‏ Luke 23

Ísumba PáírátinopaꞋa máánkaraan-kwasai.

Mátíyu 27:1-2, 11-14, Mááka 15:1-5, Yóni 18:28-38

1mináíntávésa misáwíváráwáí usásinesa Ísumba áíꞋmaesa Árómáani-kamaani-kawaanako áwíꞋa PáírátinopaꞋa máankesa 2aaimá simánkesa sésa minkwáásígó Yútaa-kwaasi kampar-áímbá simátimena miwítí imáyáa simái sáwíꞋa kwéena séna Árómáan-kamaani-anondakomba táákísi-ontamba íma áméro kwésena kwesáváí séna Yútaa-kwaasiti kawáánáꞋá éꞋa Áánútu usásisinkaiwai úne siráiye suwaná 3Páíráti Ísumba áísaa ena séna Yútaa-kwaasiti kawáánárá oónó súwana Ísu séna áꞋa séne súwana 4Páíráti mono-káwáá-kwáásíyáváíyé úwoi-kwaasiyavaiye séna minkwáásígó íma sáwíꞋa uráisaꞋa awánáúmne súwasa 5asiramái sésa Káríri-ayampaꞋa kwaásiti imáyáa kwéyavisena minkákémbá Yútiyaa-ayampaꞋa taména mirá kwéiye siráawe.

Ísumba ÉrótinopaꞋa máánkaraan-kwasai.

6suwaná Páíráti mináímbá iséna séna Káríri-ayampakendaraꞋiyo súwasa 7owé mináyámpákéndáꞋán-iye suwaná imáyáa éna séna Éróti mináyámpákén-káwáánáꞋá póna ívéꞋa maankáꞋá Yérúsaremu-naopaꞋa tamáyáimba póna aiꞋmáráanana kwenópaꞋa kwínana kwemá isáníye Páíráti simásuwena aiꞋmarówasa áíꞋmaesa ÉrótinopaꞋa máánkaraawe. 8ayáátáákaꞋa Éróti Ísuntavena kwésun-aimba iséna Ísumba awánaanana ímo awánáúnda-mayai mayáínaꞋa awánanae súwasa Ísumba ÉrótinopaꞋa máánkarowana awánéna aamoí éna 9óꞋon-oꞋon-tantaatavena áísaa úwana Ísu íma aaí súmba úwoi máyowasa 10mono-káwáá-kwáásíyé ámáámba sun-kwáásíyé mésa Ísumba simánkón-aimba asiramái suwasá 11Érótiye kwená i-kwáásíyé Ísumba simái sáwíꞋa kwéumankesa kanaárááꞋa ankésa anón-kwaasiti unáánkwátói umánkesa áíꞋmaesa PáírátinopaꞋa ókwaraꞋa máánkaraawe. 12ááéma Érótiye Páírátiye aaisambá sirááyamba pósarai minkánáámá kaweꞋá umái máyóyasa Ísumba áíꞋmaesa ókwaraꞋa PáírátinopaꞋa máánkaraawe.

Ísumba arááꞋa tuvúwóro siráin-kwasai.

