1 John 2

Kraes Ia Noda Toka

1Ghau nogu rekaha, ara na kangava agei iahi ka ghau, mala oka age rivai sasake la ghu ghau. Ghe neto age sasake la hei noni, ghita e au ghita mo kaikeu, Zisas Kraes ia ta lotoro, ta tetu fanga vanadana ghita ka ia Mama mala kai hazarira ira sasakeda. 2Manei taghonai neke leme vanada ghita taghe kaike veala ta ghuana, taghe mala kai hazarira ira sasakeda ghita, nia eka ghua ghu ma ira sasake ka ghita lama, nga ira sasakedi haro molamo ira leghu noni nga ka malau iahi peka.

3Dato leghuri la ghita ira ungene va gigima ka God, ghe gada age avohi nga ghita da torai avoho va vehai manei ta ghuana. 4Nga da avohi manei dato ghua la ghita, ghe deo ma gada leghuri ghu ira nona ungene va gigima dato ghua la, ghita mu noni seseboda, e deo ghu hohoghona ta auna ka gilioda ghita. 5Nga ghita ira ta leghui ia saorona God mu, da toraina hohoghoda va podolina ia kamotona noda namaha ka manei. E ghua ianimu ghe gada avohi nga ta au vari parekete varigharana ghita taremehana manei. 6Heiri ira ta kahei taghodi di au vari parekete varighara taremehana God ira ta ghua mu, geala ia au ka maneri taghe ia au ka Zisas edi ghua ghu.

Kraes Ne Ungene Va Gigimai Ta Vari Namahaina Ghita

7Ghau noni taremehaguro, ara e deo ga kangava vanamu ghu kaike foforuna ungene va gigima, nga ia sesepana neto ke au ghau tuduno lama ghau ka ia torai tatanigainani. Ia sesepana ungene va gigima mu e ghini ma ia nonomoho noto ke kusu nomohio ghau, geala ghau o vari namahai, ia ta ghua. 8Nia geta dato ke kusu nomohi mo ghita ghe, manei mu taghe kaike foforuna ungene va gigima, e ghua. Vununa ia namaha ta vanada ghita Kraes mu, ne va podolo vanada ia hohoghonana hangana mala namahai noni. Nia ia namaha ta kuru ghau tuna ghau malamu vari taghomughi, ge va podoli molamo vetula iahi mu taghe kaike foforuna vetula ta ghuana, e ghua. Nia dato vari namahai la ghita, ira puhi ta nagoromo edito tatanigai ogoro nia ia puhina ta veha Kraes tuna ge podolo kave ghu taghe fegala ta ghuana ka giliodi ira dolida ghita, e ghua.

9Dato kahei la ghita da au ka ia giliona fegala ta ghuana, ghe kikipana ghidi mo tuna ira keha noni ta va hohoghona dato ghua la, ghita mu da au ngama ka ia nagoromo ka torai fafata iahi. 10Dato namaha ghidi la ghita ira keha noni to va hohoghona, ghita mu da au ka ia fegala, e deo ghu heve ta auna ka gilioda ghita ta va riufu ghita laona ka sasake. 11Nga dato kikipana ghidi la ghita ira keha noni ta va hohoghona, ghita mu da au ngama nia ghaghahe ngama ka giliona nagoromo. Ghita mu e deo ghu gada avohi gheda ghu hae mo da agena, vununa ia nagoromo neto ke va kiviri ira hibada.
12Ghau tuguro, ara na kakangava vanamu age,
vununa ira sasakemu ghau neto ke kai hazari God, ka heve neke riva ghinio Zisas.
13Ghau ira tato zeolo ka ia va hohoghona, ara na kakangava vanamu age,
vununa ghau to avohi Kraes neto ke kusu au mehao ghe neke vuha nga malau iahi peka.
Ghau ira noni foforu ta kodolo nga ta vona ghu ka ia nomu va hohoghona, ara na kakangava vanamu age,
vununa ghau noto ke paufi ia ginitauna ia muko.
14Ghau tuguro, ara na kakangava vanamu age,
vununa ghau noto ke avohi ia Mama.
Ghau ira tato zeolo ka ia va hohoghona, ara na kakangava vanamu age,
vununa ghau to avohi Kraes neto ke kusu au mehao ghe neke vuha nga malau iahi peka.
Ghau ira noni foforu ta kodolo nga ta vona ghu ka ia nomu va hohoghona, ara na kakangava vanamu age,
vununa ghau no gigima,
ia saorona God ne au ka giliomu ghau,
nia noto ke paufi ghau ia ginitauna ia muko, e ghua.

