‏ Matthew 25

siyáánkai-inaamaruti kwaasái.

1Ísu mináímbá simásuwena aaraimó kwémayaawainá ááimba imáyáa éna séna naaén-kanaamo tínímba Áánútu kwená kwaásimo kawááin-aimba maarán-áímbán-iye. aaraimó mayáníwaimba toómbá náíyanesa siyáánkai-inaamaru oómbá kúraꞋmaesa aampakémbá koáíkaawe. 2minárásíyómbá évaꞋaasei sáwí-imayaagwaraꞋa owasá évaꞋaasei kawer-ímáyáágwáráꞋá owasá 3sáwí-imayaagwarar-arasi oómbá kúraresa óꞋon-anaveumpimba iramó kánín-domba íma atíyoraawasa 4kawer-ímáyáágwárár-árásí oómbá kúraresa óꞋon-anaveumpinkwaraꞋa iramó kánín-domba atíyoresa 5aaraimó mayáníwaimba koamuꞋmakáawana íma ááéma tisasá túgávaaꞋa isasá tuún-kwaiguráawe.

6tuún-kwáyáawana noꞋwáán-avuntamba moóráwai aayamái séna kwétivo koairánáisaiye sisasá 7misíyáánkáí-árásí usásinesa oómbá toꞋmaésa kombá 8sáwí-imayaagwarar-arasi kawer-ímáyáágwárár-árásíyávésa sésa kentáásí iramá pisinánívo nombá atísimero sewasá 9kesáágwáráꞋá miráumai kwéanasaivo nombó atíyén-daumpakemba komeéyámbáráaro sewasá 10kwégowana aaraimó mayáníwai tisasá évaꞋaasei-arasi toꞋmayaan-umai máyáawai kwesé toómbó náíyanesa naaúmpaꞋa íyówana 11onta umásúwáísasa minéváꞋááséí-árásí nombó atiyénáesamo kówai tésa anónkaꞋa sésa anóndakoo onta tisinkaaó sewaná 12íma awánáúnda-arasi ombá póꞋa íma onta titinkánaumne siráiye. 13Ísu simásuwena séna miráumai kemó kúmónda-kanaa íma ísarenkaꞋa kumónaumpo kárákwimai máéro Ísu siráiye.

kaumbo-máyáí-kwáásítí kwaasái.

Árúku 19:11-27

14Ísu mináímbá simásuwena séna naaén-kanaamo tínímba Áánútu kwená kwaásimo kawááin-aimba maarán-áímbán-iye. moórá-anondako némpaꞋa kwááyu koménae séna éna kwená mayáí-kwáásí tááyena séna kesí óntankaꞋa kárákwiyoro séna 15moóráwai kwená mayáí kaweꞋ-máyáí máyáísana awánaiwaintavena séna kesí óntamba évaꞋaasei-unamba kárákwiyuwo séna aména moóráwai kwená mayáí sáwíyankaꞋa kaweꞋ-máyáí máyáiwaintavena séna kesí óntamba kaer-únámbá kárákwiyuwo séna aména moóráwai kwená mayáí sáwíyam-bayai máyáiwaintavena séna kesí ónamba moórá-unamba kárákwiyuwo séna aména tiyuwéna námpaꞋ-maravaꞋa kówisana 16évaꞋaasei-unan-ontamba mairáiwai minóntándéí mayáí maimaé kwégwena óꞋomba évaꞋaasei-unan-ontamba máyáísana 17moóráwai kaer-únán-óntámbá mairáiwai minóntándéí mayáí kwémaena óꞋomba kaer-únámbá máyáísana 18moóráwai moórá-unan-ontamba mairáiwai minóntándéí íma mayáí maéna úwoi maravímbá utámakaiye.

19utámakaisasa mirá kwéowana miwítí anóndako ayáátáákaꞋa kuróm-bapaꞋa miváꞋá ména naaémba téna kwááyumo tímakaunda-ontamba torupamái awánanae séna tááyaisasa 20tésa évaꞋaasei-unan-ontamba mairáiwai maimaéna máagaraarankena séna évaꞋaasei-unan-ontambo símakaandavinkemba mayáí kwémaeꞋa óꞋomba évaꞋaasei-unan-ontamba mairáumne sisaná 21anóndako séna kesí mayáí-kwáásígó kaweꞋá óne. kentávémo imáyáamo émo sáwíyan-tantaakaꞋo kaweꞋó umáímo kárákwiraandantemba sáwíva-tantaakaꞋa kárákwiyiniyone. kesirunkómó aamoimó intembá kesé taménana enarunkó aamoí íno sisaná 22kaer-únán-óntámbá mairáiwai maimaéna máagaraarankena séna kaer-únán-óntámbó símakaandavinkemba mayáí kwémaeꞋa óꞋomba kaer-únán-óntámbá mairáumne sisaná 23anóndako séna kesí mayáí-kwáásígó kaweꞋá óne. kentávémo imáyáamo émo sáwíyan-tantaakaꞋo kaweꞋó umáímo kárákwiraandantemba sáwíva-tantaakaꞋa kárákwiyiniyone. kesirunkómó aamoimó intembá kesé taménana enarunkó aamoí íno sisaná 24moórá-unan-ontamba mairáiwai maimaéna máagaraarankena séna emá asirayán-kwáásí éma óꞋowiti mayáívínkémbá toómbá kwéne óꞋowiti kígaurakemba úwoi kwénaae kwémandaanaꞋa 25enáároi inkaiséꞋa ená óntandei mayáí íma mayáúnda úwoi aúpáꞋá makáunda po ená óntamba mayáníyone sisaná 26anóndako séna sáwí-mayai-kwaasigo kavóná-kwaasi po kentávémo sémo óꞋowiti mayáívínkémbá toómbá kwéne óꞋowiti kígaurakemba úwoi kwénaae kwémandaanaꞋa óne sénda po 27kesí óntambo amápa-kwaasiti óntambo máráan-daumpaꞋo makáandarakai tiréꞋa kesí óntankwara aaꞋwáá-ontankwaraꞋa mayáúsino séna 28kwená mayáí-kwáásíyávéna séna minóntámbá mairéꞋa siyáánkai-unan-ontambo tokáiwaimba áméro. 29sáwíva-tantaakaꞋo kaweꞋó umáímo kárákwisinkaiwaimba moórá-mora-yantaaꞋa áménana kárákwisinkanivo ímo kaweꞋó umáímo kárákwisinkaindawaimpakemba makáimba máyáanaꞋa 30misáwí-máyáí-kwáásígómbá áíꞋmaeꞋa máápaꞋa móru auwáíyana túnkwi-ayampaꞋa tíꞋo kwéisasamo iviꞋó kwétesamo túwááyambo akévundaresamo máyáapaꞋa kwíníye siráiye Ísu siráiye.

