‏ John 7

Ísu áúnavaꞋmaati kwaasái.

1minkákémbá Yútiyaa-ayampaken-kwaasi Ísumba tuvuwónáe kwésuntavena Ísuma Yútiyaa-ayampaꞋa íma kwénaaena Káríri-ayampaꞋa kwénaauwana 2Yútaa-kwaasimo kwááyu-nambo ésamo tanómbo kwégauvon-kanaama sáwíyankaꞋa túwasa 3Ísu áúnavaꞋmaaꞋa akáꞋáámba simánkesa sésa maanáyámpáꞋá tuwéma Yútiyaa-ayampaꞋa kwaási torupanááopaꞋa ená mayáímá komáénasa pósa ená kwaási ená kaweꞋ-máyáí awánanaaowe. 4amápa-kwaasi suwánanaaowe síyawaima íma aúpáꞋá mayáímá mayánááomba po amápa-kwaasi túrankaꞋa mayáí komayaaó sésa 5Ísun-áúnavaꞋmaaꞋa kwentávésa íma imáyáa ésa sésa Áánútunopakemba kunkáiye sésa mináímbá simámúwana 6Ísu simátimena séna amáparawai kesí ááimba suwánanaao-kanaama íma tiráivo kemá úwoi kwíyasa tuwánésa 7marapá-kwáásí kembá íma áwááꞋa tíkaavo miwíyávéꞋa séꞋa kentí mayáímá sáwíꞋa kwéowe súndayavesa kembá áwááꞋa síkaawe. 8tanómbo opaꞋá koró. amáparawai kesí ááimba suwánanaao-kanaama íma tisaꞋá ívéꞋa íma tanómbo opaꞋá kúmpo kemá koró séna 9Káríri-ayampaꞋa méraiye.

Ísu YérúsaremuvaꞋa kuráin-kwasai.

10Ísu máyomba áúnavaꞋmaaꞋa tanómbo upaꞋá kuwaná naaémba kwemá aúpáꞋá kúwasa 11Yútaa-anon-kwaasi Ísumba kwéavakaa-esa sésa náávara máyáiyo sésa tísaa uwasá 12Ísuntavesa úwoi-kwaasi sáwívar-aimba iséise ésa sésa évakarawai sésa kawe-kwáásímán-iye suwasá évakarawai sésa ímanivo kampaꞋnaampa-kwáásímán-iye sésa 13Yútaa-anon-kwaasi sáwíꞋa umásínkáavo sésa íma avoraꞋá sumbá aúpáꞋá siráawe.

14Yútaa-kwaasimo kwááyu-nambo ésamo tanómbo kwégauvon-kanaama évareva kwáyowana avumpin-táwai Ísu anóm-bonoꞋ-naumpaꞋa uména kwenááima simátimuwasa 15Yútaa-anon-kwaasi isésa táátavai ésa tóipimba tiyáámba áákesa sésa monor-áímbó isópaꞋa íma koména ísaraimbanivo nórapakena ísaraiyo suwaná 16Ísu minímáyáámó umbá iséna séna kesí imáyáavinkemba íma simátimeꞋa Áánútu siꞋmákaiwaina imáyáavinkemba simátimune. 17keinárawaꞋa imáyáama éꞋa séꞋa náávaken-aina simásímakaiyo. kwená imáyáavinkenaꞋi. Áánútuna imáyáavinkenaꞋiyo-imayaama kwéowe. Áánútumo siráiniꞋa ónáe síyawai miwímó ésa simátimunda-ainkona ááimba isánááowe. 18kesáváí-ímáyáávínkén-áímbá síyawai kesúwíꞋa mósá maráígwáe sésa kentí imáyáavinkemba kwésevo tiꞋmákaiwai áwíꞋa mósá maránáe síyawai íma kampaꞋnaampáꞋá sembá árair-aimba kwésewe. 19Mósesi ámáámba simátímakombanivo íma ísámai kawer-urére sembá sínkamonae kwésewe súwasa 20úwoi-kwaasiyomba sésa íma tuvuwónáe-imayaa kwéeta máyaumpo enarumpimbá taraváá-kwámbá máyáísa mirán-áímbá séne suwaná 21Ísu séna monor-áímbá kwéisaan-kanaaraꞋa íma awánaraan-awaameꞋa uráunda póꞋa kemá sáwívar-imayaa kwéowe. 22kentíkwáꞋnárakemba sésa iyámpói matínkaraawasa avakaumboé-noꞋwaamba kwaésa túraꞋa araaꞋéna umái karánááowe suwaná naaémba Mósesi mináímbá agaimakómba pósa évaka-tawai monor-áímbá kwéisaan-kanaaraꞋa mirá kwéowe. 23Mósesina ámáámba íma ankáíraamba póꞋa agándai-kanaaraꞋa mirám-báyáímá iyámpói túraꞋa kwéowe. ánivo agándai-kanaaraꞋa moóráwaimba asóvamankaraunda póꞋa mayáímá mayaánavo séꞋa áwááꞋa kwésiyewe. 24íma awáné-aase aintáváí íma simátínkáaro. áraiꞋa awánáíyan-aintavai simátínkáaro Ísu siráiye.

25Ísu simásuwowasa évakarawai Yérúsaremu-naopaken-kwaasi sésa minkwáásíyáváíya tuvuwónáewa kwéseo sésa 26kwemá avoraꞋá kwenááima simátímísaꞋanivo íma aaivimbá mayánkaraawe. anón-kwaasiyomba sésawa kwemá Áánútumo usásinankawaima Káráísitiman-iye mirá kwéseo. íya kwéseo. 27maankwáásígóná naaópaꞋa awánáúndanivo Áánútumo usásinankaiwaina naaópaꞋa íma awánáúndavakemba tíníye siráawe.

