Mat 26 | KZE | STEP | Ísu minóꞋón-óꞋón-áímbá kwená kwayó-kwáásíyávéna simátímakaiye. naaóváꞋó Áánútu Yútaa-kwaasi tíyótaasa í-tánón-kánáá imáyáa éna séna kaeꞋ-nóꞋwáámbá kwaésa tíyótaasa í-tánón-kánáá tínímba kembá tátoꞋmai taairaꞋá sínkamiyaꞋa puwónaumne Ísu kwená kwayó-kwáásíyávéna simátímakaiye.

‏ Matthew 26

Ísuna ámááyu-aimba siráan-kwasai.

Mááka 14:1-2, Árúku 22:1-2, Yóni 11:45-53

1 Ísu minóꞋón-óꞋón-áímbá kwená kwayó-kwáásíyávéna simátímakaiye. naaóváꞋó Áánútu Yútaa-kwaasi tíyótaasa í-tánón-kánáá imáyáa éna séna kaeꞋ-nóꞋwáámbá kwaésa tíyótaasa í-tánón-kánáá tínímba kembá tátoꞋmai taairaꞋá sínkamiyaꞋa puwónaumne Ísu kwená kwayó-kwáásíyávéna simátímakaiye.

3 simátimuwasa mono-káwáá-kwáásíyé Yútaa-anon-kwaasiye aivaꞋ-mónó-káwáánákó áwíꞋa Káyavaasina naaúmpaꞋa torupamái mésa 4 sésa nóraumaiya aúpáꞋá Ísumba tátoꞋmai inkamónaundayaꞋiyo. 5 amápa-kwaasi ááiꞋa tíyáávainivo tanómbo kauvíyan-kanaaraꞋa íma tuvuwónaumne siráawe.

Ísumba áséi-masawemba pérankarain-kwasai.

Mááka 14:3-9, Yóni 12:1-8

6 suwaná Ísu Pétáni-naopaꞋa koména moóráwai áwíꞋa Sáímonina naaúmpaꞋa áúma kárúkokovaaꞋa uréna ánásarowaina naaúmpaꞋa ména toómbá kwénowana 7 moórá-ininko iyéna áséi-kwiyumba úm-basawemba anón-ontankakemba meéyámbakaim-basawemba maimaéna iyúmba Ísu aꞋnómpímbá atímarowasa 8 kwená kwayó-kwáásí awánésa áwááꞋa sésa nóra séna mimbásáwémbá úwoi atíyankaiyo. 9 mimbásáwémbó óꞋowimo timénamo anón-ontambo mairénamo ímo óísambo makáan-kwaasi tíméraambaniye suwaná 10 Ísu iséna ivátuweꞋa íma áwááꞋa aééro. kaweꞋá umái pésinkaiye. 11 ímo óísambo máráan-kwaasi keséma maíꞋmaiꞋa kwéiyaꞋa túwaꞋnaa ónáe séꞋa túwaꞋnaa ónááombanivo kemá keséma marapáꞋá íma maíꞋmaiꞋa ónaumne. 12 púwóndaraꞋa masawémba pésinkesa utamásinkanaaovo minínínkó áꞋa masawémba pésinkaiye. 13 áraiꞋa súmpo maísáaro. kesí áséi-aimba amápaꞋ-mapaꞋa kwésimatimesa minínínkómó umásinkain-aimba kwésimatimiyasa táákaꞋa maránááowe Ísu siráiye.

Yútási Ísuna kuntaruꞋá mairáin-kwasai.

Mááka 14:10-11, Árúku 22:3-6

14 súwana Ísuna kwayó-kwáásí sísamaivakemba kaeꞋá kumbaimái-kwaasivinkemba moóráwai áwíꞋa Yútási moórá-awiꞋa Isakéríóti mono-káwáá-kwáásítópaꞋa kwéna 15 séna Ísumbo tátoraiyantavaimo agaráátínkáanaꞋo éꞋa nóraumai-meyana siménááoo súwasa moórá-kwaai aíyayaan-umai siyáánkai-ontamba 30 ontamba táámpamai ámúwana Yútási maimaéna 16 kwéna nóraumai Ísumba agaráátínkáanasa tátoranaao-imayaa ááimba ásámai uráiye.

tíyótaasa í-tánómbá kauráan-kwasai.

Mááka 14:12-21, Árúku 22:7-14, 21-23, Yóni 13:21-30

17 Yútaa-kwaasi ímo intóráin-tantaakwara-pereti kwéagayon-kanaa aiva-táwai túntemba kwená kwayó-kwáásí Ísumba taáísaa esa sésa náávara tíyótaasa í-tánómbá kogauvónaundayaꞋiyo suwaná 18 Ísu séna Yérúsaremu-naopaꞋa kwékai moórá-kwaasigontavekai sékai kentáásí anóndako séna kesí kanaamá tisatá kesí kwayó-kwáásíyé ená naaúmpaꞋa tíyótaasa í-tánómbá nánaumne kwésiye kosimámékaiyo súwasarai 19 Ísumo súntemba mirá ésarai minkáꞋá tanómba mágauwankaraaiye.

