1 Corinthians 7

Ira Mamarutana Ghinina Ia Varihio

1Ghatunaina mu ghidi ira leghutau noke notoho mehariro ghau ka ia nomu leta. Uve, e veha taka varihiona ghu ia mane. 2Ghe vununa ne faa fuludu ia zave lao meha, geala ia mane e kuru ghaseborona ghu taghonai nia ia fotati geala e kuru keranau ghu taghonai, e ghua. 3Ia mane mu geala e toraina va malumi taghonai ta epu taremehanana ia ghaseborona, nia taghe iala molamo ia fotati geala e va malumi taghonai ta epu taremehanana ia keranau, e ghua. 4Ia tinina ia ghaseboro mu eka nona ghu taghonai kakaike, nga e nona haroma ia keranau; taghe iala molamo ia tinina ia mane keranau ia fotati mu, eka nona ghu taghonai kakaike, nga e nona haroma ia ghaseborona. 5Ghau oka pake ghemu la ghu va malumu vanadira ira keramuau tinimu nira, nga ka kaike birusuna fafata ta kusu variveha ghini taghomu palu noni mala tarai nomuna ghe, go deo nga epu varigharamuna. Leghuna ianimu, ghau palu noni oke toraina meha epu varighara leghu, mala eka age auau ghau la ghu Satana, vununa ne marutana vanamu ghau banabana ghidira tinimu nira.

6Taghe kaike ungene va gigima ta toraina mala leghui eka ghua la ghu mu na kaheina ara, nga e ghua ta boka riva ghinina na suna ghua ma. 7Taghe ara ta au korogha hera ka ghua nga lamo ghau leghu noni nga na ghua, ghe God neke vanada sopai nenemadi kaikadolo ghita. Kaikeu ne kurui kaike kokolona kaikadolo; kehana ge kurui ghu keha kaikadolona, e ghua.

8Taghe nogu tatanganana ghu ara ka heiri ira taka varihio ghu nia ka ira fotati ta lemekai e ghua mu, geala e veha ma tato au korogha taghe ara ta ghuana maneri. 9Ghe dito deo la gedi boka taga tetui ghu ia lao hihingo ka ia tini, maneri geala edito varihio ma. Vununa e veha ta varihiona maneri, edika vahagalari la ghu ka ia ngagungaguna ia tini.

10Nga ka heiri ira ta varihio mu, ara a vanadi kaike ungene va gigima ta deo ge sipa meha ghu ka ara, nga sipa mehana ka ia Lod: ia ghaseboro mu e toraina deo ge mala kaini ghu ia keranau. 11Nga neto varikai la ia fotati, manei e toraina au korogha fuludai, ba, eke leghu la au taremehana ma ia keranau. Nia ia mane mu e toraina deo ge mala kaini ghu ia keranau.

12Ka ghau ira keha noni ta varihio ka heiri ira ta deo gedi va hohoghona ghu mu, ara a va kahe ghini ghau ngengene ta deo irahi ge sipa meha ghu ka ia Lod. Kaike mane kiloau neto kuru ghaseborona ta deo la ge va hohoghona ghu, neto veha vanani ghu ghaseboronani ta au taremehanana ia keranau, manei e toraina deo ge mala kaini ghu ghaseborona ianimu. 13Nia kaike fotati ta noni kiloau neto varihio la ka kaike mane taka va hohoghona ghu, neto veha vanani ghu ta au taremehanana manei, fotati ianimu e toraina deo ge mala kaini ghu keranau ianimu. 14Vununa ia mane keranau ia fotati taka va hohoghona ghu neto ke va maduanai ka ia varihio taremehana ia ghaseborona ta noni kiloau, nia ia ghaseboro ta deo ge va hohoghona ghu geto ke va maduanai ghu ka ia varihio taremehana ia mane keranau ta noni kiloau, e ghua. Geke deo la ianimu geke hohoghona ghu, ira rekaha ka agho geala e deo gedi nona ghu God, ghe ghatunaina mu maneri to nona God. 15Nga neto kabai varikai la ia taka va hohoghona ghu, va malumi ta ghuana ianimu manei. Ia mane ba fotati ta va hohoghona mu to kalasa ka ia varihio ka fafata ta ghuana ianimu; God neto ke kudo ghita ta auna ka bule. 16?Heve o ghua agho ia ghaseboro ghe, go avohi nga o boka mo ba deo ta ghuana toka ghinina ia kerauau mala va hohoghonana? ?Ba, heve o ghua agho ia mane ghe go avohi nga o boka mo ba deo ta ghuana toka ghinina ia ghaseborou mala va hohoghonana?

Ia Doli Neto ke Vananighono Ia Lod

17Ghita haroharo mu geala da toraina au tudu ma ka ia kokolona doli neto ke vanadao ia Lod, ia kokolona doli dake auino ghita ka ia fafata kudo ghita God. Iahi lamu puhi mala leghui na nakainina ara ka ira leghu kiloau nga. 18Neto ke kusu papahe va ghilaghila la kaike mane, ghe neke meha va hohoghona nga, manei eka ke va sisiva hio kaini ghu papahe va ghilaghila ianimu. Nia ia mane ta va hohoghona taka papahe va ghilaghila ghu mu, geala eka ke va sisiva papahe va ghilaghila ghu, e ghua. 19Vununa ia mane geta papahe va ghilaghila ghu ba deo ghu ghe, e deo fafahakana ma. Toraina faana leghutauna mu ia ta mala leghuri ira ungene va gigima ka God mo. 20Ghau haroharo mu geala o sopai au va gima ma leghuina heve doli noke auina ghau ka ia fafata kudo ghau God. 21?Agho mu noke kaike noni mala varituhu ka ia fafata kudoigho? Oka anga gheu ghu ka ianimu. Nga agho o boka kalasa gheu mo dito ghua ghinigho la, agho o leghui. 22Vununa ia noni mala varituhu neto ke kudoio ia Lod mu, e nona noni kalasana ia Lod. Taghe iala molamo, ia mane neke kaike noni kalasanao ka ia fafata kudoi mu, e nona mane mala varituhu Kraes. 23God neke tabara ghau ka ia tabara ta toraina vona. Ghau oka meha mala nodi noni mala varituhu la ghu ira noni. 24Ghau taremehagu noni kiloau, ghau mu geala o sopai au va gima ma leghuina heve doli noke auina ghau ka ia fafata kudo ghau God.

