1Cor 6 | KjiSC | STEP | Hei ka ghau neto kurui la keha puhi ta zea ka ia keha noni kiloau, e deo ge veha ghu ta laona agho ka kaike manefate ta deo ge va hohoghona ghu mala va totonuina mamarutana ianimu. E veha ta laona agho ka kaike noni kiloau mala nomohina.

1 Corinthians 6

Ia Va Lotoro Magara Ka Varihoataidi Ira Ta Va Hohoghona

1 Hei ka ghau neto kurui la keha puhi ta zea ka ia keha noni kiloau, e deo ge veha ghu ta laona agho ka kaike manefate ta deo ge va hohoghona ghu mala va totonuina mamarutana ianimu. E veha ta laona agho ka kaike noni kiloau mala nomohina. 2 ?E deo go avohi ghu ghau mu ira noni ka God edi age fatei ghatu malau iahi peka ta ghuana? ?Nia noto mala age fatei la ghau malau iahi peka, heve, ghau e deo go boka va totonuri ghu ira rekahadi leghutau teri ka vari hoataimu taghomu? 3 ?E deo go avohi ghu ghau mu ta age faterina ghita ira engizeli? Neto ghua la ianimu, ira leghutau ka fafata iahi mu edi rekahadi leghutau ma mala va totonurira. 4 ?Noto kuru ghau vari giuruai la ghidira kokolodi rekahadi leghutau irahi, ne heve ghe no lao nga ka ira mane varifate peghuru ira ta deo ia kiloau ge heluhelu ghidi ghu? 5 Ara na kahei iahi mala va haghava ghauna ghau. ?To deo ma hei ta avoavoho fuluduna ka giliona ia kiloau kamoto ta boka va totonurira puhi irahi? 6 Nga ne auna mu, keha noni kiloaura edi hiori ka koti ira keha ka taghomu, ka torai kenudi ira taka va hohoghona ghu.

7 Ka ia ta hio vonai ghau ka koti ia keha noni ta au ka vari hoataimu taghomu, to age zea mu ghau ka ia nahalina God. E veha go va malumu ghau lama taghomu ka ira keha noni ta mala ngovala ghauna nia ta mala siko ghauna. 8 Ghe ne auna mu, ghau taghomu mo no ngovalarira nia no sikorira ira tahimu noni kiloau ta va hohoghona. 9 ?E deo go avohi ghu ghau mu heiri ira ta rivai muko mu e deo gedi age hio kadoli ghu ia Ravutu ka God ta ghuana? Ghau o toraina va hohoghonai ta hohoghonana iahi. E deo hei ka ira noni ta zave, e deo hei ka ira ta va totoanai nguzunguzu, e deo hei ka ira ta zave kunuri ira keradiau, e deo hei ka ira mane ta kikirasei tabara, e deo hei ka ira ta babaere vari mamanei, 10 e deo hei ka ira ta sisiko, e deo hei ka ira ta kabakabai leghutau, e deo hei ka ira ta ketuhu gogosu, e deo hei ka ira ta ungene va mukori ira keha noni, e deo hei ka ira ta seke ghidi ira keha noni mala hio tadira ira nodi leghutau, ta age hio kadolina ia Ravutu God. 11 Taghe ianimu noke ghua kehara ka ghau. Ghe ka ia babaolona ia noda Lod Zisas Kraes nia ka ia Tarunga nona God, neke to tihi kairi ghu God ira muko ka ghau, va maduana ghauna nia nai va lotoro ghauna ka ia nahalina taghonai.

Peholo Ghini Ia Muko Ta Meha Ka Ia Zave

12 “Vahina leghutau nga mu e malumu mo ta riva ghidira ara,” no ghua ghau, ghe ta kaheina ara mu vahina leghutau nga mu eka veha ghu ka ara mala riva ghidira. Nia geta malumu vanagu ghu ara ta mala riva ghidira vahina leghutau nga ghe, ara e deo ga va malumi ghu kaike leghutau ghu ta mala faghina kaputu auna. 13 “Ghano mu e malana ia kokoilo, nia ia kokoilo ge malana ghu ia ghano,” no ghua ghau, ghe God e age va noghari haro palu leghutau irahi keha nareo. Ia tini mu eka malana ghu ia zave, nga e mala riva vanani ia Lod; nia ia Lod ge faghina kaputi ghu ia tini, e ghua. 14 Ka ia nona mana, God neke va tetu leghui ia Lod ka ia leme, nia manei e age va tetu leghu ghita haro molamo ghita ghatu, e ghua. 15 ?Ghau e deo go avohi ghu tinimu nira ghau mu ira keha pelona taghonai Kraes, ta ghuana. ?Heve, e lotoro mo ka kaike mane mu ta hioina ia tinina ia ta keha pelona Kraes ta va parekete taremehana laona ghu ia fotati ta kikirasei tabara? !Toraina deo kalasu kai! 16 ?Nia e deo go avohi ghu ghau mu ia mane ta va parekete taremehana lao taghonai ka ia fotati ta kikirasei tabara mu, e kaike taremehana manei ka ia tini, ta ghuana? Vununa ka ira Kakangava Ta Maduana ne kahe ghua iahi, “Maneri palu edi meha kaike tini mo,” ^{▼▼6:16 Tatanigaina 2:24} ne ghua. 17 Nga ia mane ta va parekete laoi taghona ka ia Lod mu, e meha kaike taremehana manei ka ia doli hohoghona.

18 !Peholo ghini ia zave! Ira keha leghu sasake ta riva ghidi nga ia noni mu, e peghuruna ia tinina; nga ia noni ta zave mu, ne sasake kunui ia tinina taghona. 19 ?Ghau e deo go avohi ghu tinimu nira mu kaike Ringifota ta Maduana ka God ta nona ia Tarunga ta Maduana ta au nia ka giliomu ghau, ia neke vanamuo God, ta ghuana? Ghau mu eka nomu ghu taghomughi, 20 vununa God neke tabara ghau ka kaike tabara ta toraina vona—ia leme ka Kraes. Ghau o va vonavonai ghu God ka tinimu nira.