15A va kahe ghini ghau ghu ara, oka namaha ghidi ghu ira puhi ta muko ka malau iahi peka, ba ira leghutau ta muko ta nona malau iahi peka. Noto namaha ghini la ghau ia muko ka malau iahi peka, ghau e deo go namaha ghini ghu God ia Mama. 16Ira puhi ta muko ka malau iahi peka mu, eka sipa meha ghu ka ia Mama, nga sipa mehadi ka noni. Irahi ghu mu puhi ta mukora: ia ta leghuri ira leghutau ta kabai ghidi ia tini, ia ta kabai ghidi fuludu ira leghutau ta finiri, nia ta hadu varanga ghidi ira leghutau ta taghori taghodai, e ghua. 17Malau iahi peka niala ira vahina leghutau nga ta au ka ia giliona ta kuhana ghidi ira noni mu, edi age nogha, nga heiri ira ta riva ghini ia lao nanafa ka God mu edi age au toghunai.

O Ka Va Malumuri Ghu Ira Ta Kana Ghini Kraes Ta Sebo Ghauna.

18!Ghau tuguro, ia va nonoghana malau iahi peka to namo! Ghau noto ke nomohi ta la mehana Ia Kana Ka Kraes, to kusu podolo ghu mu tehini ka kana irahi Kraes. Ianimu la ghe da avohi nga ghita mu to namona ia va nonoghana. 19Sepao mu ira ta kana ghini Kraes dike au taremehada ghita. Ghe maneri dike ghahe kai ghita, vununa maneri deo gedi ke toraina va hohoghona ghu ka Zisas. Gedi ke kaike taremehada la ghita maneri, geala maneri edito ke au taremehada ghita. Ghe maneri dike ghahe kai ghita, ne va podoli ghu dike torai deona maneri gedi ke kaike taremehada ghu ghita.

20Ghe Kraes neto ke ghasolo vanamu age ia Tarunga Ta Maduana, to avohi ghu ghau haroharo mu ia hohoghona. 21Ta kakangava vanamu age ini ghu ara mu, ghau no deo go avohi ghu ia hohoghona, e deo ge ghua ghu, nga vununa ghau no avohi mo, nia ghau no avohi haro molamo ta deona ia sesebo ge boka kave meha ghu ka ia hohoghona. 22?Hei la ghu mu noni ta sesebo iahi? Manei lamu ghu mu ia ta kahei Zisas mu eka ghua ghu ia Kraes ia Va Doli, neke naiungene ghinio God mala va mehaina, neke ghuao. Kokolodi noni iranimu lamu ghu mu kanara ka Kraes, edi sokei ghu ia Mama niala ia Tuuna, e ghua. 23Vununa heiri ira ta sokei ia Tuuna mu, edi sokei haro molamo ia Mama. Heiri ira ta hioi ia Tuuna tuna, ge auri haro ghu molamo ia Mama, e ghua.

24Ghau o toraina leghui ma o au ghu heve dike va kakahe ghini ghauro ka ia torai tatanigaina. Noto sutei la ghau nonomoho ianimu, ghe go age au parekete taremehana tudu nga ghau ia Tuuna nia ia Mama, e ghua. 25Au vari parekete varighara iahi lamu ghu mu ia doli soduai neke naiungene ghinio taghonai Kraes vanadana ghita.

26Ara na kakangava vanamu agena leghutau irahi, mala va banabana ghauna ka ira noni ta kabai batu ghini ghau va zea. 27Nga ka ghau mu, Kraes to ghasolo vanamu age ia nona Tarunga Ta Maduana. Tarunga iahi ka manei e va kakahe ghini ghau ghidira vahina leghutau nga. Ta vari va kakahe ghidira ghu manei mu e hohoghodi, eka sesebodi ghu. To au ghu ia Tarunga Ta Maduana ka manei ka giliomu ghau, to deo ghu heini take kuhana ghinina ghau mala va kakahe ghini ghauna heve ia ta hohoghona. O leghui ghu ia vari va kakahei ka ia Tarunga, nia au vari parekete taremehana au ghu Kraes, e ghua.

Va Paluna Pagahaina: Ia Ghaghahena Ta Toraina Mala Au Ghita, Dato Kaike Au Vari Parekete Varighara Taremehana La God 2:28–5:21

28Uve ghau tuguro, o au parekete taremehana ma au ghu Kraes, mala ka ia ke la leghu mehana manei, o age toraina kuru ghau gigima ghu, deona go age poika ghini ghu manei ka ia haghava ghemu. 29Vununa ghita da avohi ta lotorona Kraes, da avohi haro ghu molamo ghita mu ta nona rekahana God mu heiri haroharo ira ta riva ghidi ira heve ta lotoro.