1Cor 14 | KjiSC | STEP | Ghau o leghui ia ghaghahena namaha nia o hagala ghini haro molamo ta mala kuruighona ira kaikadolo ta meha ka ia Tarunga Ta Maduana, sughavona ghu ia kaikadolona mala turi ghidi kave ira nonomoho ta hiori ka God.

1 Corinthians 14

Ira Kaikadolo Ka Ia Tarunga Ta Maduana

1 Ghau o leghui ia ghaghahena namaha nia o hagala ghini haro molamo ta mala kuruighona ira kaikadolo ta meha ka ia Tarunga Ta Maduana, sughavona ghu ia kaikadolona mala turi ghidi kave ira nonomoho ta hiori ka God. 2 Vununa hei ia ta ngengene ka ia ngengene ta deo hei ta avohina mu, e deo ge turi lao ghu ka ira noni, nga ne turi lao ka God. E deo hei mu ta boka va fafahakarira turi iranimu ka manei. Manei mu ne turi ghu ka ia mana ia Tarunga ghidira ira hohoghodi ta poika. 3 Nga heiri haroharo ta turi ghidi kave ira nonomoho ta hiori ka God mu, edi turi lao ka noni vanadina ia toka, gigima nia va kakapoto. 4 Hei ia ta ngengene ka ira ngengene ta deo hei ta avohina mu, e toka ghini ma taghonai, nga hei ia ta turi ghini kave ia nonomoho ta hioi ka God mu, e toka ghini ia kiloau kamoto.

5 Ara na kabai ghini mo ta ngengenena ghau haroharo ka ira ngengene ta deo ge avohori ghu hei noni, ghe ta kabai ghini ghau fuludu laonani ara mu ia ta turi ghidi kave ira nonomoho ta hiori ka God. Vununa ia noni ta tuturi ghidi kave ira nonomoho ta hiori ka God mu, e kuru lighorona fuludu laoi hei ia ta ngengene ka ira ngengene ta deo hei ta avohina. Nga hei noni neto avohori la ngengene iranimu, manei e va fafahakari ghe ge toka ghini nga ia kiloau kamoto.

6 ?Ghau taremehagu noni ta va hohoghona, nato meha ngengene la ara ka ghau ka ira ngengene ta deo hei ta avohina, heve mu veha ta age vanamuna ara? !Toraina deo ma! Nga nato hio vanamu age la ara kaike nonomoho ta hioi ka God, ba kaike avoavoho leghaha, ba kaike tuturi ghinina kaike nonomoho ta sipa ka God, ba kaike ungene babatu, ghe ge boka age toka ghini ghau nga. 7 Taghe ta ghua lama ka ira namihi mala ufu nia gita ta deo dolidi. ?Dito deo la maneri gedi hilava va vehari ghu, heve e ghua ghe gada boka avohi nga ghita heve koze di hilava ghinina maneri? 8 Ia kufili haro, neto deo la ge ufu va vehai ghu, heve e ghua ia punugara ghe gedi nomoho avohi nga gedi va tana ghu mala magarana. 9 E ghua molamo ka ghau. Noto turi lao la ghau ka ira noni ka ia ngengene ta deo gedi avohi ghu maneri, heve e ghua ghe gedi avohi nga maneri heve no kaheina ghau? Ira ngengenemu ghau mu to suna lao ghedi ma ka kolangana. 10 Tehi kokolodi ngengene mu ta aura ka malau iahi peka, edi kuru fafahakadi haroharo ghu. 11 Ghe nato deo la ara ga sakomo hioi ghu ia fafahakana heve ta kahei ani ia keha noni, ghai palu mu taghe nake meha ka sopai ghizuna ta sopai ira ngengene, e ghua. 12 E ghua molamo ka ghau. Vununa ghau no torai hagala ghini ta au ghauna ira kaikadolo ka ia Tarunga, no fangai ghu God ira kaikadolo ta boka toka ghini ia kamotona kiloau.

