1Jo 4 | KjiSC | STEP | Ghau noni taremehaguro, oka va hohoghonari ghu heiri haroharo ta kahei di auri ia Tarunga Ta Maduana ira ta ghua, nga o va sisiva hadu kaveina o finini ghu taghe neto sipana la mamu ka God mu tarunga iahi. Vununa tehi porofeti ta seseboni dito ke kave laora ka ira leghu pelodi nga ka malau iahi peka.

1 John 4

Ia Ghaghahena Ta Mala Fini Avohori Ira Ta Vari Va Kakahei Sesebo

1 Ghau noni taremehaguro, oka va hohoghonari ghu heiri haroharo ta kahei di auri ia Tarunga Ta Maduana ira ta ghua, nga o va sisiva hadu kaveina o finini ghu taghe neto sipana la mamu ka God mu tarunga iahi. Vununa tehi porofeti ta seseboni dito ke kave laora ka ira leghu pelodi nga ka malau iahi peka. 2 E ghua ghu iahi mu ta boka mala age avohina ghau ne Tarunga mamu ka God, ba deo ta ghuana: Hei neto kahe kavei la Zisas Kraes mu neke meha doli noni ta ghuana, noni ianimu ne kurui mamu ia Tarunga ka God. 3 Nga hei neto deo la ge kahe ghua ghu ianimu ghinina Zisas, manei e deo ge kurui ghu ia Tarunga ta sipa meha ka God. Ia tarunga ka manei e meha ka ia kana Kraes. Nia ghau noke nomohi ia kana ka Kraes e la meha ta ghuana, to kusu meha ghu mu manei ghatunaina ka malau iahi peka.

4 Nga ghau ira nogu rekaha mu nona noni God. Ghau noto ke sokei ghu ia va kakahe ka ira ta vari va kakahei sesebo, vununa ia Tarunga ta Maduana ne au ka giliomu ghau. Nia ia Tarunga ta Maduana mu e mana fuludu laoi Satana ia ta kopuna ghidi ira noni ta deo gedi avohi ghu God ka malau iahi peka. 5 Sesebodi porofeti iramu ghu mu edi nonidi ka malau iahi peka ira ta deo gedi avohi ghu God. Ia vari va kakahei ka maneri mu, e suna ngangana ma ghu ka ira noni ka malau iahi peka. Ira noni taka avohi ghu God mu, edi va hohoghona ghu ka heve ia ta kahei ira porofeti ta sesebo. 6 Nga ghita mu nona God, edi nomoho ghita ghu ghita mu heiri ira ta avohi God. Hei neto deo la ge nona ghu God, maneri e deo gedi nonomoho ghu ka ghita. Ka irahi lamu ghu mu ta boka avohina ghu ghita mu, iahi mu ia Tarunga ka ia hohoghona, ba, ne tarunga sesebona, ta ghuana.

Vari Namahai

7 Ghau noni taremehaguro, ghita da toraina vari namahai, vununa namaha mu e sipa meha ka God. Hei ia noni ta namaha mu, e nona rekaha God, e avohi ghu God. 8 Nga hei noni ia taka namaha ghidi ghu ira keha noni mu, e deo ge avohi ghu God, vununa God mu namaha. 9 God neke va fini ghini ghita ghu ia nona namaha vanada ghita, ka ia tuhu mehai manei ia Tuuna kaikena ka malau iahi peka, mala gada boka la hioina ghita ia doli soduai, ka heve neke riva ghinio manei. 10 Iahi ghu mu toraina namahana: ghita mu dake namaha ghinina God eka ghua ghu, nga manei mo neke namaha ghini ghitana, neke tuhu mehaina ghu ia Tuuna, neke meha taghe kaike veala neke ghuao, mala hio kairira ira sasake ka ghita.

11 Ghau noni taremehaguro, neto ke ghua la iahi namaha ghini ghitana God, ghita geala da vari namahai ghu. 12 E deo kaike noni ghu neto ke fininina God, ghe dato vari namahai la ghita, God e au parekete taremehada ghita, e age podolo hohoghona ghu ia namaha ka manei ka ira dolida ghita.

13 God neto ke vanada ghu ia nona Tarunga ta mala va podoli ta auna ghita ka giliona manei, nia ta auna manei ka gilioda ghita, e ghua. 14 Nia ghai nato ke fini hibamai neke tuhu mehaina ia Mama ia Tuuna, mala meha hio va dolirira ira noni ka malau iahi peka, na va kahe ghidi ghu ira keha noni. 15 Dato kahe kavei la ghita, Zisas mu Tuuna God ta ghuana, ghita mu da au parekete taremehana God nia God ge au parekete taremehada ghu ghita, e ghua. 16 Ghita mu da toraina avohi nia da va hohoghonai ta namaha ghini ghitana God.

Namaha mu sipa mehana ka God. Heiri ira ta namaha ghini God nia ira keha noni e ghua mu, edi au parekete taremehana ghu God, nia God ge au parekete taremehadi ghu maneri, e ghua. 17 Dato au parekete taremehana la ghita God, ia namaha ka manei e age toraina podolo kave va veha ka ira dolida ghita, e deo ghu boka age maughedana ghatu ka ia ravata mala varifate. Vununa ka ia auda ghita ka malau iahi peka, ghita dake au taghe neke ghuao Kraes, dake ghua. 18 Dato maugheda la ghita, ghita e deo gada zaghara haghele va veha lao ghu ka ia namaha God ia ta malada ghita, vununa da nganaina ghita mu, God e age va kilasa ghita, da ghua. Nga geala ghita mu daka maugheda ghu, vununa ia namaha hohoghona ka God e hio kairi leghu mamaghu nga ka ghita.

19 Da vari namahai nga ghita mu, vununa manei neke kusu namaha ghini ghitana. 20 Na namaha ghini God dato ghua la ghita, ghe kikipana ghidi tuna ira keha noni ta va hohoghona ka Kraes dato ghua la, ghita mu da sesebo. Vununa ira noni e deo gedi boka namaha ghini ghu God, ia ta deo gedi finini ghu, dito deo la maneri gedi namaha ghidi ghu ira keha noni ta va hohoghona ka Kraes ira ta finiri maneri. 21 Ungene va gigima neto ke vanadana God mu iahi: Hei ia ta namaha ghini God mu, e toraina namaha ghidi molamo ira keha noni ta va hohoghona ka Kraes, e ghua.