Mátíyu 27:15-26, Mááka 15:6-15, Yóni 18:39-19:16

13máánkarowana Páíráti mono-káwáá-kwáásíyé anón-kwaasiye úwoi-kwaasiye tááyena 14séna minkwáásí kesópaꞋa máankeꞋa séꞋa kwaásiti imáyáa simái sáwíꞋa kwéiye kwésewe. kentúrankaꞋa áísaa únana simánkáan-ainkona ááimba íma kwáyáísaꞋa awánáúmne. 15Érótiye áísaa úyamba mináínkóná ááimba avakáá uwááekai úyana aiꞋmáráísasa áíꞋmaesa kesópaꞋa tiráawe. tuvuwíyanamo puwíníniꞋa uráimba 16póꞋa i-kwáásí senasá áwírukuꞋa násúwéwaꞋa ayúrankanaumne súwasa [ 17Yútaa-kwaasi tíyótaasa í-tánón-kánáá tóyo úntemba moórá-kwaasi tááyowana Páíráti minkwáásí ayúrankowana miwítópaꞋa kúwana Páíráti séna Ísumba ayúrankanae súwasa] 18amáparawai anónkaꞋa sésa ímanivo tuvuwíyana pwínívo Párápásimba ayúrankaaao siráawe. 19ááéma évakarawai kámááni-kwaasiye ááiꞋa tíyómba moóráwai áwíꞋa Párápásima kwemá moóráwaimba tuvuwúwana puwúwasa ándávaꞋa ánkarowasa sésa Párápásimba ayúrankaao suwaná 20Páíráti Ísumba ayúrankanae-imayaa éna simátimuwasanivo 21anónkar-anonkaꞋa sésa taairaꞋá tuvuwíyana puwíno suwaná 22Páíráti ókwaraꞋa séna nóra-sawira uráinaꞋiyo. tuvuwíyanamo puwíníniꞋa íma uráimba póꞋa i-kwáásí senasá áwírukuꞋa násúwéwaꞋa ayúrankanaumne súwasa 23anónkaꞋa sésa taairaꞋá tuvuwíyana puwíno símae íyún-ainko Páírátin-aaigomba usáyaaitowana 24Páíráti miwí táái iséna owé séna kemó sentembá oró séna 25moóráwaimba ayúrankena kámááni-kwaasi ááiꞋo tíyómbo moóráwaimba tuvuwúwana puwúwasa ándávaꞋa ánkarowaimba tááyowaimba Páíráti ayúrankena taairaꞋá tuvuwíyana puwíníye-imayaa untávéna Ísumba i-kwáásíráꞋá tímakaiye.

Ísumba arááꞋa tuvúkáan-kwasai.

Mátíyu 27:32-44, Mááka 15:21-32, Yóni 19:17-27

26timúwasa i-kwáásí Ísumba áíꞋmaesa kumbá moóráwai Sáíríni-naopakewai áwíꞋa Sáímoni kwemá Yérúsaremu-naor-ampaꞋa túwasa i-kwáásí tátoresa Ísumbo tuvuwónááon-taima áúgwaatarankesa sésa Ísun-ánaaemba tiyó suwaná mirá úwasa 27sáwíva-kwaasi Ísun-ánaaemba kwaꞋmái kwéguwasa aaraiyómbá tirumbá umánkesa imá sirésa iviꞋá támaesa ánaaemba kwaꞋmái kwéguwana 28Ísu kwanténa séna Yérúsaremu-naopaken-inintono. íma kesí iviꞋá téꞋa kentí iyámpóíyavaiye kesáváíyé iviꞋá taaró. 29Yérúsaremu-naopaꞋa sáwí-kanaama tínímba ageíníné ímo iyámpóímo tinkésamo náámbo tímakaan-inine aamoí kwéesa iyámpói-iyaaimba póꞋa inkaiséꞋa kónaumne sésa aamoí kwéowe sénááowe. 30minkánáámó tínímba sáwíyan-omakontavaiye anón-omakontavaiye sésa ááéma pukónáivo kítímae kusiráápaao sénááowe. 31kemá aúná-tairaaniꞋa únda pósa sáwíꞋa kwéumasinkaavo keinárawaꞋa aáyánkayan-tairaamba ombá pósa sáwíꞋa anómba umátinkanaaowe Ísu siráiye.

32Ísu súwasa kae-kwáásí sáwíꞋa urááyan-kwaasigwaraꞋa tíꞋmaesa Ísunte tínkamonae sésa tíꞋmaesa 33mimbárágó áwíꞋa aꞋnómayaampare supaꞋá kurésa Ísumba taairaꞋá tuvuwésa évarevar-akwampaꞋa kae-kwáásí taairaꞋá tuvúsúmarowana 34Ísu séna kesivoó mayáígóná ááimba íma awánaresa kembá sáwíꞋa kwéumasinkaamba íma imáyáa e sáwí-meyamba íma timé sáwí-imayaa maitiyuwaaó súwasa i-kwáásí sésa kwená unáánkwátói nááwa mayáníyono sésa taaínkaar-urésa aávéima tésa usáyaaitaindawai mayáníye suwasá 35kwaásiyomba mésa árimba awánésa Yútaa-anon-kwaasi kanaárááꞋa ankésa sésa óꞋowi túwaꞋnaa ena Áánútumo usásinkaiwaimo énamo éna kwesáváí kwenáúma áwaꞋnaa íníye suwasá 36i-kwáásíyé kanaárááꞋa ankésa ikaaꞋó vón-domba maimaésa kwenópaꞋa tésa sésa naaó. 37Yútaa-kwaasiti kawáánáꞋó émo e esáváí enáúma áwaꞋnaa uwo suwasá 38ááéma aúváíma agaimakésa sésa Yútaa-kwaasiti kawáánáꞋán-iye sésa agaimái Ísu aꞋnónká-táíráꞋá mósá makáawe.

