1Cor 3 | KjiSC | STEP | Ghau taremehagu noni kiloau, ara e deo gake boka ngengene ghau ghu taghe ta ghua ghidi nira ira noni ta auri ia Tarunga ta Maduana, nga nake ngengene ghau taghe ira noni ka malau iahi peka. Ghau taghe rekaha ira ta ghua ka ia va hohoghona ka ia parekete taremehana Kraes.

1 Corinthians 3

Ira Maneriva Ka Kraes

1 Ghau taremehagu noni kiloau, ara e deo gake boka ngengene ghau ghu taghe ta ghua ghidi nira ira noni ta auri ia Tarunga ta Maduana, nga nake ngengene ghau taghe ira noni ka malau iahi peka. Ghau taghe rekaha ira ta ghua ka ia va hohoghona ka ia parekete taremehana Kraes. 2 Ara nake va valiha ghini ghau miloki, nga eka ghano ta gima ghu, vununa ghau noke deo nga go fata ghu ka heve ira ta gima ka fafata ianimu. Hohoghona fuludu, ghatunaina ghau e deo nga go fata ghu, 3 vununa ghau no au taghe ira noni ta leghuri nga ira puhina malau iahi peka no ghua nga. ?Heve, ira kakabai nia ira vari hahala ka ghau e deo ge va podoli ghu ta au taghe nonimu ka malau iahi peka ta ghuana ghau? ?Heve, taghe riva ka noni bongihehe e deo go ghua ghu no riva ghinina ghau? 4 Ka ia kahe ghua iahi kaikeu ka ghau, “Ara mu na leghui Polo,” nia kehana, “?Ara mu na leghui Apolosi,” ka ia ta ghua, heve, taghe nonidi ka malau iahi peka e deo go ghua ghu no riva ghinina ghau?

5 ?Hei ghu mu Apolosi na, nia hei mu Polo na? Ghai palu mu suna nona noniriva ma God nake toka ghini ghau ghu mala va hohoghonana. Ghai palu mu a riva ghidi ghu ma ira riva neke sopai vanamaio ia Lod. 6 Ara mu taghe ia neke numa ghinio ia subuna, nia Apolosi mu taghe kaikeu neke va sesele ghini ketuhuo e ghua, nga God mo mu neke va kodolo vonaina. 7 Hei ia ta numa nia hei ia ta seseli ia subuna mu e deo ge tongovona ghu, nga God ia ta va kodoli subuna ani mo mu ta tongovonana. 8 E deo heve ta hazana mu ka hei ia ta numa nia ka hei ia ta seseli ia subuna heke. Hei ia ta numa nia hei ia ta seseli ia subuna mu edi varifata ma, edi age hio tabara haro ghu ghatu leleghuna ka ira sopai nodi riva dike riva ghidiro. 9 Vununa ghai palu mu nona noni riva ta riva varighara vanani ma God; ghau mu nona galahena nunuma God nia nona tolima God, e ghua.

10 Ka ia kaikadolo neto ke vanaguo God, nake riva ghini ghu ara ia pakaraina suga, taghe kaike mane ta avoho fikifokoi riva ghinina kaike suga, nia la riva tuna kehara ka ia fatena, ia ta ghua. Ghe hei ia ta riva ka ia fatena mu e toraina banabana. 11 Vununa God to kusu nakaini Zisas Kraes lama mu taghe kaikena pakarainana ia suga, e deo ghu keha pakaraina take boka riva ghininani. 12 Kehara ka ira ta riva ka ia fatena pakaraina mu edi riva ka ira leghutau ta veha taghe ira Golu, Siliva, ghahipa ta vona tabarana, nga keha nonira mu edi riva ka heke, sesehu, ba retona witi ira ta magali nogha. 13 Ghe ka ia ravatana varifate mu, ia varifate ka God taghe totoi age ghua, ta age va podoli ghatu heve kokolona riva neto ke riva ghinina kaike noni ta rivai suga; ia totoi ta age va podolina neto au lighorona la mo ia riva ka kaike noni. 14 Heve neke riva ghinio manei neto deo la ia totoi ge saligai ghu, manei e age hioi ghatu ia tabarana. 15 Nga neto saliga la ia riva, manei e age toraina siana ghini riva ianimu. Ghe manei taghonai God mu e age hio va dolini mo ghatu, taghe kaike noni ta pelo kave ka lakana totoi, ta ghuana.

16 ?E deo go avohi ghu ghau, ta nona Ringifota ta Maduanana God mu ghau, ta auna ghu ia Tarunga ka God ka giliomu ghau? 17 Hei neto va mukoi la ia Ringifota ta Maduana ka God, God e age va mukoi manei ghatu; vununa ia Ringifota ka God mu e maduana; nia ghau lamu ghu mu ia Ringifota ta Maduana ka God, e ghua.

18 Oka sebo ghau ghu taghomu. Hei ka ghau neto nganai la ta torai avoavohona taghonai ka ira va fafahaka ta nona malau iahi peka, e veha ge meha kaike noni ta kingo la manei ka ira hibadi ira noni ka malau iahi peka, mala boka meha avoavoho hohoghonana manei ka ia nganganana God. 19 Vununa ia avoavoho ka malau iahi peka mu, kingo e ghua ghini ka ia nahalina God. Taghe ia ta kahei la ka ira Kakangava ta Maduana: “!God ne va riufuri ira ta avoavoho ka ira nodi avoavoho taghodi!” ^{▼▼3:19 Zobu 5:13} 20 Nia ka ia keha Kakangava Ta Maduana ne kahe ghua iahi, “!Ia Lod ne avohi ta deo lighorodira ira nganganadi ira ta avoavoho,” ^{▼▼3:20 Samu 94:11} ia ta ghua. 21 Oka hadu varanga ghini la ghu ia noni babatu ta leghui ghau. Vununa God neto ke vanamu vahina leghutau nga. 22 Geta ghua ghu Polo ba Apolosi, ba Pita, ba malau iahi peka, ba ia doli ba leme, ba ghatunaina, ba keha nareo; leghu irahi nga mu nomu ghau mala toka ghini ghauna, 23 nia ghau tuna ge nona ghu Kraes, nia Kraes ge nona ghu God, e ghua.