1 Corinthians 12

Ira Kaikadolo Ka Ia Tarunga Ta Maduana

1Ghau taremehagu noni kiloau, ghatunaina mu ghidi ira notoho ka ghau ghidira ira kaikadolo ta meha ka ia Tarunga ta Maduana. Ara na kabai ghini ghau ta va fafahakina ianimu. 2Ghau no avohi mo mu, ka ia fafata noke deono nga ghau go va hohoghona ghu, maneri dike batu ghini ghau va zea mala va totoana ghidira ira nguzunguzu ta deo gedi ngengene ghu. 3Ara a va kahe ghini ghau ghu, ta deona hei ia ta ngengene ka ia Tarunga God ta age tibirinina Zisas, nia e deo hei ta boka kaheina, Zisas mu ia faghina ta ghuana, nga ka ia Tarunga Ta Maduana lama.

4Sopai kokolodi kaikadolo mu ta aura, ghe maneri haroharo mu sipadi meha ka kaike Tarunga mo. 5Nia sopai kokolodi riva mu ta aura ka ia kiloau, ghe varifata ma Lod da riva vananina ghita. 6Nia ghita mu da kuru ghita sopai kokolodi kaikadolo mala riva, ghe kaike God mo mu neke vanadira heiri haroharo kaikadolo irahi mala riva ghidira leghu kokolodi riva nga. 7Ka leghu noni nga ka hoataida ghita mu, kaike kaikadolo ka ia Tarunga ta vananina, malana ia veha ka ghita haroharo.

8Ia Tarunga e vanani kaike noni, ia kaikadolo ta mala turi ka ia avoavoho ta meha ka God; nia ka kehana ia Tarunga e vanani ia kaikadolo ta mala avohi heve ia ta deo ge avohi ghu ia keha noni. 9Ka ia keha, ia Tarunga e vanani va hohoghona ta toraina gigima nia ka kehana ia kaikadolo ta mala va veha noni ta fogara. 10Ka kehana manei e vanani ia kaikadolo mala rivai hahaima, ka kehana e vanani ia kaikadolo mala kahe kaverira ira nonomoho ta hiori ka God nia ka kehana manei e vanani ia kaikadolo mala kahe kaverina ira nonomoho ne sipa mamu ka ia Tarunga God ba deo, ta ghuana. Ka kehana manei e vanani ia kaikadolo mala ngengene ka ira sopai kokolodi ngengene nia ka kehanani e vanani ia kaikadolo mala va fafahakarira ira fafahakadi sopai kokolodi ngengene iranimu. 11Leghu irahi nga mu nona riva taghonai kakaike ia Tarunga ta Maduana, nia manei e vanani kaike noni leghuina ia nona lao nanafa taghonai.

Kaike Tini Ta Tehi Leghu Pelona Nga

12Ia tini mu e tehi ira leghu pelona nga, ghe leghu pelona irahi nga ta va kaike kamotonaina ia tini. E ghua haroma ghu ka ia tinina Kraes. Ghita haroharo mu ia tinina ghu Kraes. 13Vununa ghita haroharo mu dake seselebeana ka kaike Tarunga ta Maduana mo mala meha kaike tinina—geta noni Ziu, ba eka noni Ziu ghu, geta noni mala varituhu ghu, ba kalasada noni ghu—nia God neke vanada ghita haroharo kaike Tarunga mo ta mala auna ka dolida idi ghita.

14Geta ghua ghu ghe, ia tini mu e tehi ira leghu pelona ta haza nga, eka kaike pelona ma ghu. 15Neto kahei la ia tabalana ghahe, “Ara mu eka kaike pelona ghu ia tini, vununa ara mu eka kame ghu,” neto ghua la, manei mu e toraina kaike pelona ia tini, geta kahe ghua ghu ianimu ia ghahe. 16Nia neto kahei la ia talinga, “Ara mu eka kaike pelona ghu ia tini, vununa ara mu talinga ma, nga eka hiba ghu,” neto ghua la, manei mu e toraina kaike pelona ia tini, geta kahe ghua ghu ianimu ia talinga. 17?Geke hiba kakato la ia kamotona tini, heve e ghua manei ghe ge boka nonomoho nga? ?Nia geke talinga kakato la ia kamotona tini, heve e ghua ghe ge boka hurangi nga manei?