39mósá márówana sáwíꞋo uyan-kwáásímó tínkamuyan-kwaasigorai moóráwai Ísumba kanaárááꞋa ankéna séna Áánútumo usásinankaiwaimo émo e enáúma áwaꞋnaa e kenkáígwáráꞋá súwaꞋnaa uwo súwana 40moóráwai séna íma mirá siyó. Áánútun-ááꞋo kwéinkaiseraai mirá íma sésino. kwembó sáwí-meyambo kwéamentemba kenkáígwáráꞋá mirá kwéowe. 41kwemá íma sáwíꞋa uráiwaimba sáwí-meyamba kwéamevo keiráí sáwíꞋa uráuyawainkai sáwí-meyamba kwéumasinkaawe séna 42Ísuntavena séna Ísuwo ená kwaási kawáá indaráꞋá kesí imáyáagwaraꞋa uwó súwana 43Ísu séna áraiꞋa simámeꞋa séꞋa ívéꞋa kesé kaweꞋ-mápáꞋá méniyone Ísu siráiye.

Ísu pukáin-kwasai.

Mátíyu 27:45-56, Mááka 15:33-41, Yóni 19:28-30

44súwana kwáyáꞋwái amápaꞋ-mapaꞋa túnkwena aaváúmá kaapa marówana túnkumba 45anóm-bonoꞋ-naumpaꞋa ampanta-óntámá úmakomba taváákaarumai kaesé umágúwana póna ÁánútunopaꞋa iyónááon-amba onta tisuwówana 46Ísu anónkaꞋa séna kesivoó kesimambá enayáámpimba kwétoꞋmaraumne simásuwena puwúwana 47i-kwáásítí kawáánákó Ísumo puwúmba awánéna Áánútu áwíꞋa mósá maréna séna áraiꞋa arupí-kwaasiman-iye súwasa 48sáwíva-kwaasi koawánanaumne sésa torupamái máyón-kwaasi Ísumo puwúmba awánésa tirunkó umbaí tówasa miwítí naaópaꞋa kóyáwé uwasá 49Ísuwemo naaún-kwaasiye Káríri-ayamapakemba Ísun-ánaaemba kwaꞋmaésa YérúsaremuvaꞋa tirón-inine nénkaꞋa tamésa amápa-tantaaꞋa awánaraawe.

Ísumba utamánkaraan-kwasai.

Mátíyu 27:57-61, Mááka 15:42-47, Yóni 19:38-42

50awánowana moóráwai áwíꞋa Yósépi Yútiyaa-maravaꞋa Árímátíyaa-naopakewai kwemá kaweꞋnáꞋá arupí umái máyowai Áánútu kwená kwaási kawáá íníye séna amuꞋmaréna póna Ísumbo tuvuwónáe sun-kwáásí tááiyavena íma owé siráiwai kwemá 52PáírátinopaꞋa téna Ísun-auma utánáivo simiyó súwana owé súwana 53Ísun-auma taairakémbá tamaimái aúná-ampantavimba asááumai maimaésa kwaási aúsámakon-ontam-buri-aivimba mámaresa kwaási íma makóm-buri-aivimba mámaresa 54toómbó ákáꞋmaimo toꞋmayaa un-kánáá Yútaa-kwaasi agándon-kanaa sáwíyankaꞋa tíníye kwésuntavesa Ísumba utamánkówasa 55Kárírivakembo Ísun-ánaaembo kwaꞋmaésamo tirón-inimba Yósépi-ánaaemba kwaꞋmaésa tésa Ísumbo utamánkomba taawánésa 56tayauwerésa áúraꞋo mápérankanae sésa áséi-kwiyum-basawemba toꞋmayaa unkáꞋá agándon-kanaama túwana ámáámbo sunten-umái úwoi méraawe.