1 Corinthians 9

Mana Nia Rivana Ka Ia Mane Nonomoho

1Ghau to avohi mu ta boka riva ghidira ara ira heve ta kabai riva ghidi taghogu. Nia ghau haro to avohoau ta kaike mane nonomohona ara. Nia ghau to avohi molamo nake fini hibaguna ara ia noda Lod Zisas. Nia ia va hohoghona ka ghau ka ia Lod mu fuana riva iahi ka ara. 2Geta deo ghu ira keha noni gedi fini avohoau ghu ta kaike mane nonomohona ara ghe, ka ghau mu ara mu torai kaike mane nonomoho. Vununa ia foforuna doli ka ghau ka ia parekete taremehana Kraes mu ne va podolina ta kaike nona mane nonomoho hohoghonana ara ia Lod.

3Iahi lamu ungene tughuna ka ara ka heiri ira ta fateau. 4Vununa ara mu kaike mane nonomoho e kuruau ghu mana mala fangari ghanona nia ketuhuna ira noni kiloau. 5Nia e lotoro haroma ga kabai varihio la ara ka kaike fotati ta va hohoghona mala hio taremehaguna ka ia ghahe liloho ara ta turi ghini kave ghu ia Nonomoho ta Veha. Ira keha mane nonomoho nia ira tahina mane ia Lod nia Pita e ghua, dike riva ghini haroma ianimu. 6?Ba heve, ghai palu Banabasi lama mu ta toraina riva mala tabararira ira leghutau ta kabai ghidi ghai palu?

7Ira mane magara ka ia punugara mu edika tabarari ghu taghodi ira leghutau ta mala riva maneri. Nia hei ia ta numa gerepi lama mu ta boka mahaina ka ira fuadi nona gerepi. Nia hei ia ta pohi sipisipi ge ketuhu miloki ghu ka ia nona sipisipi, e ghua. 8Iahi mu eka ngangana ghu ma ka noni, vununa e varifata ma ka heve ne kaheina ka ia vetula Mosese. 9Vununa ka ia vetula Mosese, ne kahe ghua iahi “Oka piliga kaputi ghu ia mangana bulumakau ka ia fafata ta dekedeke va lufuru kai kafuna witi manei.” ▼

▼9:9 Ngengene 25:4

?Heve, God mu ne ngana hetari ira bulumakau? 10Deo, manei neke turi ghini ghita haroma ghita ira ta riva vanani taghona. Hei ia ta pake, nia hei ia ta numa mu edi rangerange ta hio tufana ka heve dike riva ghini varigharao.

11Ka ia tuturi beana vanamu ghai palu ia Nonomoho ta Veha mu, taghe na numa ghini ia subuna doli taremehana Kraes ka vari hoataimu ghau e ghua. Ghau e fata mo ghu vanamaira ira leghutau ta mala toka ghini ghai ka tinimaidi. 12Dito kururi la mana iahi ira keha ta vari va kakahei mala hio leghutauna ka ghau, ghai palu geala a fata fuludu laoni ta mala toka ghini ghaina ghau vununa nake toka ghini ghau hohoghona. Ghe ghai deo gake va kahe ghini ghau ghu ta toka ghini ghaina. Nga nake lao hihingomai ta vavahagalana ka ira dolimai, vununa e deo ga kabai va gogohai ghu ia Nonomoho ta Veha ghinina Kraes.

13?E deo go avohi ghu ghau mu ta hio ghedi ghanona ka ia Sugana God mu heiri ira ta riva ka ia Sugana God, nia ira ta riva ka ia sopebeana gedi hio tufa ghu ka heve ta veala ghidi ari ka ia sopebeana, ta ghuana? 14Ka ghaghahena haro ianimu la, ia Lod neto ke ungene va gigimai ghidira heiri ira ta tuturi beana ghini ia Nonomoho Ta Veha geala edi hioi ia tabaradi ka heiri ira ta nomohi.