18Ghe God neke riva va tehiri ira leghu pelona nga ia tini, neke nakairi ghu manei ira sopai leghu pelona nga leghuina taghe neke kabai ghinio manei. 19?Geke kaike lama leghu pelodi iranimu nga, geala taghe heve e ghua mu ia tini? 20Uve, e tehi mamu ira leghu pelona nga, ghe e kaike tini ma. 21Ia hiba e deo ge boka kahei ghu ka ia kame, “!Ara e deo ga hagala ghini ghu toka nia ka agho!” ta ghuana, nia ia pau e deo ge boka kahei ghu ka ia tabalana ghahe, “!Ara e deo ga hagala ghini ghu toka nia ka agho!” ta ghuana, e ghua.

22Torai hohoghonana mu, ira keha pelona ia tini ta nodi paeke nia taka toraina fifini tongovodi ghu mu, edi toraina mala au. 23Nia ira keha pelona ia tini ta deo gedi suri kuru lighorodi ghu ka ira nganganada ghita mu, tada toraina kopuna ghidi va vehara ghita, nia ira keha pelona ia tini ta haghava ghidi gheda, gada va kaputu ghidi poko ghu ka ira hibadi noni, e ghua. 24Nga ira keha pelona ia tini ta boka va podolori ghita mu, ghita e deo gada va vona kaputu ghidi poko ghu. God mu neto ke nai varighara ghidira ira leghu pelona nga ia tini, neto ke vanadi ghu ia leghahai va vonavona ira leghu pelodi taka kuru lighorodi ghu ira ta ghua ghidi. 25Manei ne riva ghini ghua ianimu mala deona ge au ghu ia varifotai ka ia tini, nga ira leghu pelodi ta haza nga mu edi auri ma kaike va fafahaka mo mala vari kopunaina maneri. 26Neto vavahagala la kaike pelona ia tini, ira keha leghu pelona nga edi va vavahagala taremehana manei; neto va vonavonai la kaike pelona ka ia tini, ira keha leghu pelona nga edi va ghazaghaza taremehana manei.

27Ghau haroharo mu tinina Kraes; kaike ghu ka ghau mu, e kaike pelona ghu manei. 28Nia ka giliona ia kiloau mu, God neto ke sopai nakairi ira noni haroharo ka ira riva maneri:
ta kenuna ka maneri haroharo mu ira mane nonomoho,
leghudi maneri mu ira noni ta kahe kaveri ira nonomoho ta hioi maneri ka God,
va litonana ka maneri mu ira noni ta vari va kakahei,
nia meha tuna ira ta rivai hahaima,
ira ta kururi kaikadolona mana mala va veha fogara,
ira ta boka toka ghidi ira keha noni,
ira ta kururi kaikadolo mala babatu,
nia ira ta ngengene ka ira keha kokolodi ngengene haza.

29?Heve, ira leghu noni nga mu edi mane nonomoho? ?Ira leghu noni nga mu ira noni ta kahe kaveri ira nonomoho ta hiori maneri ka God? ?Ira leghu noni nga mu edi noni mala vari va kakahei? ?Ira leghu noni nga mu edi rivai hahaima? 30?Ira leghu noni nga mu edi auri ira kaikadolo mala va veha fogara? ?Ira leghu noni nga mu edi ngengene haroharo ka ira ngengene haza? ?Ira leghu noni nga mu edi va fafahakari ira fafahakadi ira ngengene haza? 31Ghau geala o hagala ghidi ghu ira kaikadolo ta tongovodi fuludu lao.

Ghe ghatunaina ara a va podolo vanamu kaike ghaghahena doli ta toraina veha fuludu lao.