‏ Luke 21

ketor-ínínkó ÁánútumpaꞋa óntamba tukáin-kwasai.

Mááka 12:41-44

1simásuwena Ísu anóm-bonoꞋ-naumpaꞋa ména tuwánómba óntambo túwón-anaveumpimba sáwívar-oisankwara-kwaasi sáwívar-ontamba túwówana 2moórá-ketor-ininko íma óísamba makón-ininko téna sáwíyan-ontamba kae-tóyáráámbá tuwómba Ísu awánéna 3kwená kwayó-kwáásíyávéna séna áraiꞋa simátimeꞋa séꞋa minkétór-ínínkómó túwáin-ontankoma amápa-kwaasimo tukáan-ontankomba usáyaaitaiye. 4miwímá sáwívar-oisampinkemba évakaꞋa tukáavo kwemá sáwíyan-oisampinkemba mútúꞋa túwáimba póna óísan-iyaaimba méniye Ísu siráiye.

anóm-bonoꞋ-namba tawisí-áímbá siráin-kwasai.

Mátíyu 24:1-2, Mááka 13:1-2

5súwasa évakarawai anóm-bonoꞋ-nantavesa sésa kawer-óntánkákémbá úmakaawe. Áánútumba ámakaaan-tantaaꞋa konaarirí úmakaawata awánéta aamoiyá kwéune suwaná 6Ísu séna aáno kwaási tésa awánaan-tantaaꞋa amápaꞋa tawísíyuwesa amápar-ontankwarare tawísíyuwanaaowe Ísu siráiye.

sáwí-kanaa tíníye siráin-kwasai.

Mátíyu 24:3-14, Mááka 13:3-13

7Ísu mináímbá súwasa áísaa esa sésa anóndakoo emó sénda nósa-tawaiya tíníyo. nóran-awaamera ínata séta ákíraꞋa Ísumo simbá mirá íníyeya sénaumno suwaná 8Ísu séna kampar-áímbá iséꞋa áraire sevó kárákwiyoro. sáwíva-kwaasi tóyo ésa kesúwíꞋa mágwétesa sésa Áánútumo usásisinkaiwai únda póna minkánáá sáwíyankaꞋa tíníye sénááowe. mirán-áímbá síyawai tínaaemba íma kwáráaro. 9ááiꞋo tíyáán-aimba némpakenaꞋi. egwaakénáꞋi. isáíyana íma tááꞋa kaíno. mirán-kánáámó tínda mindá íma amápa-tantaaꞋa ánásai-awaameꞋan-iye. 10moórá-ayampa-kwaasimo ésa óꞋon-ayampa-kwaasiye ááiꞋa tiyánááowe. moórá-kawaa-kwaasigomo éna moórá-kawaa-kwaasigona amááraayavena usásimbai ááiꞋa tíyáaro sínasa usásinesa ááiꞋa tiyánááowe. 11óꞋon-oꞋom-baravaꞋa anóm-barima táníye. óꞋon-oꞋom-baravaꞋa ayawaimá táníye. sáwíva-kwaasi tíꞋa íníye. kwíyómpaꞋa óꞋon-oꞋon-tantaaꞋa paárínaꞋa awánéꞋa táátavai ónááowe. 12mintántááꞋó ímo paárínasa keinárawaꞋa tátoꞋmai sáwíꞋa umátinkesa monoꞋ-náúmpáꞋá mono-káwáá-kwáásí aaivimbá maitinkésa ándávaꞋa mótinkanaaowe. kentáváímó asiramáímo máyáantavesa tátoꞋmai anón-kwaasitopare kámááni-kawaa-kwaasitopare mótinkesa aaí simátinkaiyaꞋa 13minánón-kwáásí kesáái simátimenaaowe. 14aaimó simátínkénkaꞋa nóran-aina sénaumno-imayaa íma anómba íyana tirunkó íma umbaí taíno. 15minkánáá kawer-ímáyáá timéꞋa aaí táákaꞋa tínkáanaꞋa síyasa kentí namuro-kwáásí íma kanaán-umai kentááí araaisésa íma usáyaaitanaaowe.

16kentinóvowiye kentíváꞋawaawiye kentimááraawiye kentí kwaásiye tíꞋmaesa anón-kwaasitopaꞋa mótinkesa aaí simátinkaiyasa keinárawapinkemba évakarawai tínkamiyaꞋa puwónááowe. 17kentáváímó asiramáímo máyáantavesa amáparawai tíyámba umátinkanaaowe. 18mirá ésa íma timambá tínkambai ánásanaaowe. 19asiramáímo maéꞋo éꞋa kaweꞋá umái ménaaowe Ísu siráiye.

sáwí-kanaagona kwaasái.