15Ghe ka ira mana ta kuruau ara vununa ara mu kaike mane nonomoho, ara e deo gake va rivari ghu. Nia ara e deo ga kangavi ghu iahi ka ia rangerangei ta age riva vanaguna ghau kokolodi leghutau irahi. E veha fuludu lao mu ta lemena ara, fuludu laoina ia ta hio kai tagu ia va varavarangana tuturi beana ghini kakato ia Nonomoho ta Veha. 16Geta ghua ghu ianimu ghe, ka ia tuturi beana ghini ara ia Nonomoho ta Veha mu, eka leghutau ta boka mala helahela ghinagu ghu ara taghogu, vununa God neke kahe va gigimauna ta mala riva ghinina ara. E mamaghuana fuludura ka ara nato deo la ga tuturi beana ghini ghu ia Nonomoho ta Veha.

17Nato ke riva ghini la ara iahi ka ia lao hihingo taghogughi, e lotoro mo ta age hioina ara ia tabaragu. Ghe e deo heveni ta boka riva ghinina ara vununa God neke faeteauna ghe na riva ghini nga ara riva iahi. 18?Heve ghu mu tabaraguna ara? Iahi lama: Ia ta tuturi ghini beana kakato ara ia Nonomoho Ta Veha, ta deo ghu ga va rivari ghu ira mana ka ara ka ia tuturi ghini.

19Vununa ara na deo ga hioi ghu ia tabaragu e deo ghu hei ka malau iahi peka ta faghina kaputu auna, taghe nona mane mala varituhu ta ghua ghinaguna. Ghe ara nato ke meha kaike mane mala varituhu ka ira noni haroharo mala hio haghele meharira ka Kraes tehi noni. 20Ka ira noni Ziu, ara nake meha taghe kaike noni Ziu nake ghua, mala hio haghelerira maneri ka Kraes. Ka heiri ira ta au ka pekana ia vetula ira Ziu, ara nake meha taghe kaike mane ta au ka pekana ia vetula ira Ziu nake ghua, (geta deo ghu taghogughi auna ka pekana ia vetula), mala hio haghelerira ka Kraes heiri ira ta au ka pekana ia vetula. 21Ka ia au taremehadi ara ira noni taka Ziu ghu, ira ta deo gedi leghui ghu ia vetula ka ira Ziu, ara nake au taghe maneri nake ghua mala boka hio haghelerira ka Kraes. Ghe ara e deo ga nganakaini ghu ia vetula ka God, vununa ara na leghui ia vetula ka Kraes.

22Ka ira ta paeke ka ia va hohoghona, ara nake au taghe ta paeke nake ghua taremehadi maneri mala hio haghelerira ka Kraes. Uve, ara na leghuri mamu ira ghaghahedi doli ka ira sopai noni, mala ga boka hio va doliri la kehara, nake ghua. 23Ara na riva ghidi leghu irahi nga mala va ongahina ia Nonomoho ta Veha, mala hio tufana ka ira va beana ta meha ka ia Nonomoho ta Veha.

24?E deo go avohi ghu ghau ka ia varighohi mu, ta purudura ira leghu ta purudu nga, ghe ta hio tabarana ma kaike mo ka maneri? O purudu va kato ghu ghau mala meha kenuna, ta hioina ghu ia tabara. 25Leghu ta varighohi nga ka ira hilava mu, edi toraina leghuri ira puhi mala leghuri ka ia sikolui hilava va veha, e mala fata ghu ka varighohi ira tinidi. Maneri edi riva ghini ianimu mala hioina ia tabara ta age nogha, nga ghita mu da riva ghini mala hioina ia tabara ta age au toghunai. 26Na ghua mamu ara ghe na purudu lotoro lao nga ka ia va nonoghana. Ara mu taghe kaike mane bokeseni ta dupa kolanga lao meha e deo ga ghua ghu. 27Ara na vatana va gigimaina tinigu ini, e mala fata ghu ka heve ia ta mala riva ghini. Vununa e deo ge veha ghu ta turi ghini kavena ara Nonomoho ta Veha iahi ka ira keha noni, ghe leghunana deo tabaragu ma tuna ta hioina, ta ghuana.