Ísu máyáawaina ááintavena tísaa ínín-kwasai.

31Ísu mináímbá simásuwena séna kemá kwaási úrandako naaémba kúmóndaraꞋa ságayankwara kwíyómpaken-kwayoꞋnarawakwaraꞋa kárákwiraundawai póꞋa kúmónasa 32amápaꞋ-maravaken-kwaasi kesúrankaꞋa torupamái máyaiyaꞋa sipisípi-poiye méme-poiraremo kárákwiraiwaimo taaímbaraintemba minkwáásíyómbá miráumai taaímbakeꞋa 33évakarawai siyáánúrapaꞋa mótinkeꞋa évakarawai siyáánepaꞋa métinkeꞋa 34kárákwiraundawai siyáánúrapaꞋo maíyan-kwaasiyaveꞋa séꞋa kesivo kaweꞋá umátínkáiwain-owe. Áánútu maramó taróruronkaꞋa kentí imáyáa éna kentí maruꞋá toꞋmayaa úmakaivo miváꞋá tamáéro. 35kaweꞋá umásinkeꞋa kembó sááimo sinkómbo toómbá siméꞋa nombá siméꞋa óꞋom-bapaken-kwaasimo ówánda aamoí umásinkeꞋa kentí naaúmpaꞋa mógwésinkeꞋa 36unáánkwátói-iyaaimbo ówánda kwésimeꞋa síꞋo úmba kwégarakwiyeꞋa ándávaꞋo maéwánda kwésuwaꞋnaa-eꞋa mirá umásínkaraawe. mirán-áímbá senasá 37arupí umái máyáawai sísaa esa sésa Ísóigo nósa-tawaiya embó ááimo ankómba toóné noné améta 38nósa-tawaiya óꞋom-bapaken-kwaasiraambo undá aamoí umánketa kentáásí naaúmpaꞋa móanketa nósa-tawaiya unáánkwátói-iyaaimbo undá améta 39nósa-tawaiya áíꞋo úmba áwaꞋnaa eta nósa-tawaiya ándávaꞋo maúnda áwaꞋnaa uráumno síyaꞋa 40kárákwiraundawai séꞋa áraiꞋa simátimeꞋa séꞋa kesí kwaási úwoi-kwaasi miráumaimo túwaꞋnaa uráamba mindá kembán-iye simátimenaumne.

41mirá simátímatuweꞋa siyáánepaꞋo maíyan-kwaasiyaveꞋa séꞋa Áánútu sáwíꞋa umátinkaniwain-ovo siyuwéꞋa kóro. Áánútu Sáátáánigone kwená kwayóꞋnáraware imáyáa éna anón-irama toꞋmayaa umátínkaraisana kaíkaiꞋa éna íma pisínáípaꞋa miváꞋá komáéro. 42kembó sááimo sinkómbo toóné noné íma siméꞋa 43óꞋom-bapaken-kwaasimo ówánda íma aamoí umásinkeꞋa kentí naaúmpaꞋa íma mósinkeꞋa unáánkwátói-iyaaimbo ówánda íma siméꞋa síꞋo úmba íma súwaꞋnaa eꞋa ándávaꞋo maéwánda íma súwaꞋnaa eꞋa mirá umásínkaraawe. mirán-áímbá senasá 44sísaa esa sésa Ísóigo nósa-tawaiya embó ááimo ankómba toóné noné íma améta nósa-tawaiya óꞋom-bapaken-kwaasiraambo undá íma aamoí umánketa kentáásí naaúmpaꞋa íma móanketa nósa-tawaiya unáánkwátói-iyaaimbo undá íma améta nósa-tawaiya áíꞋo úmba íma áwaꞋnaa eta nósa-tawaiya ándávaꞋo maúnda íma áwaꞋnaa uráumno síyaꞋa 45kemá séꞋa áraiꞋa simátimeꞋa séꞋa kesí kwaási úwoi-kwaasi íma túwaꞋnaa uráamba mindá kembán-iye simátimenaumne.

46mirán-áímbá simátímatuweꞋa aaí senasá miwítí sáwí-meyambo ímo ánásenamo kwaíkwaiꞋo ínín-ayampaꞋa komaíꞋmaiꞋa ónááovo arupí umái máyáawai aúnáiꞋa umái maíꞋmaiꞋa ónááowe Ísu siráiye.