Mátíyu 24:15-21, Mááka 13:14-19

20Ísu mináímbá simásuwena séna Yérúsaremu-naopaꞋa namuro-kwáásí taúkúmaraiyaꞋa séꞋa amápa-tantaaꞋa tawísíyuwanaaon-kanaa tiyé sénááowe. 21Yútiyaa-maravaꞋo máyaiyan-kwaasi omápata isaaisésa iyónááowe. naaópaꞋo máyaiyan-kwaasi mindáópaꞋa tuwésa kóyáwé ónááowe. kígauvaꞋo máyaiyan-kwaasi íma naaópaꞋa iyónááowe. 22minkánáá Áánútu sáwí-meyamba timínana Áánútun-aai aúváí-kwandaaivinken-aimba paáriniye. 23tímúkwarar-inimba ívér-iyampoigwarar-inimba minkánáá sáwíꞋa ónááowe. Áánútu maankwáásíyávéna áwááꞋa tiyínana anón-umbai táníye. 24óꞋom-baravakewai évakarawai ayáátááꞋ-mankaraꞋnei tínkamesa évakaꞋa tíꞋmaesa óꞋon-oꞋon-kwaasiti maraváꞋá mótinkesa óꞋonkaa-kwaasi Yérúsaremu-naopaꞋa kárákwiyesa sáwíꞋa íyana Áánútu séna kentí kanaamá ánásaiye síníye Ísu siráiye.

Ísu marapáꞋá kumínín-kwasai.

Mátíyu 24:29-35, Mááka 13:24-31

25Ísu mináímbá simásuwena séna aaváúráꞋá kwíyónkaꞋa okáꞋá óꞋon-oꞋon-tantaaꞋa paáriniye. marapáꞋá óꞋon-oꞋom-bapaken-kwaasi umbaí tiyáníye. uwí-nónkó anónkaꞋa áái kwésena tuvántááva ínasa kwaási inkaisénááowe. 26kwíyónko toraꞋnaáraꞋa ínasa kwaási sésa nóra íníyo sésa tiyántámbá kwétainasa táátavai kwéesa anón-imayaa ónááowe. 27kemá kwaási úrandako anón-asirayankwara ságayankwaraꞋa ainámpímbá kúmónaꞋa suwánanaaowe. 28kemó súnda-yantaaꞋa ááimba ásámai paárínaꞋa mósá awánanaaowe. Áánútu kawer-ámpáꞋá métinkanin-kanaa sáwíyankaꞋa tínímba póꞋa toꞋmayaa umái méꞋa mósá awánaaro Ísu siráiye.

29Ísu mináímbá simásuwena séna moórá-tai naí-táígó áwíꞋa víki mindágwara óꞋon-taigwaraꞋa imáyáa oró. 30aráságáyómó agayáínda awánéꞋa séꞋa áúꞋo sínín-kanaa sáwíyankaꞋa tíníye sénááowe. 31mirámó intembá kemá súnda-yantaaꞋa ínaꞋa awánéꞋa séꞋa Áánútu kwená kwaási kwégawaaimba sáwíyankaꞋa tíníye sénááowe. 32áraiꞋa simátimeꞋa séꞋa ívéꞋo máyáan-kwaasi évakaꞋa íma pukáiyankaꞋa kemó súnda-yantaaꞋa paáriniye. 33kwíyómba maramá ánásainana kesáái íma ánásena úwoi kwaíkwaiꞋa íníye Ísu siráiye.

34Ísu simásuwena séna kentúraꞋa kárákwiyoro. uwoꞋaóꞋ-nómbá néꞋa kavóná méꞋa marapá-tántááꞋá anón-imayaa ováínivo. mirámó kwéꞋo éꞋa íma imáyáa kwéiyankaꞋa kumúnavainivo kárákwiyoro. 35kívoꞋo aumakáawanamo ímo imáyáa imbó kwaígomo tavágwintemba óꞋon-oꞋom-baravaken-kwaasi íma kwéisenkaꞋa kumúnavainivo 36kárákwiyoro. námúnaa símae kwéiyiyana kemó súnda-yantaaꞋa kentópaꞋo tínaꞋo éꞋa asiramái éꞋa kwaási úrandako súrankaꞋa ménaaowe Ísu siráiye.

37minkánáávímbá aasiyaasi-táwai Ísu anóm-bonoꞋ-naumpaꞋa uména kwenáái simátímaꞋmaena kwéiyena enónkaꞋa máápaꞋa kumbéna Óríve-omapaꞋa noꞋwáámba umaíꞋmai kwéuwasa 38sáwíva-kwaasi aaváyaavimba ááéma Ísun-aai isánáe sésa anóm-bonoꞋ-naumpaꞋa umaíꞋmaiꞋa úmae iráawe.