‏ Acts 8

Sóro Ísuna kwaási sáwíꞋa umátínkarain-kwasai.

1Sítívenimbo tuvúmba Sóro arunkó aamoí úmbanivo évakarawai Áánútun-aaiyavesamo asiramáímo máúwai Sítíveni áúma maimaé máutesa anón-iviꞋa tombánivo Sóro Ísuna aampaꞋó kwéguwai tínkambai ánásanae séna kúmba naaúmpimpakemba aarakwáꞋá koyavisimái ándávaꞋa tíyupaꞋa kúwasa YérúsaremuvaꞋa Ísuna aampaꞋó kwéguwaima aivaríꞋa umái sáwíꞋa umátinkowasa kóyáwé uwasá aantá-kwaasiye suꞋmai YérúsaremuvaꞋa máyówasa óꞋon-kwaasi Ísuna aampaꞋó kun-kwáásí Yútiyaa-ayampaꞋa Sámériyaa-ayampaꞋa kóyáwé uráawe.

SámériyaavaꞋa áséi-kwasai kosimátímakaan-kwasai.

4Ísuna aampaꞋó kwéguwai kóyáwé ésa Ísuna áséi-kwasai kosimátímaꞋmaesa kurá. 5Vírípi Sámériyaa-naopaꞋa kúmba kosimátimena séna Áánútumo usásinankaiwai amuꞋmaráúndawaiyaamo áꞋo kunkáimba kwemá Ísuman-iye 6Vírípi simátimumba kaweꞋá umái ísówana ímo awánarom-bayai mayówasa awánowana 7taraváá-kwámbá tirumpimbá máyówaiyavena aaí súwasa taraváá-kwámbá kwááꞋa tumásuwesa kóuwasa kwaási kaweꞋá umái máyówana aíyayaamba pukón-kwaasi asóvamatinkowasa kaweꞋá umái mésa 8Sámériyaavaken-kwaasi ávááraumai tirunkó kaweꞋá umái méraawe.

9Sámériyaa-naopaꞋa moóráwai áwíꞋa Sáímoni ména anón-kwaasi úne séna pukaaꞋá agaimaéna kwéiyuwasa táátavai kwéesa 10anón-kwaasiye úwoi-kwaasiye kwená mayáí awánésa kwenaráái kwégwaresa sésa Áánútuna asirayánkóe kwená asirayánkóe moóráiꞋa uráiye kampaꞋá suwaná 11ayáátáákaꞋa pukaaꞋá agaimaéna kwégum-bayai mayówasa kwenaráái kwégwaresa táátavai uráambanivo 12naaémba Vírípi Áánútuna áséi-kwasai kosimátimena Áánútu kwená kwaási kwégawaain-kanaama kosimátimena Ísu Káráísitin-aai kosimátimuwasa isésa sésa árair-aimban-iye suwaná Vírípi minákwáꞋá nombá pétinkowana 13Sáímoni kwegwáráꞋá áraire súntavai Vírípi nombá pérankowana Vírípiye kwénaauwana ímo awánóm-bayai mayówana awánéna áátavai uráiye.

14mirámó SámériyaavaꞋo kwéumba YérúsaremuvaꞋa aantá-kwaasi mésa Sámériyaavaken-kwaasi Áánútuna áséi-kwasai isésa mináímbá méyatokaan-aimba isésa Pítaante Yóninte tiꞋmárówasarai kweémesarai 15SámériyaavaꞋa komésarai Ísuna aampaꞋó kwéguwaiyavai ísámai námúnaavinkemba sésarai Áánútun-amankomba mayánááowe sirááiye. 16Vírípi nombá pétinkaronkaꞋa Ísóigo Ísuntavena ísámai nombá pétinkowana Áánútun-amamba íma marómba pósarai Pítaae Yóniye námúnaavinkemba sésarai 17tiyáámba tátoroyana Áánútun-amanko tirumpimbá kumúwasa mairáawe.

18aantá-kwaasirai tiyáámba tátoroyana Áánútun-amanko tirumpimbá kumbaúwasa máyómba Sáímoni awánéna asirayámbá meéyámbaranae séna Pítaante Yóninteyavena séna óntamba maékai 19minásíráyámbá simékaiyo. óꞋon-kwaasi siyáámba tátoraanana Áánútun-amanko tirumpimbá kumbaínkwáe súwana 20Pítaa séna Áánútu úwoi kwétimin-tantaatavai óntandei meéyán-ónáe sénda po ená óntankwaraꞋa esé iravímbá ánásayaaoiye. 21Áánútu aúrankaꞋa ená imáyáa íma arupí imbá po maambáyáí kenkáísí mayáí íma súwaꞋnaa íníyone. 22ená sáwí-imayaagomba ánaaemba umásuwe Ísóigomba áísaa inaná ená sáwí-imayaagona anondá mayauwáníye. 23Áánútu íma asirayámbá ámakaintavai enarumbá sáwíꞋa umásinkaanana ená sáwí-imayaao anómba éna embá tátokaiye Pítaa súwana 24Sáímonima Pítaante Yóninteyavena séna súwaꞋnaa ékai Ísóigomba námúnaavinkemba áísaa íyana emó sénda misáwí-yántááꞋá íma kempáꞋá tíno Sáímoni siráiye.

