1Jo 1 | KjiSC | STEP | Ara na kakangava vanamu age ghau ghinina ia Saoro ta va meha doli ta hohoghona ka ghita. Zisas Kraes mu ia Saorona Doli. Manei neke to kusu au ghe neke va vuhai nga God malau iahi peka. Ghai nato ke nomohi nia ghai nato ke finini manei ka hibamai idi taghomai; uve, ghai nato ke finini nia nato ke posini manei ka kamemai idi haro.

1 John 1

Va Kenuna Pagahaina: Ne Heve Ghe Da Boka Kaike Au Vari Parekete Varighara Taremehana Nga Ghita God 1:1–2:27

Zisas Kraes Mu Ia Saorona Doli

1 Ara na kakangava vanamu age ghau ghinina ia Saoro ta va meha doli ta hohoghona ka ghita. Zisas Kraes mu ia Saorona Doli. Manei neke to kusu au ghe neke va vuhai nga God malau iahi peka. Ghai nato ke nomohi nia ghai nato ke finini manei ka hibamai idi taghomai; uve, ghai nato ke finini nia nato ke posini manei ka kamemai idi haro. 2 Saoro ta va meha doli ta hohoghona iahi mu neke meha noni. Ghai nato ke finini manei. Nia ghatunaina mu ghai na va kahe ghini ghau ia hohoghona ghinina manei, taghe manei mu ia kaikena ia ta va meha doli soduai, ia ta age au tudu ma ta au ghu. Nia sepaoni manei neke au taremehana tudu ma God ia Mama, nia ghatunaina ia Mama, geto va podoli ghu manei ka ghai, e ghua. 3 Ghai na va kahe ghini ghau heve nato ke finina nia nomohina, mala ghau o age holara taremehamai ghu ka ia kaike au vari parekete varighara taremehana ia Mama nia taremehana Zisas Kraes ia Tuuna, e ghua. 4 Ara na kangavi iahi o mala age va hohoghona varighara ghu ghau taremehamaina ghai, age torai hokotona ia va ghazaghaza ka ghita.

God Mu Fegala, Da Toraina Au Ghu Ghita Ka Ia Fegala

5 Iahi mu ia Nonomoho nato ke nomohio ghai ka ia Tuuna God, na kahe kave vanamu age ghu ghau: God mu fegala, e deo nagoromo ghu ka giliona manei. 6 Dato kahei la ghita da au vari parekete varighara taremehana God ta ghuana, ghe au ma tuna ka giliona nagoromo dato ghua la, ghita mu da sesebo ghu ka ira ngengeneda nia ka ira riva ghita, e ghua. 7 Nga dato au la ghita ka ia fegala, taghe God la, ia ta au ka ia fegala ta ghuana, iamu tuna ghe gada kaike nga, ka ia parekete vari namo varighara taremehadira ira keha, va mamalahu ghitana ka ira leghu sasake nga ka ia busakana Zisas ia Tuuna God.

8 E deo ghita sasake dato ghua la ghita, da sebo ghita ma taghodai, e deo hohoghona ghu ta auna ka gilioda ghita. 9 Nga dato kahe kave vanani la God ira sasake ka ghita, manei e sutei ia nona naiungene, e riva ghini ghu heve ia ta lotoro: manei e age kai hazari ira sasake ka ghita, e age va mamalahu ghita ghu ka ira riva ta zea ghita. 10 Ghai mu e deo sasake ta riva ghinina dato ghua la ghita, God mu ne sesebo da ghua ghu da kaheina ghita, e deo ghu auna ka gilioda ghita ia ngengene ka manei.