20 tanómba mágaumakoyasa enónkaꞋa Ísu kwená kwayó-kwáásíyé kwésa mindáúmpáꞋá umésa 21 toómbá kwémandesa uwaná Ísu séna keinárawapinkemba moóráwai kembá namuro-kwáásíráꞋá agaráátinkaniye súwana 22 tirunkó umbaí tówasa moórá-mora-umai áísaa esa sésa Ísóigoo kewáꞋiyo sinté kuwaná 23 Ísu séna moóráwai kwená toón-ayai maimaéna kesé moórá-taavepimba tuꞋmái náíndawai kwemá kembó namuro-kwáásíráꞋó agaráátinkaniwaiman-iye. 24 naaóváꞋá Áánútun-aai aúváívimba agaimaréna séna kwaási úrandako puwíníye siráintemba póꞋa púwónana namuro-kwáásíráꞋó agaráátinkaniwai sáwí-meyamba mayáníye. kwembó ímo maránkaraankakaankasi kaweꞋá isinó Ísu súwana 25 Yútási kwembó agaráátinkaniwai séna anóndakoo kentáváíyá kwéseno súwana Ísu séna áꞋa séne siráiye.

Ísu kwená kwayó-kwáásí toómbá tímakain-kwasai.

Mááka 14:22-26, Árúku 22:15-20, 1 Kórínti 11:23-25

26 súwasa toómbá kwénowana Ísu péréti maisoréna ÁánútumpaꞋa súwi séna topámbai kwená kwayó-kwáásí tímatuwena séna mindá kesúman-ivo maimái naaró séna 27 ándá-aran-dombo kwáyon-anaveumba maisoréna ÁánútumpaꞋa súwi séna tiména séna amáparawai naaró. 28 mindá kesí naaemán-iye. kesí naaemá sáwívarawaiyavena kumínímba póna Áánútu sáwí-imayaa maitiyuwéna séna kesé tarúmai máyáawe séna mináúná-áímbá simái tarúmakaiye. 29 simátimeꞋa séꞋa ókwaraꞋa ándá-aran-domba íma nánaumpo kesivo kwená kwaásimo kwégawaaipaꞋa kesé ménaaomba ándá-aran-domba aúná-nomba nánaumne Ísu súwasa 30 Áánútuntavesa ísámai monor-ímá simásuwesa mindáúmpáꞋá tuwésa Óríve-omapaꞋa iráawe.

Pítaa ánaaemba umásinkaniye siráin-kwasai.

Mááka 14:27-31, Árúku 22:31-34, Yóni 13:36-38

31 Óríve-omapaꞋa umáyówana Ísu simátimena séna Áánútun-aai aúváívimba agaimaréna séna Áánútu séna

sipisípiraꞋo kawááiwaimba tuvúwónana puwínasa
sipisípiyomba kóyáwé ónááowe Áánútu siráiye

siráimba póna ívéꞋ-noꞋwaamba tááꞋa káínaꞋa siyuwéꞋa kóyáwé ónááowe. 32 ánivo púwónasa utamásinkaiyaꞋa usásineꞋa kentí aivaꞋá Káríri-ayampaꞋa konaꞋá kesínaaemba kónááowe Ísu súwana 33 Pítaa séna amáparawai auwésa kóyáwé íyambanivo kemá íma mirá ónaumne súwana 34 Ísu séna áraiꞋa simámeꞋa séꞋa ívéꞋ-noꞋwaamba kokórigo íma áái siráindaraꞋa emá kaumboráꞋá kentáváí se íma awánáúnda-kwaasiye síníyone Ísu Pítaantavena súwana 35 Pítaa séna entémo sínkamonae íyaꞋo éꞋa íma auwéꞋa kónaumne súwasa kwená kwayó-kwáásí amápaꞋa mirá simásaraawe.

Ísu KétésémanivaꞋa námúnaa siráin-kwasai.

Mááka 14:32-42, Árúku 22:39-46

36 amápaꞋa mirá simásuwesa Ísuwe kwená kwayó-kwáásíyé taai-kanáágúnéyómbá áwíꞋá KétésémanivaꞋa komésa Ísu simátimena séna mankáꞋá máyaiyaꞋa ÁánútumpaꞋa námúnaa kosénaumne séna 37 Pítaawe Sépéti ááninkaiye tíꞋmaena komáyowana umbai-yántáákómá arumbá sáwíꞋa kwéuwana 38 simátimena séna kesirunkómá umbaiyé taisaꞋá póꞋa puwóraꞋnaraamba umái máyaumne. maankáꞋá méꞋa kesé kárákwimai máéro séna 39 tiyuwéna egwaaꞋá kwéna Áánútu anóndaꞋan-iye séna maraꞋá kumbaéna námúnaavinkemba séna kesivoó emó kanaán-iye sémo e maanúmbáí-yántááꞋó kesópaꞋo tínímba maisiyuwéma ánivo kesí imáyáa íma kwarénaꞋa ená imáyáa kwáráano Ísu siráiye.

