1 Corinthians 1

Ira Ungene Veha Ka Polo

1Leta iahi mu sipa mehana ka ara Polo ia neke faeteau no ta mala meha kaike mane nonomohona ka Kraes Zisas ka ia lao nanafa God nia sipana ka Sositeneisi ia taremehada noni ta va hohoghona, e ghua.

2Ghai palu na kakangava vanani age ia kiloau ka God aiamu Koriniti, ka heiri neke va beanario ka ia parekete taremehana Kraes Zisas nia neto ke kudoriro God ta mala nona noni beanana taghonai, varighara taremehadira ira leghu noni nga hae ghe hae ghu ira ta va totoana lao ka ia noda Lod Zisas Kraes, ia Lod ka maneri nia ghita, e ghua.

3Ara na tarai fangai God ia noda Mama nia ia Lod Zisas Kraes e vanamu ghu ia varisute ta va meha kakatoi nia bule.

Polo Ne Helahela Ghini God

4Ara na kudo vehai tudu ma God ia ta va totoana ghini ara ghini ghauna ghau, vununa ka ia nona varisute ne veha ghu manei ka ghau, vununa ghau no parekete taremehana Kraes Zisas. 5Nia ka ianimu lamu noke meha taghotagho fuluduna ghau ka vahina leghutau nga taremehadi ira leghu nomu ghaghahedi tuturi nga nia avoavoho nga e ghua, mala va fafahakina ia nona nonomoho God. 6Iahi ne va podoli ta hohoghonana ia nonomoho nake turi vanamuo ghai ghinina Kraes. 7Ghau mu to kuru ghau ghu leghu kaikadolo nga ka ia Tarunga ta Maduana, ka ia au afa kuhana ghinina ia leghu meha ka ia noda Lod Zisas Kraes. 8Manei e age va gigima ghau ma e dufu ghu ka ia va nonoghana, mala oka age tapata la ghu ka keha mukora ka ia ravata leghu mehana ia noda Lod Zisas Kraes. 9God mu e hohoghona, nia manei lamu neke kudo ghauno ghau mala parekete taremehanana ia noda Lod Zisas Kraes ia Tuuna.

Ira Fota Ka Giliona Ia Kiloau

10Ghau taremehagu noni kiloau, ara na fanga ghau ka ia babaolona ia noda Lod Zisas Kraes, ta mala vari veha ghidira ira heve ta kaheri ghau, e mala age deo ghu ia varifotai ka vari hoataimu ghau. Nga ghau o toraina kamoto, vari pareketena ka kaike ghaghahena ngangana mo nia ka kaike va fafahaka mo, e ghua. 11Ghau taremehagu noni kiloau, kehara ka ia suga Koloe dito ke va kahe ghinagu ta auna ira vari hahala ka vari hoataimu ghau. 12Ta kahei ini ara mu ne ghua iahi: kehara ka ghau no kaheina mu, “ghai mu a leghui Polo,” no ghua, kehara tuna gedi kahei ghu, “ghai mu na leghui Apolosi,” ba “ghai mu na leghui Pita,” go ghua ghu no ghua, nia keharani tuna gedi kahei ghu, “ghai mu na leghui Kraes,” gedi ghua haro ghu, di ghua.

13Kraes mu to age fotai ka sopai pukudi. ?Heve, ara Polo mu dike tupila ghinaguna ka ia hekefalahata vanamuna ghau? ?Ghau mu noke seselebeana ka babaologu ini ara? 14Ara na kudo vehai God nake deona ga seselebeani ghu hei ka ghau, nga Kirisipasi ghe Gaeasi lama. 15E deo ghu hei ta boka kaheina mu, noke seselebeana ka babaologu ini ara, ta ghuana. 16(Uve, ara nake seselebeani molamo Setefanasi nia ira ta au ka ia butubutu manei e ghua, nga e deo keharani na ngana fatarira nake seselebeanarira ara.) 17Ara na kudo vehai God nake deona ga seselebeani ghu hei ka ghau vununa Kraes neke deo ge tuhu mehau ghu ara ta mala meha rivai seselebeanana, nga mala meha tuturi beana ghini ia Nonomoho Ta Veha mo. Nia ara e deo ga boka turi ghini kave ghu ia Nonomoho ta Veha ka ira ngengene avoavoho noni, ghatu e age va deo lighoronai ia mana ka ia hekefalahata.