13 Vununa ka va fafahaka iahi, hei ia ta ngengene ka ira ngengene ta deo hei ta avohina geala manei e verevere fangai ia kaikadolo mala va fafahakarira heve ira ta kaheri manei. 14 Vununa nato tarai la ara ka ia ngengene ta deo hei ta avohina, ia tarungagu ara e tarai, ghe ara ka nganganagu ini, e deo ga va fafahaki ghu heve na kaheina. 15 ?Heve ghu ta age riva ghinina ara? Ara a age tarai taremehana tarungagu ini, ghe ara a tarai haro molamo ghatu ka nganganagu ini; Ara a age koze ka tarungagu ini, ghe ara a koze molamo ghatu ka nganganagu ini. 16 ?Noto helahela ghini la ghau God ka ia Tarunga, heve e ghua ira noni ta deo ge boka va fafahaka ghu ghe, gedi boka kahe “Amen” nga ka ia kudoveha ghau, vununa ta deo ari gedi va fafahaki ghu heve no kaheina ghau? 17 Geta toraina veha ghu ia nomu kudoveha ghau ka God ghe, e deo ma ge toka ghidi ghu keha noni ari.

18 Ara na kudo vehai God ta ngengenena ara ka ira ngengene ta deo hei ta avohorina, fuludu ghauna ghau haroharo. 19 Ghe ka giliona ia kiloau, e veha fuludu ta kaherira ara gaha gugutodi ngengene ta boka va fafahakari ira noni, fuludu laoina ia ta kaheri ara tazo togha gugutodi ngengene ka ira ngengene ta deo hei ta avohorina.

20 Ghau taremehagu noni kiloau, o nodo ngangana taghe rekaha ta ghuana. Ka ghinina ia muko mu, ghau taghe rekaha o ghua, nga ka ira nganganamu ghau mu, taghe noni faa o ghua. 21 Ka ia fafata halina God ka ira noni Isiraeli manei neke kahe ghua iahi ka ira Kakangava ta Maduana,
“Ka ira noni ta ngengene ka ira keha ngengene
ka ira pepeudi ira noni mehadi,
ara a age ngengene ka ira nogu noni.
Ghe geta ghua mo ianimu ghe, maneri e deo gedi age nonomoho ghu ka ara, ne ghua ia Lod.” ^{▼▼14:21 Aesaea 28:11,12}

22 Ngengenena ghu ka ira ngengene ta deo hei ta avohorira mu, kaike va ghilaghila eka maladi ghu ira ta va hohoghona, nga maladi ira ta deo gedi va hohoghona ghu; nga ia kaikadolo mala turi ghidi kave ira nonomoho ta hiori ka God mu, eka maladi ghu ira ta deo gedi va hohoghona ghu, nga maladi ira ta va hohoghona. 23 Taghe dito verevere varighara la ghu ira noni ta va hohoghona dito ngengene ghu ka ira sopai ngengene ta deo gedi avohori ghu taghodi, nia haghele lao tuna ira ta deo gedi va hohoghona ghu ira ta deo gedi avohi ghu ia ngengene ka ghau neto ghua la, ghau mu no gogosu edi ghua ta va ngana ghini ghauna maneri ghatu. 24 Nga dito haghele lao la ira ta deo gedi va hohoghona ghu, ba ira keha taka va fafahaka va vehari ghu ira vari va kakahei ka ia kiloau ka ia fafata tuturi ghidi kave ghau ira nonomoho ta hiori ka God, maneri edi age hio va hohoghona ghatu ka ira leghu tadi nomohori nga edi ngana avohi ghu ta kuru sasakedira taghodi ta fatana ghu hioina ia va kilasa, vununa ka ira leghu noke kahe kaveriro nga ghau. 25 Nia ira leghutau ta muko ta poika ka ira hihingodi maneri tuna gedi age podolo ghu, e ghua. Nia maneri edi maimanihi hinae va totoana ghinina God, kahe guadira iahi, “God mu ne toraina au aiahi ka vari hoataimu ghau,” edi age ghua.

