‏ Isaiah 43

Mũhonokia wa Isiraeli

1 ^aNo rĩrĩ, wee Jakubu, Jehova ũrĩa wakũũmbire,
o we ũcio watũmire ũgĩe ho,
wee Isiraeli, ekuuga atĩrĩ:
“Tiga gwĩtigĩra, nĩgũkorwo nĩ niĩ ngũkũũrĩte;
Ngwĩtĩte na rĩĩtwa rĩaku; wee ũrĩ wakwa.
2 ^bRĩrĩa ũkũgerera maaĩ-inĩ ũkĩhĩtũkĩra kuo-rĩ,
ndĩrĩkoragwo hamwe nawe;
o na rĩrĩa ũkũringa njũũĩ-rĩ, itigagũtwara.
Rĩrĩa ũkũgerera mwaki-inĩ-rĩ, ndũgaagũcina;
ndũkarĩrĩmbũkĩrwo nĩ rũrĩrĩmbĩ rwaguo.
3 ^cNĩgũkorwo nĩ niĩ Jehova, Ngai waku,
o we Ũrĩa Mũtheru wa Isiraeli, Mũhonokia waku;
nĩheanĩte bũrũri wa Misiri ũtuĩke kĩndũ gĩa gũgũkũũra,
nakuo Kushi na Seba ngakũheana ithenya rĩaku.
4Tondũ wee ũrĩ wa goro mũno, na ũgatĩĩka maitho-inĩ makwa,
na tondũ nĩngwendete-rĩ,
nĩnganeana andũ nĩ ũndũ waku,
na neane ndũrĩrĩ nĩ ũndũ wa muoyo waku.
5 ^dTiga gwĩtigĩra, nĩgũkorwo ndĩ hamwe nawe;
nĩngakũrehere ciana ciaku kuuma mwena wa irathĩro,
na ngũcookanĩrĩrie kuuma mwena wa ithũĩro.
6 ^eNĩngeera mwena wa gathigathini atĩrĩ, ‘Marekererie!’
na njĩĩre mwena wa gũthini atĩrĩ, ‘Tiga kũmagirĩrĩria.’
Ariũ akwa marehei moime kũndũ kũraya,
o nao airĩtu akwa marehei moime ituri-inĩ ciothe cia thĩ:
7 ^farĩa othe metanĩtio na rĩĩtwa rĩakwa,
o acio ndoombire nĩgeetha riiri wakwa wonekage,
acio ndoombire, o acio wĩra wa moko makwa.”

8 ^gTongoriai andũ arĩa marĩ na maitho, no nĩ atumumu,
na andũ arĩa marĩ na matũ, no matiiguaga.
9 ^hAndũ a ndũrĩrĩ ciothe nĩmonganĩte hamwe,
nao andũ a mabũrũri makagomana.
Nĩ mũndũ ũrĩkũ wao warathire ũhoro ũyũ,
na agĩtwĩra maũndũ marĩa maarĩ ma tene?
Nĩmarehe aira ao moonanie atĩ ũhoro ũcio wao warĩ wa ma,
nĩguo andũ maũigua moige atĩrĩ, “Ũhoro ũcio nĩ wa ma.”
10 ⁱ“Inyuĩ nĩ inyuĩ aira akwa,” ũguo nĩguo Jehova ekuuga.
“O na nĩ inyuĩ ndungata ciakwa iria thuurĩte
nĩgeetha mũmenye, na mũnjĩtĩkie,
na mũmenye atĩ niĩ nĩ niĩ ũrĩa we.
Mbere yakwa gũtirĩ ũngĩ wombĩtwo,
na gũtikagĩa ũngĩ thuutha wakwa.
11Niĩ-rĩ, o niĩ nĩ niĩ Jehova,
na gũtirĩ mũhonokia ũngĩ tiga niĩ.
12 ^jNiĩ-rĩ, nĩnguũranĩirie ũhoro, na ngahonokania, na ngoimbũra:
Niĩ mwene, na ti ngai ngʼeni ĩrĩ thĩinĩ wanyu.
Tondũ ũcio, inyuĩ nĩ inyuĩ aira akwa atĩ niĩ nĩ niĩ Mũrungu,” ũguo nĩguo Jehova ekuuga.
13 ^k“Ĩĩ, ti-itherũ, kuuma matukũ ma tene, niĩ nĩ niĩ ũrĩa we.
Gũtirĩ mũndũ o na ũ ũngĩhota kũhonokia mũndũ kuuma guoko-inĩ gwakwa.
Rĩrĩa ndeka ũndũ-rĩ, nũũ ũngĩhota kũũgarũra?”