Kraes Mu Ia Avoavoho Nia Ia Mana Ka God

18Ia nonomohona ia hekefalahata mu ne kingo edi ghua ghini heiri ira ta leghui ia hangana ta ghahe vai lao ka ia vavahagala ta toghunai; nga ka ghita ta hio va doli ghita God mu, iahi mu ia mana ka God, da ghua. 19Vununa taghe ia ta kahei la ka ira Kakangava Ta Maduana,
“Ara age va deo lighoronari ghatu ira avoavoho ka heiri di avoavoho taghodi ira ta ghua
nia hio kai tadi ira kenudi avoavoho ka ira ta avoavoho fuludu.” ▼

▼1:19 Aesaea 29:14

20?Hae ghu mu iahi ta nakai laorira ira ta avoavoho, ira ta avoho fikifokori ira Kakangava ta Maduana, nia ira nonidi ka malau iahi peka ta puina avohoa ghini ia rivai turi, e ghua? God neto ke va podoli ta kingona ira avoavoho ka malau iahi peka. 21Vununa God ka ia avoavoho taghona e deo geke va malumuri ghu ira noni ka malau iahi peka ta mala rivana ia avoavoho ka maneri mala hio avoavoho ghinina taghonai God. Nga God neke veha vanani ta mala hio va dolirira heiri ira ta va hohoghonai ia nonomoho ta tuturi beana ghini ghai, ne kingo ia ta ghua ghini ira noni ka malau iahi peka. 22Ira noni Ziu mu edi toraina fanga hahaimadi va ghila nia ira noni taka Ziu ghu gedi hadu avoavoho ghu, edi ghua, 23nga ghita mu da tuturi beana ghini ia tupila ghini Kraes ka ia hekefalahata, ia nonomoho ta deo ge veha vanadi ghu ira Ziu nia ne kingo ia ta ghua ghini ira noni taka Ziu ghu, e ghua. 24Nga ka ira Ziu nia ira taka Ziu ghu neto ke kudoriro God mu, Kraes mu ia mana ka God nia ia avoavoho ka God. 25Vununa ia kingo ka God mu, e avoavoho fuludu laoi ia avoavoho ka noni, nia ia paeke ka God ge gigima fuludu laoi ghu ia gigima ka noni, e ghua.

26Ghau taremehagu noni kiloau, oke ngana laoina taghe heve noke ghua ghau ka ia kudo ghau God. Ka ira hibadi ira noni mu, e deo ge tehi ghu ka ghau dike avoavohora, e deo ge tehi ghu dike manefaara, nia e deo ge tehi ghu dike doli ginitaura, e ghua. 27Ghe God neke faeteri heiri ira ta kingo ta ghua ghidi ira noni ka malau iahi peka, mala va haghavarira ira noni ta avoavoho, nia God neke faeteri heiri ira ta deo ta avohina ira ta ghua ghidi ka malau iahi peka mala va haghavarira ira ta avoavoho, ira ta ghua ghidi taghodi. 28Manei neke faeteri heiri ira ta fini va hinaeri ka malau iahi peka nia heiri ira ta hakohako ghidi ira noni, nia heiri ira ta deo lighorodi ira ta ghua ghidi, mala va deorira heve ne tongovona ira ta ghua ghidi ira noni ka malau iahi peka, 29e mala deo ghu hei ta va varavarangana ka kenuna manei.

30Vununa ka God, no au parekete ghu ghau ka Kraes Zisas. Kraes neke va podolo vanada ia avoavoho ka God. Manei neke nai va lotoro ghita ka ia nahalina God, nia neke toka ghini ghita ta mala leghuina ia hangana ta lotoro e ghua. Nia manei neke va kalasa ghita ka ira sasakeda. 31Ianimu la ghe ne kahe ghua nga iahi ka ira Kakangava Ta Maduana:
“Agho noto kabai hadu varanga la,
o hadu varanga ghini ma heve ia ta riva ghini ia Lod lama,” ▼

▼1:31 Zeremaea 9:24

ne ghua nga.