25súwasarai Pítaae Yóniye Ísóigon-aai simátimesarai Ísuwe naaémáúyan-aimba simátimesarai YérúsaremuvaꞋa kónáe sésarai aampaꞋá kweémesarai Sámériyaa-ayampaꞋa naaóꞋ-naoꞋa Áánútuna áséi-kwasai kosimátímaꞋmaesarai kurááiye.

Vírípinte Ítíópiyaavaken-kwaasintei kwaasái.

26mindárai YérúsaremuvaꞋa kuyaná Vírípi SámériyaavaꞋa máyomba moóráwai anón-kwaasi Ítíópiyaa-maravakewai éna Ítíópiyaa-kwaasiti kawáá-ínínkó áwíꞋa Káándásina óntankaꞋa kárákwirowai Áánútuna imáyáa éna YérúsaremuvaꞋa kweémena Áánútu áwíꞋa mósá maréna koyauweréna kwená káárivimba anóm-poigo tavisímaena kún-kaarivimba kúmba Ísóigona kwayóꞋnáꞋá kwíyómpakewai Vírípintavena séna usásine Yérúsaremuvakemba KásaavaꞋa kwégon-ampaꞋa kwaaó súwana iséna usásinena minámpáꞋá kweémena kavóná-maravaꞋa kúmba Ítíópiyaa-maravaken-anon-kwaasi kwená káárivimba kweémena aúváí-kwandaaivimba awánéna naaóváꞋá Áánútun-aai simátímakowai áwíꞋa Áísáya agaimakón-aimba awánómba 29Áánútun-amanko Vírípintavena séna kwená káárigona egwaaꞋá kwaaó súwana 30isaaísena kúmba Áísáya agaimakón-aimba táámpamai kwésuwana Vírípi iséna áísaa ena séna mináínkóná ááimba kwéisaano súwana 31áꞋa moóráwai simásiminimba póꞋa isánaumpo kesí káárivimba usáataao súwana Vírípi minkáárívímbá usáatena umaúwana 32mináúváí-kwándááívínkén-áímbá táámpamai séna

sipisípi áyáumo karánáesamo owanamó ímo kwááꞋo tintembá minkwáásígó íma aaí siráiye. sipisípi tuvuwónáesamo owanamó ímo kwááꞋo tintembá minkwáásígó íma aaí siráiye. 33kwenáwíꞋa móruna tuwésa sáwíꞋa umái aaivimbá mayánkaraawe. kwená kwaási sáwí-mayai mairésa tuvuwówana marapáꞋá máyáin-kanaama ánásaraiye. mindáyavesa miwítí sáwí-mayai íma kanaán-umai avoraꞋá simátimenaaowe
agaimaréna siráiye. 34Ítíópiyaavaken-kwaasi mináímbá táámpamai simásuwena Vírípintavena áísaa ena séna Áánútun-aaimo simátímakowai nááwantavena mináímbá siráiyo. kwesávéna sirái. óꞋowantavena siráiyo súwana 35Vírípi Áánútun-aaimo aúváívinkembo táámpamaimo simámakainten-umai Ísuna áséi-kwasai kwésimamena 36aampaꞋá kuyambá nombá kwáyopaꞋa kwésarai uyaná Ítíópiyaavaken-kwaasigo séna nombá kwáyáínkaꞋa pésinkainkwae séꞋa únana nóinko aampimbá ítáraiyo súwana [ 37Vírípi séna ÍsumpaꞋo arumbó amé kwenááiyavai áraire simáímo maínaꞋo éꞋa nombá pérankanaumne súwana Ísu KáráísintaveꞋa áraiꞋa Áánútu áánimban-iye kwésune séna] 38káárimo maisoréna kúwaintavena séna káári tátoraao súwana iséna tátorowasarai Vírípiye Ítíópiyaavaken-kwaasiye nompímbá kumbésarai Vírípi nombá pérankowasarai 39úwoivaꞋa íyúyana Áánútun-amanko Vírípimba kunáíꞋmaena kóúwana Ítíópiyaavaken-kwaasi awánómba íma máyombanivo aamoí untávaꞋa kwená naaópaꞋa kúmba 40Áánútun-amanko Vírípimba kunáíꞋmaena Ásátóti-naopaꞋa máánkarowana Vírípi mináyámpáꞋ-náópaꞋa Áánútuna áséi-kwasai simátímaꞋmaena Sísáriyaa-naopaꞋa kuráiye.