Tha cia Ngai, na Kwaga Wĩhokeku kwa Isiraeli

14 ^lJehova, Mũhonokia wanyu,
o Ũrĩa Mũtheru wa Isiraeli, ekuuga atĩrĩ,
“Nĩngatũma mbũtũ ya ita yũkĩrĩre Babuloni nĩ ũndũ wanyu,
na ndehe andũ othe a Babuloni marĩ mĩgwate,
maikũrũkĩtio na marikabu iria makenagio nĩcio.
15Niĩ nĩ niĩ Jehova, Ũrĩa Mũtheru wanyu,
Mũũmbi wa Isiraeli, na Mũthamaki wanyu.”

16 ^mŨũ nĩguo Jehova ekuuga,
o ũcio watemire njĩra iria-inĩ,
na agĩtema gacĩra kũndũ kũrĩa kwarĩ maaĩ marĩ hinya,
17 ⁿũrĩa waguucĩrĩirie ngaari cia ita o na mbarathi,
na mbũtũ cia ita, hamwe na anene a cio,
nao magĩkoma hau na maticooke kwarahũka rĩngĩ,
makĩhora biũ ta rũtambĩ rũhoretio.
18“Tigai kũririkana maũndũ marĩa mahĩtũkĩte;
o na tigai gwĩcũũrania maũndũ marĩa ma tene.
19 ^oAtĩrĩrĩ, nĩngwĩka ũndũ mwerũ!
Rĩu no hĩndĩ ũraakunũka; kaĩ inyuĩ mũtaraũmenya?
Ngwĩka atĩrĩ, nĩngũtema njĩra werũ-inĩ,
nakuo rũngʼũrĩ-inĩ ndũme gũtherũke tũrũũĩ.
20Nyamũ cia gĩthaka, ta mbwe na ndundu,
nĩciiheaga gĩtĩĩo,
tondũ nĩ niĩ heanaga maaĩ werũ-inĩ
o na rũngʼũrĩ-inĩ,
ngatũma kũgĩe na tũrũũĩ twa kũnyuuagwo nĩ andũ akwa,
andũ arĩa niĩ thuurĩte,
21 ^pandũ arĩa ndeyũmbĩire,
nĩguo mahunjagie ũhoro wa ũgooci wakwa.

22“No rĩrĩ, wee Jakubu ndũrĩ wangaĩra,
nawe Isiraeli-rĩ, nĩkũnogio ũnogetio nĩ niĩ.
23 ^qInyuĩ mũtindeheire ngʼondu cia maruta ma njino,
kana mũkandĩĩithia na magongona manyu.
Ndimũhatĩrĩirie na magongona ma mũtu,
kana ngamũnogia na kũmwĩtia ũbumba.
24 ^rMũtirĩ mwangũrĩra ũbumba ũrĩa ũrĩ mũtararĩko mwega,
o na kana mũkandutĩra maguta ma magongona manyu.
No rĩrĩ, mehia manyu nĩmanditũhĩire
na mũkaanogia na mawaganu manyu.

25 ^s“Niĩ, o niĩ mwene, nĩ niĩ tharagia mahĩtia maku, mathire biũ,
nĩ ũndũ wakwa Niĩ mwene,
na ngaaga kũririkana mehia manyu rĩngĩ.
26 ^tTa ndirikaniai maũndũ marĩa mahĩtũkĩte,
na mũreke tũmaarĩrĩrie tũrĩ hamwe;
ningĩ mũciire muonanie atĩ mũtiĩhĩtie.
27 ^uIthe wanyu wa mbere nĩehirie;
nao andũ arĩa maaragia ithenya rĩanyu makĩĩnemera.
28 ^vNĩ ũndũ ũcio-rĩ, nĩngaconorithia anene a hekarũ yanyu,
na ndũme Jakubu anangĩke,
o nake Isiraeli atuĩke wa kũnyararwo.