Amo 3 | KikGKY | STEP | Ta iguai ũhoro ũyũ Jehova aarĩtie wa kũmũũkĩrĩra, inyuĩ andũ a Isiraeli, ũira wa gũũkĩrĩra nyũmba yothe ĩrĩa ndaarutire bũrũri wa Misiri:

‏ Amos 3

Aira Gwĩtwo Marute Ũira wa Gũũkĩrĩra Isiraeli

1 Ta iguai ũhoro ũyũ Jehova aarĩtie wa kũmũũkĩrĩra, inyuĩ andũ a Isiraeli, ũira wa gũũkĩrĩra nyũmba yothe ĩrĩa ndaarutire bũrũri wa Misiri:

2 ^a“Inyuĩ no inyuĩ ndĩthuurĩire
kuuma harĩ nyũmba ciothe cia thĩ;
nĩ ũndũ ũcio nĩngamũherithia
tondũ wa mehia manyu mothe.”

3 Andũ eerĩ maahota gũtwarana atĩa
matarĩ na karĩĩko?
4 ^bMũrũũthi-rĩ, nĩũraramaga kĩhinga-inĩ
ũtarĩ kĩndũ ũnyiitĩte?
Nĩũraramaga ũrĩ kĩmamo-inĩ
ũtanyiitĩte kĩndũ?
5 Nyoni-rĩ, no ĩgwe thĩ mũtego-inĩ
hatarĩ kĩndũ gĩa kũmĩheenereria?
Mũtego-rĩ, no ũtegũke, uume thĩ
ũtagwatĩtie kĩndũ?
6 ^cKarumbeta no kahuhwo itũũra-inĩ inene,
na andũ mage gwĩtigĩra?
Mũtino no ũũke itũũra-inĩ inene,
na gũtuĩke ti Jehova ũũrehete?

7 ^dTi-itherũ Mwathani Jehova ndarĩ ũndũ angĩĩka
atamenyithĩtie anabii, ndungata ciake,
ũrĩa atuĩte gwĩka.

8 ^eMũrũũthi nĩũraramĩte,
nũũ ũtangĩĩtigĩra?
Mwathani Jehova nĩarĩtie,
nũũ ũtangĩratha maũndũ?

9 Anĩrĩrai mwĩre ciĩhitho iria nũmu cia Ashidodi,
na ciĩhitho iria nũmu cia bũrũri wa Misiri ũciĩre atĩrĩ:
“Ũnganai irĩma igũrũ cia Samaria,
mwĩonere inegene inene rĩrĩa rĩrĩ kuo,
na ũhinyanĩrĩria ũrĩa ũrĩ thĩinĩ wa andũ.”

10 ^fJehova ekuuga atĩrĩ:
“Andũ arĩa mahĩbaga indo cia gũtunyana
na indo cia ndaho kũu ciĩhitho-inĩ nũmu ciao,
matiũĩ gwĩka ũrĩa kwagĩrĩire.”
11 Nĩ ũndũ ũcio Mwathani Jehova ekuuga atĩrĩ,

“Thũ nĩĩkaharagania bũrũri;
nĩĩgatharia ciĩgitĩro cianyu cia hinya,
na ciĩhitho cianyu nũmu nĩigatahwo.”
12 Jehova ekuuga atĩrĩ:

“O ta ũrĩa mũrĩithi angĩteithũra
magũrũ meerĩ kana gacunjĩ ga gũtũ kuuma kanua ka mũrũũthi,
ũguo noguo andũ a Isiraeli makaahonokio,
acio maikaraga Samaria
maikarĩire mĩthia ya marĩrĩ mao,
o na arĩa maikarĩire itanda ciao marĩ Dameski.”
13 ^gMwathani Jehova, Ngai Mwene-Hinya-Wothe, ekuuga atĩrĩ: “Ta iguai ũhoro ũyũ, na inyuĩ mũrute ũira wa gũũkĩrĩra nyũmba ya Jakubu.

14 “Mũthenya ũrĩa ngaaherithia Isiraeli nĩ ũndũ wa mehia make-rĩ,
nĩngananga igongona cia Betheli;
na ndinie hĩa cia kĩgongona kĩu
igwe thĩ. ^{▼▼Mehia ma Isiraeli maagĩire mĩri marĩ Betheli rĩrĩa Mũthamaki Jeroboamu aathondekire ngai ya gacaũ, na akĩmĩakĩra kĩgongona kuo.}
15 ⁱNĩngatharia nyũmba ya hĩndĩ ya gathano,
o hamwe na nyũmba ya hĩndĩ ya riũa;
nyũmba iria ngʼemie na mĩguongo nĩikaanangwo,
nacio nyũmba iria nene mũno nĩikamomorwo,”
ũguo nĩguo Jehova ekuuga.