1Cor 2 | KjiSC | STEP | Ghau taremehagu noni kiloau, ka ia fata kusu meha tuturi beana vanamu ara ghinina ia nonomoho ka God neke poikao sepao ka ira noni, ara e deo gake ngengene ghu ka ira ghaghahedi ngengene ta marutana nia avoavoho leghaha.

1 Corinthians 2

1 Ghau taremehagu noni kiloau, ka ia fata kusu meha tuturi beana vanamu ara ghinina ia nonomoho ka God neke poikao sepao ka ira noni, ara e deo gake ngengene ghu ka ira ghaghahedi ngengene ta marutana nia avoavoho leghaha. 2 Vununa ka ia fafata au birusuna taremehamu ghau, ara nato ke nai hihingogu ta ngana kairira vahina leghutau nga, ta ngana tahuina ma ghu turi ghini kavena Zisas Kraes nia ia leme ka manei ka ia hekefalahata, e ghua. 3 Ara nake meha ka ghau ka ia paeke, mamaghu nia taremehana toraina nanazara ghegu. 4 Nia ia nonomoho ka ara nia ia tuturi beana ka ara mu neke toraina lotorona ma. Ara e deo gake ngengene ghu ka avoavoho leghaha mala va hohoghonana ka ghau. Nga ka ia tuturi beana ara mu, ia Tarunga Ta Maduana neke va podoli ia mana ka manei, 5 mala ia va hohoghona ka ghau, eka fara lao la ghu ka ia avoavoho noni, nga ka ia mana God mo.

Avoavoho Ka Ia Tarunga

6 Ne ghua mo ianimu ghe, ghai na turi ghini mo kaike nonomohona avoavoho vanadira ira noni ta zeolo ka ia nodi va hohoghona, nga eka ghua ghu ka ia avoavoho ta nona malau iahi peka, ba ka ira ta kopu ghini malau iahi peka, ira ta age nogha ia mana ka maneri. 7 Deo, ghai mu na tuturi ghini ia popoikana avoavoho ka God, kaike avoavoho neto ke poika ma neke mehao ghu kusu nakai ghini puhi ta gigimana God malanana ia veha ka ghita ghe neke tatanigao nga malau iahi peka. 8 E deo hei ka ira ta kopu ka malau iahi peka dike va fafahakina ia avoavoho ka God, vununa gedi ke va fafahaki la maneri, geala maneri deo gedi ke tupila ghini ghu ia noda Lod ta varanga. 9 Ianimu lamu fafahakanana ka ira Kakangava Ta Maduana ka ia ta kahe ghua iahi,
“Heve neto ke deona ia hiba ge finini ghu,
heve neto ke deona ia talinga ge nomohi ghu
nia heve neto ke deona ia ngangana ka noni ge nganai ghu,
mu ira leghutau neto ke va tanario God maladira heiri ira ta namaha ghini Manei.” ^{▼▼2:9 Aesaea 64:4}

10 Ghe God neto ke va podoli ka ghita ka ia Nona Tarunga ia nona vatovato neke poikao. Ia Tarunga ta Maduana e sukutu haduri vahina leghutau nga, geta ghua ghu ira leghutau ka God ta poika lao gilioni. 11 E deo kaike noni ghu ta boka avohina mu ia nganganana ia keha noni, nga ia tarungana taghonai keha noni ianimu lama, nia e deo kaike noni ta boka avohorina mu ira nganganana God, nga ia Tarunga ka Taghonai God lama. 12 Ghita mu dato ke deo gada hioi ghu ia tarunga ta nona malau iahi peka, nga ia Tarunga ta Maduana ta meha ka God mo, mala gada boka avohori la ghita ira vahina leghutau ta namanama nga neto ke vanada kakatono God. 13 Ka ia va kahe ghini ghau ghai leghutau irahi, ghai e deo ga ngengene ghu ka ira ngengene ta meha ka ia avoavoho noni. Nga na ngengene ka ira ngengene neke vanamaio ia Tarunga ta Maduana mala va fafahakarira ira hohoghona ka heiri ira ta kururi ia Tarunga ta Maduana. 14 Ia noni ta deoi ia Tarunga ta Maduana mu, e deo ge boka hiori ghu ira leghutau ta meha ka ia Tarunga God, vununa leghutau iranimu ghu mu, ne kingo e ghua ka manei, e deo ghu manei ge boka va fafahakari ghu, vununa ia Tarunga ta Maduana lama ta boka va fafahakarira. 15 Heiri ira ta auri ia Tarunga ta Maduana mu, edi boka va fafahakari mo ira sarena leghutau, nga maneri taghodi ira ta deo ge auri ghu ia Tarunga ta Maduana mu, e deo gedi boka va fafahakari ghu ira keha noni ta auri ia Tarunga ta Maduana. 16 Vununa,
“?Hei mu neto ke avohina ia nganganana ia Lod?
?Hei mu ta boka vanani tatanganana manei?” ^{▼▼2:16 Aesaea 40:13}

Nga ghita ira ta au ghita ia Tarunga ta Maduana mu, ta au ghitana ia ngangana ka Kraes.