28minkákémbá Ísu anóm-bonoꞋ-naumpaꞋa simátimena séna kembá ára suwánéra kesi máápaꞋa ára awánéra mirá kwéoo. íma kesí imáyáavinkemba kunkáumpo moóráwai siꞋmákaisaꞋa kunkáumne. kwemá áraite siwáímán-iye. kwembá íma awánaambanivo 29kemá áꞋa awánáúnda siꞋmákaisaꞋa kwenópakemba kunkáumne súwasa 30mináímbó súnkakemba tátoranae suwááesa kwená kanaamá íma tiróntavesa íma tátorowasa 31úwoi-kwaasivinkemba évakarawai sésa Áánútumo usásinankaiwaima tíndaraꞋa kwená mayáígóná awaamékoma amápaꞋ-mayaigomba usáyaaitaniye-imayaa kwéeta Ísuna mayáígómá mirám-báyáígómá póna Ísu Áánútumo usásinankaiwaiman-iye kwésune siráawe.

Ísumba koyátoraaro sésa tiꞋmákaan-kwasai.

32úwoi-kwaasiyomba mináímbá sumbá ámáán-kawaa-kwaasi isésa miwíyé mono-káwáá-kwáásíyé i-kwáásíyávésa sésa Ísumba koyátoraaro sésa tiꞋmárówasa kuwaná 33Ísu séna sáwíyankaꞋa keinárawate méꞋa siꞋmákaiwainopaꞋa íyónaꞋa 34sivakáá uwááeꞋa íma suwánéꞋa umáéndavaꞋa íma kanaán-umai iyónááowe súwasa 35Yútaa-anon-kwaasi iséise ésa sésa náávara kwíndayavena síyómpo avakáá uwááeta íya awánanaumne. Kíríki-ayampara Yútaa-kwaasi máyáapara kwéna kwenáái simátiminiyo sésa 36kwemá séna sivakáá uwááeꞋa íma suwánéꞋa umáéndavaꞋa íma iyónááowe simbá póta mináínkóná ááimba íma ísaraumne siráawe.

maíꞋmaiꞋa ónááon-donkona kwaasái.

37Yútaa-kwaasi kwááyu-nambo ésamo tanómbo kwégauvon-kanaaraꞋa moórá-kanaama kwáyowana minkánáá anón-kanaama úwana minkánááráꞋá Ísu usásinena anónkaꞋa séna nontávénamo kwétinkaindawai kesópakemba tamandaaró. 38Áánútun-aai aúváívimba agaimaréna siráintemba nonayumpinkémbó usausa intenkáámbó kesááiyavesa áraire síyawaima tirumpinkémbá nonayumpinkémbó intembá íníye Ísu súmba 39Áánútun-amankontavena siráiye. Ísu íma kwíyómpaꞋa kuntauwékáintavena Áánútun-amanko íma kunkáiye. Ísu imáyáa éna séna kemá púwóndavinkemba usásineꞋa kesivonópaꞋa iyéꞋa Áánútun-amankomba aiꞋmáráanana kuména kesááiyavesa áraire síyawai tirumpimbá kumbéniye-imayaa éna Ísu mináímbá simátímakaiye.

Ísuntavesa imáyáama taaínkaaꞋa uráan-kwasai.

40Ísumo simátimumba kwaásiyomba isésa évakarawai sésa áraiꞋa kwemá Áánútun-aai simátímíwaiman-iye suwasá 41évakarawai sésa kwemá Áánútumo usásinankaiwaima kwéamuꞋmaraundawaiman-iye suwasá évakarawai sésa Áánútumo usásinankaiwaima íma Kárírivakemba tíníye. 42naaóváꞋá Áánútun-aai aúváívimba agaimaréna séna Áánútumo usásinankaiwaima Tévítin-andarakemba Tévítina naaópaꞋa PétáremuvaꞋa marankáníye agaimaréna siráiye sésa umbá 43Ísuntavesa imáyáama taaínkaaꞋa ésa 44évakarawai sésa tátoranae sumbánivo íma tátokaawe.

45íma tátoresa i-kwáásí mono-káwáá-kwáásítópare ámáán-kawaa-kwaasitopare koyauwérówasa nóra séra íma tátoꞋmai áíꞋmaeꞋa teéó suwasá 46i-kwáásí sésa kwenááigoma amápa-kwaasi tááigomba usáyaaitaraiye suwasá 47ámáán-kawaa-kwaasi tísaa esa sésa kenkwáráꞋá kampaꞋá simátiyuwaisara kwéseo. 48anón-kwaasiye kesáá ámáán-kawaa-kwaasiyaawe íma áraiꞋa kwíyómpakemba kunkáiye kwésumpo kegwáráꞋá mirá seró. 49úwoi-kwaasiye suꞋmai áraire kwésewe. miwímá Mósesina ámáámba íma ísáamba póna Áánútu tínkaminiye suwaná 50ámáán-kawaa-kwaasivinkemba moóráwai áwíꞋa Níkótimasi ááéma ÍsunopaꞋa iráiwaima simátimena séna 51kentáásí ámáánko séna íma úwoi séꞋa sáwíꞋa uráiye séꞋa kwenááima ísareꞋa kwená mayáí awánéꞋa aaivimbá mayánkááro kentáásí ámáánko siráiye súwasa 52Níkótimasimba akáꞋáámba simánkesa sésa Kárírivakewain-ánaaemba kwaráánó. Áánútun-aai aúváívimba awánamai kawer-uréo. Áánútun-aai simátímíwaima íma KárírivakendaꞋan-ivo kwemá íma Áánútun-aai simátímíwaiman-iye sésa [ 53kentí naaóꞋ-naoꞋa kóyáwé uwaná Ísu Óríve-ompaꞋa iráiye.]