Ira Papatai Ta Mala Leghuri Ka Ia Va Totoana

26 ?Ghau taremehagu noni ta va hohoghona, heve ghu mu tada age kaheina ghita? Ka ia meha varighara ghau, keha nonina e koze himu, kehana e rivai ungene babatu, kehana e tuturi ghidi ira nonomoho ta va podolo kaveri God, kehana e ngengene ka ia ngengene ta deo hei ta avohina, nia kehana ge va fafahaki ghu ia ngengene ta deo hei ta avohina, e ghua. 27 Hei neto ngengene la ka ira ngengene ta deo hei ta avohorira, palu ba lito ghu ma geala ta ngengenena, ghe kaikeu e ghua ma ta ngengenena ka kaike fafata, nia kehana tuna ge va fafahakari ghu ira fafahakadi, e ghua. 28 Neto deo la hei ta boka riva ghinina ia va fafahaka, hei ia ta ngengene ka ira ngengene ta deo hei ta avohorira e vanemoho ma e turi ghu ka taghonai nia ka God, e ghua. 29 Palu, ba lito noni geala ta tuturi ghidi kavera ira nonomoho ta hiori maneri ka God, nia heiri ira ta nomohori edi mato va vehari mala avohina ne meha ka God ba deo ta ghuana nonomoho iranimu. 30 Nga kaike nonomoho ka God neto meha la ka kaikeu ka heiri ira ta nohe hinae, ia neke kusu ngengeneo geala e nodo. 31 Ka ghaghahena iahi, ghau haroharo, kaikeu, kaikeu, o age ghua turi ghidi kavera ira nonomoho ka God, mala heiri haroharo edi age hio avoavoho ghu nia gigima ghu, e ghua. 32 Heiri ira ta hioi ia kaikadolona mala tuturi ghidi kave ira nonomoho ta hiori ka God mu, maneri edi boka va nodori mo taghodi ka ia fafata ta kabai ngengene ira keha. 33 Ghau o toraina leghuri leghutau irahi, vununa God e deo ge kabai ghini ghita ghu ta bitibatona ka ia riva ghidi ira leghutau ka giliona ia kiloau. Manei e kabai ghini ghita ta au varighara va vehana. Iahi lamu ghaghahena ta toraina mala riva ghinina ira noni kiloau ka ira leghu malau nga.

34 Ira fotati geala edi au vanemoho ma ka giliodi ira varighara ka ira kiloau. Maneri mu eka malumu ghu ta ngengenena, nga maneri edi au ka pekana ia mana ira keradiau, taghe ia ta kahei ka ia vetula Mosese. 35 Dito kabai hadu kaveri la maneri ghidira keha leghutaura, maneri geala edi notohori ira keradiau taghodi ka sugadiro, vununa e hahaghavana ka kaike fotati ta ngengenena ka ira varighara ia kiloau.

36 ?Ba, ia nonomoho ka God mu neke tataniga ka ghau? ?Ba, ka ghau lama neke dufuna manei? 37 Hei neto kahei la taghonai mu kaike noni ta tuturi ghidi kave ira nonomoho ta hiori ka God neto ghua la, ba taghonai mu kaike noni ta kurui kaike kaikadolo ka ia Tarunga ta Maduana, neto ghua la, manei e toraina avohi heve ta kakangava ghini age vanamu ini ara mu, nona ungene va gigima ia Lod Zisas, ta ghuana. 38 Nga manei neto deo la ge va ghunaghunai ghu ngengene iahi mu, e deo hei ta age va ghunaghunaina manei ghatu.

39 E ghua ghu ghau taremehagu ta va hohoghona, o hagala ghini ghu ta turi kaveina ia nonomoho ta hioi ka God, nia oka va beani ghu ta ngengenena ka ira ngengene ta deo hei ta avohorira, e ghua. 40 Nga ghau o toraina riva ghidi vahina leghutau nga, leghurira ira papataidi ta lotoro.