‏ John 5

nonkwaaúmpáꞋá Ísu moóráwaimba asóvamankarain-kwasai.

1aáno Yútaa-kwaasi monotávésa tanómba kaumakónkaꞋa Ísu Yérúsaremu-naopaꞋa kurái. 2Yérúsaremu-naokona óntan-kurivaꞋa ontamá kwáyomba áwíꞋa sipisípigona ontamá miwáná egwaaꞋá nonkwaaúmbá áwíꞋa Pétéséta-nonkwaaumba kwáyowana 3mindónkón-awampaꞋa kwááyu-namba évaꞋaasei-namba kwáyowasa mindáúmpátá tíꞋa ún-kwaasiyomba évakaꞋa túgavitan-kwaasiyonte tíyayaamba kararón-kwaasiyonte mésa

[ nonkómó pívíꞋnamaemo kúmba amuꞋmarésa máyówana 4moórá-mora-tawai kwíyómpakewaima nompímbá kumúwana nonkómá pívíꞋnamae kúwana aivaꞋá nompímbá kumúwaimba áíꞋa éránkaraiye.] 5tíꞋo ún-kwaasiyompimba moóráwai ména ayáátáákaꞋa 38 iraꞋa áíꞋa kwéun-kwaasi máyowana 6Ísu awánéna ayáátáákaꞋa áíꞋa kwéiye-imayaama éna áísaa ena séna embá asóvaiyavai kwéankaiyo súwana 7séna nonkómá pívíꞋnamae kwíndaraꞋa síꞋmaimo nompímbó sinkáníwaima íma máyáiye. kemá kumónáeꞋa úndanivo moóráwai kembá kumáyaaitena nompímbá aivaꞋá kúmísana kesíꞋa úwoi kwáyáiye súwana 8Ísu séna usásinaao. ená tuvaiꞋá maimaé kwaaó súwana 9avekáán-umai áíꞋa érankowana kwená tuvaiꞋá maimaéna kuráiye.

Yútaa-kwaasi monor-áímbá kwéison-kanaaraꞋa mirá úwasa 10Yútaa-kawaa-kwaasi asóvamankon-kwaasiyavesa sésa ívéꞋa agándaan-kanaama po ená tuvaiꞋá maimaé kwégonda aambá áúmbakaawe suwaná 11séna asóvamasinkaraiwaima séna ená tuvaiꞋá maimaé kwaaó siráiye súwasa 12miwí áísaa esa sésa ená tuvaiꞋá maimaé kwaaómó siráiwai nááwaꞋiyo suwaná 13sáwíva-kwaasivimba Ísuma áúyokuwana póna asóvamankarowai séna áwíꞋa íma isáúnda-kwaasiman-iye siráiye.

14simásuwena aáno anóm-bonoꞋ-naumpaꞋa iyúmba Ísuma avakáá-umai awánéna séna áíꞋa éránkáimba po sáwíyamba sínkáivo se sáwí-imayaa ivátuwaao súwana 15iséna Yútaa-kawaa-kwaasi kosimátimena séna asóvamasinkaraiwaima Ísuman-iye súwasa 16Yútaa-kwaasi monor-áímbá kwéison-kanaaraꞋa Ísuma asóvamankarontavesa Yútaa-kawaa-kwaasi Ísumba sáwíꞋa umánkámae íyúwana 17Ísu séna kesivo aasiyaasi-táwai mayáímá kwémayaimba póꞋa miráráán-umai mayáímá mayánaumne súwasa 18agándon-kanaaraꞋa asóvamankarontavaigwara Áánútuma kesivomán-iye siróntavaigwaraꞋa pósa Yútaa-kawaa-kwaasi sésa tuvuwónáe síma simaꞋa umbá Áánútuma kesivomán-iye sirónten-umai Áánútuwe kesé mimbóráíꞋa umái máyauye siráimba pósa Yútaa-kawaa-kwaasi sésa tuvuwónáe siráawe.

avowáná kwaasái Ísu siráin-kwasai.

19suwaná Ísu simátimena séna áraiꞋa simátimeꞋa séꞋa ááninkoma póꞋa íma kesí imáyáavinkemba únda kesivomó imbá awánéꞋa mirá kwéune. kesivomó intembá ááninko kwéune. 20kesivo ááninkomba arumbá siména amápa-tantaaꞋo kwéimba kwéagaraasinkaiye. usáyaaitanim-bayai agaráásinkainaꞋa mimbáyáí máyáanaꞋa táátavai ónááowe. 21kesivomá pukáampinkembo usásintinkaintemba ááninko kesí imáyáavinkemba usásintinkanaeꞋa kwéune. 22kesivo séna íma aaivimbá maitinkánaumpo aaivimbó maitinkáním-bayai kesááninkomba ámakaumne siráiye. 23aaivimbó maitínkáanda-mayai símakaimba pósa kesivo áwíꞋo mósá máráantemba ááninko súwíꞋa mósá maránááowe. kesúwíꞋo ímo mósá maráíyawaimo ésa kesivomá siꞋmákaiwai áwíꞋa íma mósá maránááowe.

