‏ Psalms 77

Kũririkana Ciĩko cia Ngai cia Hinya

Thaburi ya Asafu

1 ^aNdakaĩire Ngai andeithie;
ndakaĩire Ngai nĩguo anjigue.
2 ^bRĩrĩa ndaarĩ mĩnyamaro-inĩ, nĩ Mwathani ndarongoririe;
ũtukũ ndamwambararĩirie moko itekũnoga,
no muoyo wakwa ũkĩrega kũhoorerio.

3 ^cWee Ngai, ndakũririkanire ngĩcaaya;
ndataranirie maũndũ, naguo roho wakwa ũkĩringĩka.
4Wee watũmire njũrwo nĩ toro,
ngĩthĩĩnĩka mũno, ngĩremwo nĩ kwaria.
5 ^dNdeciiririe ũhoro wa matukũ ma tene,
ngĩririkana mĩaka o ĩrĩa yarĩ ya tene;
6ngĩkĩĩririkania ũrĩa ndainaga ũtukũ,
ngoro yakwa ĩgĩtarania maũndũ,
naguo roho wakwa ũkĩyũũria atĩrĩ:

7 ^e“Mwathani egũtũũra atũregete nginya tene?
Ndarĩ hĩndĩ agacooka gũtũkenera?
8 ^fWendo wake ũtathiraga-rĩ, nĩkũbuĩria ũbuĩrĩtie nginya tene?
Kĩĩranĩro gĩake gĩgũtũũra gĩtahingĩte nginya tene?
9 ^gKaĩ Mũrungu ariganĩirwo nĩkũiguanĩra tha?
Kaĩ marakara make matũmĩte atige gũtugana?”

10Ngĩcooka ngĩĩciiria atĩrĩ, “Ũndũ ũyũ nĩguo ngwĩtiiria naguo:
kũririkana mĩaka ya guoko kwa ũrĩo kwa Ũrĩa-ũrĩ-Igũrũ-Mũno.”
11 ^hNĩngũririkana ciĩko cia Jehova;
ĩĩ nĩguo, nĩngũririkana ciama ciaku cia tene.
12 ⁱNdĩrĩtaranagia mawĩra maku mothe,
na ngecũũrania ũhoro wa ciĩko ciaku cia hinya.

13 ^jNjĩra ciaku, Wee Ngai, nĩ theru.
Nĩ ngai ĩrĩkũ nene ta Ngai witũ?
14Wee nĩwe Mũrungu ũrĩa ũringaga ciama;
wonanagia ũhoti waku kũrĩ ndũrĩrĩ.
15 ^kNĩwakũũrire andũ aku na guoko gwaku kwa hinya,
o acio njiaro cia Jakubu na Jusufu.

16 ^lMaaĩ nĩmakuonire, Wee Ngai,
maaĩ macio maakuonire makĩigua guoya,
nakuo kũrĩa kũriku mũno gũkĩĩnyogonda.
17 ^mMatu mooiririe mbura,
nacio ngwa ikĩruruma igũrũ guothe;
heni ciahenũkire ikĩrathũka mĩena yothe
18Ngwa yaku yaiguĩkanire kĩhuhũkanio-inĩ,
rũheni rwaku rũkĩmũrĩka thĩ yothe,
nayo thĩ ĩkĩinaina na ĩgĩthingitha.
19 ⁿNjĩra yaku yatuĩkanĩirie iria-inĩ,
njĩra yaku ĩgĩtuĩkanĩria maaĩ-inĩ maingĩ,
o na gũtuĩka makinya maku mationekire.

20 ^oWatongoririe andũ aku o ta ũrĩa mũrĩithi atongoragia rũũru,
ũkĩmatongoria na guoko kwa Musa na kwa Harũni.