1Cor 5 | KjiSC | STEP | Keha nonira dito ke va kahe ghinagu ta auna ia zave ka vari hoataimu ghau, ia kokolona zave geta ghua ghu ira noni bongihehe ghe ta deo gedi riva ghini ghu. Di kaheina mu, kaike mane ne epu taremehana ia nona uke va kakadolo neke hioio nona mama, di ghua.

1 Corinthians 5

Polo Ne Ngengene Va Gigima Ghini Kaike Mane Ta Zave

1 Keha nonira dito ke va kahe ghinagu ta auna ia zave ka vari hoataimu ghau, ia kokolona zave geta ghua ghu ira noni bongihehe ghe ta deo gedi riva ghini ghu. Di kaheina mu, kaike mane ne epu taremehana ia nona uke va kakadolo neke hioio nona mama, di ghua. 2 Ghau mu no toraina hadu varanga ghini ghau taghomu, nga geala o muko hihingomu o va au peghuri ghu ka ia kaike au varighara taremehamu manei neke riva ghinio puhi iahi.

3 Geta deo ghu ara ga au taremehamu ghu ghe, ara na au taremehamu mo ka ia tarunga. Nia ka ia au taremehamu ara ka ghaghahena ianimu, ara to kusu fatei ia mane neke to riva ghinio leghutau ta muko iahi. 4 Ka ia varighara ghau ka ia babaolona ia Lod Zisas, ta au taremehamu ghu ghau ara ka ia tarungagu nia au taremehadana ia mana ka ia noda Lod Zisas, 5 ghau o vanani lao Satana mane iahi, e vavahagala ghu manei ka ia dolina ka malau iahi peka, ghe God e age hio va dolini mo manei ka ia ravata leghu mehana ia Lod.

6 Ia va varavaranga ka ghau e deo ge veha ghu. E deo go avohi ghu ghau sasake iahi mu taghe rekahana isi ta sukui ia kamotona heni falao ta ghuana? 7 O hio kaini ia sesepana isi, ghe go meha kaike foforuna heni falao ta deo isina nga. Ianimu lamu toraina ghauna. Vununa Kraes neto ke veala ghini mala hio kairira ira sasakeda ghita, taghe kaike rekahana sipisipi neke veala ghinio ka ia mahai varigharana Ghahe Fuludu. 8 Mala ka ia fafata vari parekete varighara ghita ka Mahai Varigharana Ghahe Fuludu iahi, ghita da toraina deo ghu kuru ghitana ia isina sasake ta sesepa, ba keha puhi ta mukorani, nga ghita da toraina taghe bereti ta deo isina da ghua torai mamalahu va vehadana, nia ghita da turi hohoghoda ma e ghua.

9 Ara nato ke kakangava vanamu age ka ia leta ara taka kaike au varighara taremehadira ghu ira noni ta zave. 10 Ghe ara e deo gake turi ghidi ghu ira noni ta deori va hohoghona ta zave, ba ira ta kabakabai leghutau, ba ira ta sisiko, ba ira ta va totoanai nguzunguzu. Ghau o toraina ghahe kaini malau iahi peka mala au vatakalena ka kokolodi noni iranimu. 11 Nga ghatunaina mu, ara na kakangava vanamu age taka toraina kaike au varighara taremehanana ghu hei ia ta va kudo ghini noni kiloau taghona, ghe ta zave nga, ba ta kabakabai leghutau nga, ba ta va totoanai nguzunguzu nga, ba ta vari ungene va muko nga, ba ta ketuhu gogosu ba sisiko nga. Oka mahai taremehana ghu ghe, kokolona noni ianimu.

12 Eka nogu riva ghu ara mu ta mala faterira ira noni ta au ka peghuruna ia kiloau, nga e toraina riva hohoghona ka ghau mu ta mala faterira heiri ira ta rivai muko ka giliona ia kiloau. 13 God mu ta age faterira heiri ira ta au peghuru. Riva ghini heve ia ta kahei ka ira Kakangava ta Maduana God, “O va au peghuri ia noni ta muko ka ia pukuna ghau,” ^{▼▼5:13 Ngengene 17:7; Ngengene 19:19; Ngengene 21:21; Ngengene 22:21,24; Ngengene 24:7} ia ta ghua.