40 Ísu námúnaa simásuwena kwená kwayó-kwáásíráútópaꞋa téna tayuwánómba tuún-kwaigurówana tayúsena Pítaantavena séna íma kanaaráꞋá sáwíyankaꞋa kesé kárákwimai máyáane. 41 Sáátáánigo tísaa umai isánáe-aimba kentópaꞋa síyáváínivo ÁánútumpaꞋa námúnaa seró. imáyáago kató isaná áúgomo umbaimó taimbá mindá áúgávaaꞋa kwéiye simásuwena 42 moórágwaraꞋa tiyuwéna egwaaꞋá kwéna ÁánútumpaꞋa námúnaavinkemba séna minúmbáí-yántááꞋá enópaꞋa úwoi tíníyemo sinaꞋó éꞋa emó sindantembá mirá ónaumne siráiye.

43 Ísu námúnaa kosimásuwena kwená kwayó-kwáásíráútópaꞋa téna tayuwánómba tuún-kwaigurésa túgávaate kwéuwana 44 moórágwaraꞋa tiyuwéna egwaaꞋá kwéna kéꞋnaamba námúnaa kosimásuwena koyauweréna 45 minkáúmbónárauyavena séna tuúmó kwaiguréꞋo máyáamba kemá kwaási úrandakomba sáwíꞋo kwéon-kwaasiraꞋa agaráátinkainasa tátoranaaon-kanaa kwétivo 46 usásinewata kwétiyapata konó. kembó agaráátinkaniwai kwétiye Ísu siráiye.

Ísumba tátokaan-kwasai.

Mááka 14:43-50, Árúku 22:47-53, Yóni 18:3-12

47 Ísu mináímbá kwésuwana kwená kwayó-kwáásí sísamaivakemba kaeꞋá kumbaimái-kwaasivinkemba moóráwai áwíꞋa Yútási túmba kwesé sáwíva-kwaasi taánasatagwara ánáyatankwaraꞋa maimaésa tumbá mono-káwáá-kwáásíyé Yútaa-anon-kwaasiye miwímá tiꞋmárówasa tumbá 48 ááéma Yútási Ísumbo agaráátinkaintavena simátimena séna paruvará umánkáandawaimba tátoraaro siráimba 49 póna Yútási ÍsunopaꞋa téna séna anóndakoo máyaano kwésena paruvará kwéumankowana 50 Ísu séna kesí kwaásiyo ónáe sindáíꞋa uwó súwasa kwesémo tuwáí Ísumba tátórówana 51 Ísuna kwayó-kwáásívínkémbá moóráwai taánasatama ámúrandavinkemba taúꞋmaena aivaꞋ-mónó-káwáánákóná kwayó-kwáásígó ááꞋa agáúsuwowana 52 Ísu kwentávéna séna ená taánasatama ámúrandavimba kwiyuwó. taánasataneimo tínkamiyan-kwaasi anondámo ésa taánasatanei tínkamiyasa puwónááowe. 53 maaráyávéꞋa imáyáa oró. kesivontávéꞋo séꞋo súwaꞋnaa uwómó senanamó éna kwíyómpaken-kwayoꞋnarawaꞋa sáwívarawai íma kanaán-umai táámpanaaowai avekáámbá tiꞋmaráínasa súwaꞋnaa ónááowe. 54 mirámó súndarakai Áánútun-aai aúváívimba agaimakáin-umbai-yantaaꞋa kesópaꞋa íma tisinó. ánivo siráintemba miráumai paáriniye Ísu siráiye.

55 Ísu mináímbá simásuwena tun-kwáásíyávéna séna kentávéꞋa umóyán-kwáásímán-iye séꞋa póꞋa taánasatagwara ánáyatankwaraꞋa maimaéꞋa kembá tátoranae séꞋa kwétewe. sáwíva-tawai anóm-bonoꞋ-naumpaꞋa kesáái kwésimatimundaraꞋa íma kembá tátokaawe. 56 naaóváꞋá Áánútun-aai simátímakowai aúváívimba agaimakáan-aimba kembó mirámó umásínkéneꞋa kwétewe súwasa kwená kwayó-kwáásí amápaꞋa inkaisésa auwésa kóyáwé uráawe.

anón-kwaasi Ísumba aaí simánkaraan-kwasai.

