Zechariah 10
Jehova Nĩakamenyerera Juda
1 aHooyai Jehova oirie mbura hĩndĩ ya kĩmera kĩa mbere;Jehova nĩwe ũtũmaga kũgĩe matu ma mbura ya kĩhuhũkanio.
Nĩoiragĩria andũ mbura,
na akahe mũndũ o wothe irio cia mũgũnda.
2 bMĩhianano ya kũhooywo yaragia maheeni,
ago moonaga cioneki itarĩ cia ma,
maaragia ũhoro wa irooto itarĩ cia ma;
kũhoorerania kwao no gwa tũhũ.
Nĩ ũndũ ũcio andũ maturuuraga ta ngʼondu,
makahinyĩrĩrĩka nĩ ũndũ wa kwaga mũrĩithi.
3 c“Marakara makwa nĩmakanĩte nĩ ũndũ wa arĩithi,
na niĩ nĩngaherithia atongoria acio;
nĩgũkorwo Jehova Mwene-Hinya-Wothe nĩakamenyerera
rũũru rwake, nĩruo andũ a nyũmba ya Juda,
na atũme matuĩke ta mbarathi ĩgwĩtĩĩa ĩrĩ mbaara-inĩ.
4 dThĩinĩ wa Juda nĩgũkoima ũrĩa ũgaatuĩka ihiga rĩa koine,
na kuuma kũrĩ we kuume higĩ cia kwamba hema,
ningĩ kuume ũta wa mbaara,
o na kuume mũndũ o wothe wa gwathana.
5 eMarĩ hamwe magaatuĩka ta njamba cia ita irĩ hinya,
marangĩrĩrie thũ ciao ndoro-inĩ ya njĩra hĩndĩ ya mbaara.
Tondũ Jehova agaakorwo hamwe nao,
makaarũa na mangʼaũranie ahaici a mbarathi.
6 f“Nĩngekĩra nyũmba ya Juda hinya,
na honokie nyũmba ya Jusufu.
Nĩngamacookia kwao,
tondũ nĩndĩmaiguĩrĩire tha.
Nao magaikara ta itarĩ ndaamarega,
nĩgũkorwo niĩ nĩ niĩ Jehova Ngai wao,
na nĩngamacookeria mahooya mao.
7Andũ a Efiraimu magaatuĩka ta njamba cia ita,
nacio ngoro ciao icanjamũke ta andũ manyuĩte ndibei.
Ciana ciao nĩikoona ũndũ ũcio ikene;
nacio ngoro ciao nĩigakenera Jehova.
8 gNĩngameta ndĩmacookanĩrĩrie.
Ti-itherũ nĩngamakũũra;
nao nĩmakaingĩha o ta ũrĩa maarĩ mbere.
9 hO na ingĩkamaharaganĩria ndũrĩrĩ-inĩ,
marĩ o kũu mabũrũri ma kũraya no makaandirikana.
O, hamwe na ciana ciao nĩmakahonoka
na macooke kwao.
10 iNĩngamacookia kuuma Misiri,
na ndĩmacookanĩrĩrie kuuma Ashuri.
Nĩngamarehe bũrũri wa Gileadi na wa Lebanoni,
o nginya mage ũikaro ũngĩmaigana.
11 jMagaatuĩkanĩria iria rĩa thĩĩna;
makũmbĩ ma iria nĩmakahoorerio,
nakuo kũrĩa Rũũĩ rwa Nili rũrikĩte nĩgũkahũa.
Mwĩtĩĩo wa Ashuri nĩũkaharũrũkio,
nayo thimbũ ya ũthamaki wa Misiri nĩĩkeherio.
12 kNĩngamekĩra hinya ndĩmomĩrĩrie thĩinĩ wa Jehova,
na thĩinĩ wa rĩĩtwa rĩake nĩmagetwara,”
ũguo nĩguo Jehova ekuuga.
Copyright information for
KikGKY