1Cor 4 | KjiSC | STEP | Ghau o va ngana ghini ghai meha taghe nona noniriva Kraes neto ke va posi ghini ghaio ia riva ta mala va fafahaki ia popoikana hohoghona ka God, o ghua ghini ghai.

1 Corinthians 4

Ia Riva Ka Ira Mane Nonomoho Kraes

1 Ghau o va ngana ghini ghai meha taghe nona noniriva Kraes neto ke va posi ghini ghaio ia riva ta mala va fafahaki ia popoikana hohoghona ka God, o ghua ghini ghai. 2 Ia noni ta nai va kenui ka kaike riva mu, e toraina va podoli taghonai ta hohoghonana manei ka ia nona riva. 3 Taghe ghinaguna ara mu, ara e deo ga ngana va tahui ghu heve nganganamuna ghau, ba ira keha noni ghinina riva ini ka ara. Ara taghoguna ghe, e deo ga sukuti ghu mala fininina riva ini ka ara ne veha ba ne muko, ta ghuana. 4 Ara na avohi mo ta deona heve leghutau na va zeaina ka ia riva vanani Kraes, ghe ianimu ghu mu, e deo ge va podoli ghu na lotoro ara, ta ghuana. Taghonai ia Lod mu ta mala fateauna ara. 5 Oka kusu fatei la ghu hei noni ghe ge dufu nga ia toraina fafata; afa e vuhai la meha ghu ia Lod. Manei ta age va podolorira ka ia fegala ira heve ta poika ka giliona nagoromo nia ta age va podolorira ira ngangana ta poika ka ira hihingodi ira noni, e ghua. Ka fafata ianimu ghe ge age sopai vanadi nga God ira noni heve helahela ta mala hioina maneri.

6 Ghau taremehagu noni kiloau, ara nato ke tuturi ghini Apolosi nia taghogughi e ghua, malanana ia veha ka ghau, o mala hio avoavoho ghu ka ghai ghinina ia fafahakana ia ta kahe ghua iahi, “Oka ghahe fuludu laoi ghu heve ia ta kangavi,” ia ta ghua. Ka ia riva ghini heve ne kaheina Kakangava ta Maduana iahi, ghe go deo nga hadu varangana ta kaheina ghu noni babatu ta leghui iahi mo agho ne veha fuludina keha ani, ta ghuana. 7 Vununa e deo hei mu ne va hazaighona agho ka ia keha noni. ?Heve mu no kuruighona agho noke deona go hioi ghu ka God? ?Nia ira leghutau ta veha noto ke hiori la agho ka God, heve no ghua ghe no hadu varanga ghidi nga, taghe noke deo go hiori ghu ka manei, ta ghuana?

8 Ka ia nganganamu ghau mu, to kusu kuru ghau vahina leghutau nga ka ia doli ghau taremehana Kraes no ghua. Ghau mu noto kusu taghotagho taghomu no ghua ka ia nganganamu. Ghau no ngana ghau taghomu ta au taghe ira mane ginitaukela ta ghuana, nai kai ghaina ghai peghuru, ghe no va zezea. Ara a va manemane goke toraina meha mane ginitaukela la ghau, a mala boka meha mane ginitaukela ghu ghai taremehamuna ghau. 9 Ghe ka nganganagu ini ara, taghe iahi ne toraina ghua: ghai ira mane nonomoho, taghe God neto ke nai va nonoghana ghai ka ia nokolo ne ghua, taghe ta ghua nia ira noni ta hio laori ka ia galahena mala atuatungu, mala matona ka malau kamoto iahi peka—ira noni ghe ira engizeli ghu.

10 !Ira riva va gigima ka ghai vanani Kraes mu, e fifini kingodi ka tehi noni, ghe ghau mu noni kiloau ta toraina avoavoho taghomu no ghua, ghe deo ma. !Ghai mu na paeke, nga ghau mu no gigima no ghua ghau nganganamuna! !Ghau mu di va vonavona ghau ira noni, nga ghai mu di kikipana ghini ghai ira noni! 11 Geta ghua ghu ghatunaina ghe, ghai na nomai liha nia parangoso; na va vona poko pereu ma; di toraina ruza va muko ghai, nia deo malaumai, e ghua. 12 Ghai na riva ngazuluai ka kamemai idi taghomai mala hiorira ira leghutau ta ponoe ghidi ghai. Ka ia ungene va muko ghai ira noni, ghai na va beanari; ka ia ngovangovala ghai maneri, ghai na au vanemoho ma; 13 ka ia ungene va muko ghai, ghai na ungene tughu ka ira ngengene varisute. Na ghua mo ianimu ghe, taghe ira penu ka malau iahi peka, ba ira sota ta rahi kairi di ghua ghini ghai ma di au ghu, dufu ghu ka torai ghatunaina.

14 Ara e deo ga kangavi ghu iahi mala va haghava ghauna, nga mala va balau ghau, taghe ghau ira nogu rekaha ta namaha ghini ghau fuludu ara. 15 Vununa geta au ghau ghu keha tazo togha noni mala va kakahe ghini ghauna ghinina Kraes ghe, kaike mo nomu mamana ghau. Vununa ka ia parekete taremehana Kraes Zisas nake meha nomu mama ghu ka ia hio meha vanamu ia Nonomoho Ta Veha. 16 Ara na va ohiohi ghau ghu ta leghurira ghau heve leghutau ta veha na riva ghinina ara.

17 Ne ghua mamu ghe na tuhu agei nga ara Timoti ka ghau mala toka ghini ghauna. Manei mu a namaha ghini fuludu ara taghe kaike toraina tuugu mane ta ghua ghinina, nia manei mu toraina kaike noniriva hohoghona vanani ia Lod, e ghua. Manei e age va ngana ghini ghau leghu ghatu ghinina ia ghaghahena doli ka ara ka Kraes Zisas, ta leghui heve ia ta vari va kakahei ghini ara hae ghe hae ghu ka ira leghu kiloau ta laori nga ara.

18 Kehara ka ghau mu noto ke meha hadu varanga, vununa ka ira nganganamu, ara e deo ke age sigho ghini ghau leghunani, no ghua. 19 Ghe ara a magali age mo ghatu ka ghau, neto va malumu au la ia Lod. Ianimu tuna ghe ga age hadu kavei nga ara ghatu ka noni ta hadu varanga irahi dito toraina auri la ia mana ka God, ba dito suna ngengene kakato la ma. 20 Vununa kaike noni ta au ka pekana ia kopu God mu, manei eka ngengene kakato ghu, nga manei e au ka ia mana God. 21 ?Hae mo ta faetina ghau? ?A meha mala va kilasa ghau, ba a meha ka namaha nia vari amoto?