Mááka 14:53-65, Árúku 22:54-55, 63-71, Yóni 18:13-14, 19-24

57 kwená kwayó-kwáásí auwésa kuwasá Ísumba tátorowai áíꞋmaesa aivaꞋ-mónó-káwáánákó áwíꞋa Káyavaasina naaúmpaꞋa móankesa mindáúmpáꞋá ámáámba sun-kwáásíyé Yútaa-anon-kwaasiye torupamái máyón-daumpaꞋa móankowana 58 Pítaa tínaaemba nénkaꞋa teémáyomba aivaꞋ-mónó-káwáánákóná máápar-ontavinkemba iréna naamaúvaꞋa ména Ísun-aneꞋo paáríndamo awánáíndayavena i-kwáásíyé méraiye.

59 Pítaa máyowasa mono-káwáá-kwáásíyé Yútaa-anon-kwaasiye amáparawai Ísumba tuvuwíyana puwíní-ainkona ááimba avakáá-uwana 60 íma kwáyowasa Ísuntavesa mósi-mesi-aimba sésa íma moórá-aimba suwasaráí kae-kwáásígóráí usásinesarai 61 kampaꞋá sésarai kwemó sisatáámó isáúndaya anóm-bonoꞋ-namba Áánútuna naambá kanaán-umai tawísíyuweꞋa kaumbo-táwai maisuwéꞋa ónaumne siráiye suyaná 62 aivaꞋ-mónó-káwáánákó usásinena Ísumba áísaa ena séna mindáraimo simánkaayan-aimba anondá íya síníyono súwana 63 Ísu iséna íma aaí súwana aivaꞋ-mónó-káwáánákó séna Áánútu asirayánkwáráwáí aúrankaꞋa mé áísaa onda-áímbá árair-aine suꞋmai simásimiyo. Áánútumo usásinankaiwai Káráísiti Áánútu ááninkowaꞋonompo simásimiyo súwana 64 Ísu séna áꞋa sémpo simátimeꞋa séꞋa naaémba suwánáínaꞋa kemá kwaási úrandako Áánútu asirayáwáíná ayáánúrapaꞋa asirayán-áyámpáꞋá uméꞋa ainámpímbá kumónaumne Ísu súwana 65 aivaꞋ-mónó-káwáánákó arumbá sáwíꞋa kwéuwana kwená unáánkwátói tarátuwena séna Áánútumba akáꞋáámba simánkena kwesáváí simbá póta mináíntávéta aaivimbá mayankéta óꞋon-aimbo simánkáamba avakáá únda póta ivátá tuwéta Áánútumbo simáímo sáwíꞋo umánkáintaveta 66 nóraya ónaumno súwasa sáwíꞋan-ivo tuvuwíyana puwíno sésa 67 Ísumba tuwirááíma kwirankésa tuvuwésa tiyáándei tuvúwún-kwaasi 68 akáꞋáámba sésa esáváí se Áánútu usásisinkaiwai úne séndawai ómpo kemá nááwa kwétuvuwuna simásimiyo siráawe.

Pítaa íma awánáúnda-kwaasiye siráin-kwasai.

Mááka 14:66-72, Árúku 22:56-62, Yóni 18:15-18, 25-27

69 Pítaa naamaúvaꞋa máyowana aivaꞋ-mónó-káwáánákóná kwayór-árásígó awánéna kwenópaꞋa téna séna Káríri-ayampakewaise maéndawai óne súwana 70 Pítaa amáparawai túrankaꞋa séna emó sénda-aimba sáákoma íma kaweꞋán-iye simásuwena 71 máápar-ontavimba komáyowana óꞋomba kwayór-ínáámárúgó awánéna máyón-kwaasiyavena séna minkwáásígómá Ísu Násáreti-naopakewaiye maíwaiman-iye súwana 72 Pítaa aikaꞋá maréna séna íma awánáúnda-kwaasiman-iye simásuwena máyowasa 73 sáwíyankaꞋa máyómba PítaanopaꞋa tésa sésa Ísuna kwayó-kwáásí mirán-kwáásí máyáawata awánemayaundantenkaan-kwaasiraamba éma mináyámpákén-kwáásí tááiraamba kwésene suwaná 74 Pítaa séna kampar-áímbó kwésenanamo éna Áánútu sínkaminiye. síyawaimba íma awánáúndanaꞋan-iye kwésuwana kokórigoma áái súwana 75 Pítaa Ísumo simámun-aimba áákaꞋa maréna mirá siráinkaꞋa kokórigomo ááimo ímo siráindaraꞋa emá kaumboráꞋá kentáváí se íma awánáúnda-kwaasiman-iye síníyone siráimba mináímbá áákaꞋa maréna máápaꞋa kuména ávááraumai iviꞋá taráiye.