa Ísuna áséi-kwasai simátímaꞋmaesa kwénaaesa Áánútumo usásinankaiwai Yútaa-kwaasiya kwéamuꞋmaraundayawai kwemá Ísuman-iye sésa simátímaꞋmaesa kuráawe.