1Jo 3 | KjiSC | STEP | !Fini, God ia Mama ne toraina namaha ghini ghita, ne kahei ghu ta nona rekahana manei mu ghita! Ianimu lamu toraina hohoghonana ghu ghini ghitana ghita. Ne ghua mamu ghe, ne deo nga ge avoho ghita ghu ghita malau iahi peka, vununa maneri e deo gedi avohi ghu God.

1 John 3

Ghita Mu Nona Rekaha God

1 !Fini, God ia Mama ne toraina namaha ghini ghita, ne kahei ghu ta nona rekahana manei mu ghita! Ianimu lamu toraina hohoghonana ghu ghini ghitana ghita. Ne ghua mamu ghe, ne deo nga ge avoho ghita ghu ghita malau iahi peka, vununa maneri e deo gedi avohi ghu God. 2 Ghau noni taremehaguro, ghita mu dato meha nona rekaha mamu God, ghe manei e deo nga ge va podolo vanada ghu mu taghe heve tada age ghuana ghita ghatu. Ghe ghita da avohi mo mu taghe Kraes ta age ghuana ghita ghatu ka ia leghu mehana manei, vununa ghita da age finini ghatu Kraes taghe torai taghonai ta ghuana manei. 3 Heiri haroharo ira ta kururi rangerange iahi ka Kraes mu, edi nai va mailori ghu taghodi, taghe Kraes la ia ta mailo.

4 Rivai sasakena mu fafahakanana, sokei ia vetula ka God. Vununa ghini iahi, heiri haroharo ta rivai sasake ta au ghu mu, di huhai God nia ia nona vetula, e ghua. 5 Nia ghau go avohi ghu neke meha mala hio kairira ira sasake ka ghita mu Zisas, e deo ghu sasake ta auna mu ka manei. 6 Heiri haroharo ira ta au parekete taremehana ghu Kraes mu, edika riva ghidi la ghu gedi au ghu ira sasake. Nga hei ia ta rivai sasake ta au ghu mu, e deo ge va fafahaki ghu hei mu Kraes na nia e deo ge avohi ghu manei, e ghua.

7 Ghau tuguro, oka va malumi ghu hei noni ta sebosebo ghauna ghinina ia au ta lotoro, e ghua ghu. Hei noni ia ta riva ghini heve ia ta lotoro mu, e lotoro taghe Kraes ia ta lotoro, e ghua. 8 Hei noni ta rivai sasake ma ta au ghu mu, e nona ia Faghinadi ira nazahi, vununa ia Faghinadi ira nazahi mu, neto ke rivai sasake ka ia torai tatanigainani. Ghe ia Tuuna God mu neke meha mala huarari riva irahi ka ia Faghinadi ira nazahi. 9 Ira noni ta tuuna God mu, edika rivai sasake ghu gedi au ghu, vununa ia toraina aꞌauna taghonai God to au ka giliodi maneri. Nia vununa God mu ne nodi Mamana maneri, e deo ghu maneri boka rivai sasake ma ta auna ghu. 10 Ghatunaina mu ghita da boka fini avohi mo ghu heiri mo mu ta nona rekahara God, nia heiri mo mu ta nona rekahara ia Faghinadi ira nazahi, e ghua. Heiri ira ta deo gedi au va lotoro ghu ta deo ghu gedi namaha ghidi ghu ira keha noni ta va hohoghona mu, eka nona ghu God.

Vari Namahai

11 Ia nonomoho noke nomohio ghau ka ia toraina tatanigaina mu iahi: Ghita da toraina vari namahai, e ghua. 12 Ghita mu taghe Keni daka puina ghua la ghu. Manei mu neke nona ia ginitauna ia muko, neke atungio ghu Ebolo ia tahina mane taghonai. ?Neke heve ghe neke atungi nga manei Ebolo? Vununa Ebolo neke lotoro nia ira aꞌauna doli ka manei e ghua, neke va podoli ia aꞌauna doli ka Keni neke muko fuludu. 13 Oka nomu fere la ghu ghau tahiguro, dito kikipana ghini ghau la ira noni ka malau iahi peka.

14 Dato namaha ghidi la ghita ira tahida ka Kraes, ianimu ne va podoli ta kalasana ghita ka ia manana ia leme nia tato hioina ghita ia doli fuludai, e ghua. Nga ia noni ta deo ge namaha ghidi ghu ira tahina ka Kraes mu, e au ka pekana ia manana ia leme. 15 Hei ia ta kikipana ghidi ira keha noni mu, e toraina noni vari atunguna ghu ka ia hihingona. Ghau no avohi mo ghu ta deori doli soduaina ka giliodi maneri mu ira noni ta vari atungu. 16 Ka ia leme vanada Zisas, manei neke va podolo vanada ia ghaghahena ta mala namaha ghidi hohoghona ira noni. Vununa ka va fafahaka iahi, ghita geala da lao hihingoda mala leme vanadira ira tahida ka Kraes. 17 Hei neto kuru ghena nona la mala au vehana ka manei, ghe deo tuna ge toka ghidi ghu ira ta malanga ta ghuana, ia namaha ka God mu e deo ge au ghu ka ia doli manei.

18 Ghau tuguro, ghita daka mala kakahe ghu na vari namahai ghemai, ta ghuana; nga ghita da toraina va podoli hohoghona namaha ianimu ka ira riva ghita. 19 Ka ia toraina vari namahai taghe ianimu ia ta ghua ghita, ghita da age toraina avohi ta nonana ghita God ia ta va podolo vanadi ira noni heve ia ta hohoghona. Dato vari namahai la ghita, bule ta age auna ka ira hihingoda ka ia fafata ta age tetu ghita ka kenunao God. 20 Geta va kahe ghini ghita ghu ira nganganada ta hoto ghitana sasake ghe, ghita da age au ka bule ghatu, vununa ia nganganana God mu e faa fuludi ia nganganada ghita. Nia manei ge avohori haroharo ghu ira leghutau ta riva ghidi ghita, e ghua.

21 Vununa ka iahi, ghau noni taremehaguro, ka ia avohi ghita ka ira nganganada ta deona gada rivai sasake tudu ghu, ghita e deo gada age maugheda ghu ka ia tarai lao ghita ka God. 22 Heve leghutau tada fangaina ghu ghita mu, da age hiori ghita ka manei, vununa ghita da leghuri ira nona ungene va gigima nia da riva ghidi heve ira ta veha vanani manei, e ghua. 23 Iahi ghu mu ungene va gigimana ka manei: Ghita da toraina va hohoghona ka ia babaolona Zisas Kraes ia Tuuna, nia da toraina vari namahai taghe neke ungene va gigima ghitao manei. 24 Heiri ira ta leghuri ira ungene va gigima ka God mu, edi au parekete taremehana God, nia God ge au parekete taremehadi ghu maneri, e ghua. Nia vununa ka ia Tarunga neto ke vanadao God, da avohi ghu ghita mu ta au parekete taremehadana God.