1 Corinthians 11

1Ghau geala o seseluau ara, taghe ta seseluini la ara Kraes.

Heve Ta Mala Leghuina Ka Ia Va Totoana

2Ara na helahela ghini ghau, vununa ghau no nganau tudu ma ka vahina leghutau nga, nia no leghuri ira vari va kakahei nake vanamuro ara, e ghua. 3Ghatunaina mu ara na kabai ghini ghau ta ngana avohina iahi; Kraes mu ta paudira leghu mane nga, nia ia mane ge pauna ghu ia fotati, nia God ge pauna ghu Kraes, e ghua. 4Hei mane ta toufina ia pauna ka ia fafata verevere manei, ba ka ia kahe kavei manei ia nonomoho neke hioio ka God mu, e deo ge va vonavonai ghu Kraes ia pauna manei. 5Nia hei fotati ia taka toufi ghu ia pauna ka ia fafata ta verevere manei, ba ka ia kahe kavei manei ia nonomoho neke hioio ka God mu, e deo ge va vonavonai ghu ia mane ta pauna manei- vununa iahi mu e varifata ma ka neto sengei la manei ia pauna. 6Kaike fotati neto deo la ge toufi ghu ia pauna, manei geala e koto kairi kalanari; ghe vununa e hahaghavana ka kaike fotati ta kotorira kalanari, ba ta sengeina ia pauna, manei geala e toufi ia pauna. 7Ia mane mu geala eka toufi ghu ia pauna, vununa manei mu ia hihilina God ia ta va podolo kavei ia varanga ka manei; nga fotati mu, e va podolo kavei ia varanga ka mane. 8Vununa mane mu eka la meha mo ka fotati, nga fotati mo neke la mehana ka mane; 9God e deo geke va vuhai ghu ia mane malanana ia fotati, nga fotati mo neke va vuhaina manei malanana ia mane. 10Vununa ka va fafahaka iahi, nia vununa ka ira engizeli ta mato e ghua, ia fotati mu geala e toufi ia pauna, mala taghe kaike va ghilaghilana ia fotati ta auna manei ka pekana ia mana ia keranau.

11Geta ghua mo ianimu ghe, ka ia doli ta au vari parekete taremehana ghita ia Lod mu, ia mane e va ghighiu ka ia fotati nia ia fotati ge va ghighiu ghu ka ia mane, e ghua. 12Vununa taghe fotati la neke mehao ka mane e ghua, mane molamo e uraha ghu ka fotati. Nga mane nia fotati nia vahina leghutau nga mu sipadi meha ka God.

13?Heve mu nganganamuna ghau ka iahi?: ?E totonu mo ka kaike fotati ta verevere laona ka God ka ia ta deo ge toufi ghu manei ia pauna? 14Ia a’auna ia leghutau mu, ne va kahe ghinighona agho neto nai va soduri la ira kalana mane, ne va haghavi taghona, ta ghuana. 15Nga ia va sodu kala ka ia fotati mu kaike varanga ka manei. Vununa ia kala ta sodu mu taghe ne vanani manei kaike totoufu, e ghua. 16Ghe hei neto kabai varituufuai ghini la iahi, ta toraina kaheina ara mu, ghai nia ira keha leghu kiloau nga ka God mu, e deo ghai keha ghaghahedirani ta mala leghurina.

Ia Mahai Va Sasaighona Ka Ia Lod

17Ka vari va kakahei ta kabai va kahe ghini ghau irahi ara ghatunaina, ara e deo ga boka ungene va vonavona ghau ghu, vununa ka ira haedu ghau mu, ia muko mo ne fuludu laoina ia veha. 18Va kenunana mu, ka ia meha varighara taghe kaike kiloau ta ghua ghau, ara na nomohi ta auna ia varifotai ka vari hoataimu ghau. Ara na va hohoghonai mo ghu keha pelodira ka iahi. 19Hohoghona fuludu, e toraina au mamu ia varifotai ka vari hoataimu ghau mala va podolina heiri mo ka ghau di toraina au hohoghona vananina God.

20Ka ia meha varigharamu, ghau e deo go riva ghini va veha ghu ia Mahai Va Sasaighona Ka Ia Lod. 21Vununa kehara ka ghau no bobolo mala mahairira ira ghemu ghano taghomughi, deona go tufari ghu ira keha. Leleghonana mu, kehara di nodi liha, nia kehara gedi ketuhu gogosu ghu, di ghua. 22?Heve, ghau mu e deo ghau suga taghomu ta mala la mahai ketuhuna gilio? Ba ghau mu no kikipana ghini ia kiloau ka God, ka ia va haghavari heiri ira ta deori? ?Heve mu ta age kaheina ara ka ghau? ?Ara a age helahela ghini ghau ghinina iahi? !Toraina deo hohoghona!

23Vununa ara nake hioi ka taghonai ia Lod heve nake va kakahe ghini ghau no ara: Ka ia redu neke namaha seboio Zisas, manei neke hioi ia bereti, 24nia leghuna kudo vehai God, manei neke kipei, neke kahei ghu, “Iahi mu tinigu ara ta vanamu ini; o riva ghini iahi mala ngana leghuauna ara,” neke ghua. 25Taghe iala ka ia leghuna ia mahai va sasaighona, manei neke hioi ia panikeni neke kahei ghu, “Panikeni iahi mu ia foforuna varivehai ka ia busakagu; o riva ghini iahi, leleghu fafata ketuhi ghau, mala ngana leghuauna ara.” 26Vununa leleghu fafata mahaini ghau bereti iahi, nia ketuhi ghau panikeni iahi mu, ghau no tuturi ghini kave ia leme ka ia Lod, vuhai ke la meha ghu manei.

27Hei neto mahaini la ghu ia bereti, ba ketuhi la ia panikeni ka ia Lod ka ia ghaghahena ta deo ge heluhelu ghini ghu, e age hotoi muko ka ia sasake kunui ia tinina nia busakana ia Lod. 28Ianimu la ghe, ge toraina kusu mato va fafahaki nga taghonai ia noni, ghe ge mahaini nga bereti ani nia ketuhi nga panikeni ani, e ghua. 29Vununa hei neto mahai la ka ia bereti nia ketuhu la ka ia panikeni deona ge fini avohi ghu ia susugoro lao ka manei ka ia tinina ia Lod, manei e age nakaini taghonai ka pekana ia va kilasa God ka ia mahai nia ketuhu manei. 30Ianimu la ghe, no fogara nga nia paeke nga tehidira ka ghau, nia kehara gedi to leme ghu, di ghua nga.

31Nga gada mato va fafahaka ghita la taghodai, gada nai va lotorori ghu ira dolida, God e deo ge age va kilasa ghita ghu. 32Ghe ka ia fate ghita ia Lod God mu, manei ne nai va lotoro ghita, mala deona ge age va kilasa varighara ghita ghu taremehanana malau iahi peka.

33E ghua ghu, ghau taremehagu noni kiloau, o vari afai ghu ka ia meha varighara ghau ta mahaini ghu ia Mahai Va Sasaighona ka ia Lod Zisas Kraes. 34Hei ka ghau neto nona liha la, manei geala e mahai ma ka suganao, mala eka au la ghu ka pekana ia varifate God ka ia meha varighara ghau.

Nia ka ia meha ara ka ghau, ta age va totonu va veharira ara ira keha puhini.