‏ Psalms 44

1 ^aTwanaigua na matũ maitũ Wee Ngai,
tũkĩĩrwo nĩ maithe maitũ
ũrĩa wekire matukũ-inĩ mao,
o matukũ macio ma tene.
2 ^bNĩwaingatire ndũrĩrĩ na guoko gwaku,
na ũgĩcooka kũhaanda maithe maitũ kuo;
Wee nĩwanyariirire irĩndĩ iria ingĩ,
na ũgĩtũma maithe maitũ magaacĩre.
3 ^cMatiegwatĩire bũrũri ũcio na hinya wa rũhiũ rwao,
o na ti icoka ciao ciamaheire ũhootani;
no nĩ guoko gwaku kwa ũrĩo, ĩĩ nĩ gĩcoka gĩaku,
na ũtheri wa gĩthiithi gĩaku, nĩgũkorwo nĩwamendete.

4Wee nĩwe Mũthamaki wakwa na Ngai wakwa,
ũrĩa wathagĩrĩra Jakubu ũhootani.
5 ^dWee nĩwe ũtũhotithagia kũhoota thũ ciitũ;
nĩ ũndũ wa rĩĩtwa rĩaku tũrangagĩrĩria arĩa marĩ muku na ithuĩ.
6 ^eNdiĩhokaga ũta wakwa,
rũhiũ rwakwa rwa njora ti ruo rũngĩĩhootanĩra;
7 ^fno Wee nĩwe ũtũtooranagĩria harĩ thũ ciitũ,
ũgagĩconorithia acio matũthũire.
8Ngai nĩwe tũtindaga tũkĩĩrahĩra mũthenya wothe,
na tũgũtũũra tũgoocaga rĩĩtwa rĩaku nginya tene.

9 ^gNo rĩu nĩũtũtiganĩirie na ũgatũconorithia;
nĩũtigĩte gũtwaranaga na mbũtũ ciitũ cia ita.
10 ^hNĩwatũmire tũũrĩre thũ ciitũ,
o icio itũthũire igetahĩra indo ciitũ.
11Ũtũrekereirie tũtambuurwo ta ngʼondu,
na ũgatũhurunja harĩ ndũrĩrĩ.
12 ⁱWendetie andũ aku ta kĩndũ tũhũ,
ndũrĩ uumithio wonete nĩ ũguo ũmendetie.

13 ^jNĩũtũmĩte tũmenwo nĩ andũ arĩa tũhakanĩte nao,
tũgatuĩka a kũnyararwo na gũthekererwo nĩ arĩa matũthiũrũrũkĩirie.
14Nĩũtũmĩte tũtuĩke a kuunagwo thimo nĩ ndũrĩrĩ;
tũgagĩtuĩka a kũinainagĩrio mĩtwe nĩ andũ.
15 ^kNdindaga njonokete mũthenya wothe,
ngahumbwo nĩ thoni ũthiũ wothe,
16 ^lnĩ ũndũ wa inyũrũri cia andũ arĩa maanyũrũragia na makaanuma,
tondũ wa thũ ĩrĩa ĩrenda kwĩrĩhĩria.

17 ^mTwakorirwo nĩ maũndũ macio mothe,
o na gũtuĩka tũtiariganĩirwo nĩwe,
o na kana tũgĩthaahia kĩrĩkanĩro gĩaku.
18Ngoro ciitũ iticookete na thuutha;
makinya maitũ matiumĩte njĩra-inĩ yaku.
19 ⁿNo ũtũhehenjete, na ũgatũtua imamo cia mbwe,
na ũgatũhumbĩra na nduma nene.

20 ^oTũngĩkorwo nĩtwariganĩirwo nĩ rĩĩtwa rĩa Ngai witũ,
o na kana tũkĩambararia moko kũrĩ ngai ngʼeni-rĩ,
21githĩ Ngai ndangĩamenyire ũhoro ũcio,
kuona atĩ nĩamenyaga hitho cia ngoro?
22 ^pNo nĩ ũndũ waku tũtindaga tũngʼetheire gĩkuũ mũthenya wothe;
tũtuĩtwo ta ngʼondu cia gũthĩnjwo.

23 ^qWee Mwathani, arahũka! Ũgĩkomete nĩkĩ?
Wĩyarahũre! Ndũgatũtiganĩrie nginya tene.
24 ^rŨhithĩte ũthiũ waku nĩkĩ,
na ũkariganĩrwo nĩ mathĩĩna maitũ na kũhinyĩrĩrio gwitũ?

25 ^sTũrũndĩtwo rũkũngũ-inĩ;
mĩĩrĩ iitũ ĩkĩnyiitanĩte na thĩ.
26 ^tArahũka ũtũteithie;
tũkũũre tondũ wa wendani waku ũtathiraga.