24áraiꞋa simátimeꞋa séꞋa kesááimo isésamo áraiꞋa aiꞋmákaiwaima Áánútuma iyémó kwésiyawaima áꞋa ááimba ásámai aúnáiꞋa umái maíꞋmaiꞋa kwéowe. kwaási máyáawaina ááimba Áánútuna némpaꞋa kwaémáyaimba Áánútuna egwaaꞋá tamáyáamba póꞋa íma aaivimbá maitinkánaumne. 25áraiꞋa simátimeꞋa séꞋa moórá-kanaa kwétinasa pukáiyan-kwaasi Áánútu ááninko-saai isánááowe. isáíyawaima usásinesa maíꞋmaiꞋa ónááowe. 26kesivomá kwaási máyáawaina ááimban-iye. asirayámbá siména séna mirámó úndantemba kwaási máyáawaina ááimba óne siráiye. 27kemá kwíyómpakemba kwaási úrandaꞋa kumpaáruraundawai únana póna kesivo kentávéna séna aaivimbó maitinkáníyonda-mayai amúne siráiye. 28mináíntávéna íma tááꞋa kaíno. moórá-kanaamo tínímba utamátínkaren-kwaasi amápaꞋa kesáái isésa 29utamátínkarepakemba usásinanaaowe. kaweꞋó uréwaimo usásinesa aúnáiꞋa umái maíꞋmaiꞋa ónááowe. sáwíꞋo uréwaimo usásinaiyaꞋa aaivimbá maitinkánaumne. mináíntávéna íma tááꞋa kaíno Ísu siráiye.

Ísumba kwená ááin-kwasai.

30Ísu simásuwena séna íma kesí imáyáavinkemba úndanivo siꞋmákaiwaima simásímakaintemba mirá kwéune. íma kesí imáyáavinkemba úndayaveꞋa arupí umái aaivimbá maitinkánaumne. kesivo simásímakainten-umai aaivimbá maitinkánaumne. 31keyáámo kesáváímó súndarakai kamparé sesinó. 32moóráwaigwaraꞋo kentávénamo kwésimba áraiꞋa kwésiye. 33keinárawaꞋa évakarawai tiꞋmárówasa Yóni nombá pétinkaiwaimba koáísaa uwaná Yóni kentávéna séna árai-kwaasiman-iye. kosimátíméro siráiye. 34kesí ááimbo sénááontavai íma anón-imayaa úndanivo Yóni kentáváí siráin-aintavai áraire síyaꞋa sáwíꞋo umáímo máyáampinkemba kawer-ámpáꞋá métinkanae-imayaa kwéeꞋa mináímbá kwésimatimune. 35oómbó aampaꞋó kúraꞋmae konten-umái Yóni kentí aampaꞋó kúratinkowaꞋa sáwíyankaꞋa aamoí uráawe. 36moórá-yantaakoma Yónima kentávéna siráin-ainkomba usáyaaitaraiye. kesivomó simásímakaim-bayaima kwémayaunana mimbáyáígómá kesí ááimba kwévaariye. kesivomó siménamo siꞋmákaim-bayai kwémayaunasa kesí ááimba kwéawanaawe. mintántáákómá Yónima kentávéna siráin-ainkomba usáyaaitaraiye. 37kesivo siꞋmákaiwaima kwegwáráꞋá kentávéna simbánivo kwenáái ísámai íma kaweꞋá éꞋa kwenaneꞋá íma awánaraawe. 38siꞋmarówaꞋo kunkáundayaveꞋa íma áraire kwésemba póna Áánútun-aai íma tirumpimbá kwáyáiye. 39keinárawaꞋa séꞋa aúnáiꞋa umái maíꞋmaiꞋa ónaumne séꞋa Áánútun-aai aúváívimba awána-awana kwéowe. mináúváívímbá kesí ááimba agaimárówaꞋanivo íma kaweꞋá umái ísaraawe. 40kaweꞋó umáímo iséꞋo kesópaꞋo tékaankasi aúnáiꞋa umái maíꞋmaiꞋa osino.

41kwaási kesúwíꞋa anómba umásinkanaaowe-imayaa íma kwéune. 42Áánútumbo ímo tirumbó áménkaꞋa kwétuwanaumne. 43kesivomá simásímakaintaveꞋa kunkáundanivo íma kaweꞋá umásínkaraawe. ánivo moóráwaimbo kesivomó ímo simámakaindawaimo tínaꞋo éꞋa kaweꞋá umánkanaaowe. 44keinárawaꞋa séꞋa kwaási kentáá súwíꞋa anómba umásinkanaaowe séꞋa póꞋa kesáái íma áraire kwésewe. Áánútuma kentáá súwíꞋa anómba umásinkaniye sékaankasi kentávéꞋa áraire sesinó. 45kesivo aúrankaꞋa íma aaivimbá maitinkánaunda póna Mósesi naaóváꞋá ámáán-aimba agaimakáiwai aaivimbá maitinkáníye. Mósesi kwésuwaꞋnaa iyémó sewáímó éna kwemá aaivimbá maitinkáníye. 46Mósesi kesáái agaimarómba póꞋa Mósesin-aaiyaveꞋo árairemo kwésekaai kesááiyaveꞋa áraire sesinó. 47Mósesimo agaimakáin-aintaveꞋa íma áraire kwésemba póꞋa kesááiyaveꞋa íma áraire kwésewe Ísu siráiye.