Ira Taka Varihio Ghu Nia Ira Nabokodi Fotati

25Ghidira ira fotati ta kupi mu, e deo ungene va gigima ta auna ka ara ta sipa mehana ka ia Lod, ghe ara a boka va kahe ghini ghau mo nganganagu ini, vununa ka ia dudumana ghinagu ia Lod no boka mo ghu ghau va hohoghonauna. 26Ka nganganagu ini mu, vununa ghini mamarutana iahi ghatunaina, e veha ghu ka ghau ta au va gimana ma ka doli ta aui nia ghau. 27Noto kuru ghaseborou la, oka ke hadu ghini puhi ghu ta mala ke kainina manei. Noto deo la go varihio ghu, oka hadu ghaseboro ghu. 28Ghe noto age varihio la, agho e deo go rivai muko ghu; nia neto varihio la kaike kupi, manei e deo ge rivai muko ghu. Nga heiri ira ta varihio mu edi age talari ghatu tehi mamarutanani ka doli iahi, na deo ghu ara kabai ghinina ta dufu ghauna ianimu.

29Ghau taremehagu noni ta va hohoghona, ia fafahakanana na kabai ghini ghauna ara ta avohina ghau mu, ia fafata tataniga ghatunaina take la leghu meha ghu kraes mu ne ponoe. Tatanigai ghatunaina vai vona ghu mu, heiri ira ta kuru ghaseborodi geala edi au taghe ta deo ghaseborodi, edi ghua; 30heiri ira ta muko hihingo ghidi ira ta leme, maneri geala taghe dike deo ma gedi ke muko hihingodi ghu edi ghua; heiri ira ta va manemane, maneri geala taghe dike deo ma gedi ke va manemane ghu edi ghua; heiri ira ta tatabara leghutau mu, maneri geala taghe eka nodi ghu taghodi mala suterira, edi ghua; 31ira leghutau ta riva ghidi nia taghori ghita ka malau iahi peka mu geala daka ngana va tongovonari ghu ghita, vununa heve ta finini iahi ghita ghatunaina ka malau iahi peka mu, e age nogha ghatu.

32Ara na kabai ghini ghau ta kalasana ka ia ngana tahui doli iahi peka. Ia mane taka varihio ghu mu e ngana tahui ia riva ka ia Lod, vununa e kabai ghini ta veha vananina ia Lod. 33Nga ia mane ta varihio mu, e ngana tahuri ira leghutau ka malau iahi peka nia e kabai ghini ta veha vananina ia ghaseborona e ghua, 34e age fota ghu ira lao hihingo ka manei. Ia fotati taka varihio ghu, ba ia kupi mu, e ngana va tahuri ira riva ka ia Lod: Manei e kabai ghini ta meha au va lotorona ka ia tinina nia ia tarungana. Nga ia fotati ta varihio mu, e ngana tahuri ira riva ta nona malau iahi peka nia e kabai ghini ta veha vananina ia keranau, e ghua. 35Ara na kahei iahi malana ia veha ka taghoughi; e deo ga nai vananigho puhi mala leghuri ghu agho, nga na kabai ghinigho ta riva ghinina heve ia ta lotoro, mala torai riva vanani va vehana ia Lod.

36Neto nganai la kaike mane e veha ge age varihio la ka ia fotati ta paru taremehana taghona, vununa ne puina kabai epu taremehana neto ghua la, e veha ka manei ta leghuina nona lao hihingo ani e to varihio ghu ka fotati ani. E deo ge zea ghu ianimu. 37Nga ia mane neto ngana va gigimai la ta mala deona ge varihio ghu ka fotati ta paru taremehana ani manei, nia boka kopuna ghini mo tuna taghonai ka rivai sasake neto ghua la, nia deo tuna hei ne va tutuufu ghinina taka mala hioina ghu fotati ani neto ghua la, manei ne riva ghini mo heve ia ta veha neto deo la ge varihio ghu ka fotati ani. 38Ne lotoro mo ghu mu ia mane ta varihio ka ia fotati ta paru taremehana manei ka ta riva ghini ani, ghe ia mane ta deo ge varihio ghu ka ia fotati ta paru taremehana mu ne riva va veha fuludu laoni.

39Ia ghaseboro mu, e parekete fuludai taremehana keranau taghe ka ia doli ta au ghu manei. Nga neto leme la ia keranau, ghe ge kalasa nga take varihiona ka hei mane ta kabai ghinina manei, ghe mane ianimu e toraina nona ia Lod. 40Ka nganganagu ini ara mu, manei e age va ghaseghase fuludu laoni, ge to au ghase korogha la ma manei, nia ka nganganagu ini ara na kuruau haro ia Tarunga ka God ka ia kahei iahi.