1Jo 5 | KjiSC | STEP | Hei ia ta va hohoghonai Zisas mu ia Kraes ia Va Doli neke naiungene ghinio God mala va mehaina mu, e kaike rekaha ka God. Nia heiri haroharo ira ta namaha ghini ia mama mu, edi namaha ghidi haro molamo ira nona rekaha.

1 John 5

Ira Nona Rekaha Hohoghona God Mu Edi Namaha Ghini, Leghui Ia nona Saoro Nia Va Hohoghonai Zisas Ta Tuunana Manei

1 Hei ia ta va hohoghonai Zisas mu ia Kraes ia Va Doli neke naiungene ghinio God mala va mehaina mu, e kaike rekaha ka God. Nia heiri haroharo ira ta namaha ghini ia mama mu, edi namaha ghidi haro molamo ira nona rekaha. 2 Dato namaha ghini la ghita God, dato leghuri ghu ira nona ungene va gigima, ghita da avohi mo ta age namaha ghidira ghatu ghita ira nona rekaha God. 3 Fafahakanana ia namaha ka ghita ka God mu, ghita da leghuri ira ungene va gigima ka God e ghua, eka mamarutana la ghu leghurira mu ungene va gigimara ka manei. 4 Vununa leghu rekaha nga ka God mu edi boka paufi mo malau iahi peka. Ghita mu da paufi ghu malau iahi peka ka ia noda va hohoghona. 5 ?Hei ghu mu ta boka sokerira ira puhi ta muko ka malau iahi peka? Heiri ira ta va hohoghonai, Zisas mu Tuuna God, ira ta ghua lama.

Ia Turi Ghini Kave Zisas

6 Da avohi nga ghita Zisas Kraes Tuuna God ta ghuana mu, vununa ka ia mehana manei ka malau iahi peka, manei neke seselebeana ka kolo nia ia busakana ge oraha kave ghu ka ia lemena manei, neke ghua. Manei deo geke suna seselebeana kakato ma ghu, nga manei neke leme molamo. Ia Tarunga Ta Maduana ne va kahe ghini ghitana mu Zisas mu Tuuna God ta ghuana, eka sesebo la ghu mu ia Tarunga Ta Maduana. 7 Lito leghutau mu ne va podolo kaveina heve ia ta hohoghona ghinina Zisas Kraes: 8 ia Tarunga, heve neke dufuna ka ia seselebeana manei, nia heve neke dufuna ka ia leme nia tetuleghu manei, e ghua. Lito leghutau irahi di va podolo kavei ka ghita kaike leghutau; Zisas Kraes mu ia Tuuna God. ^{▼▼5:8 Lito leghutau mu ta aura ta va podolo kaveina Zisas mu ia Tuuna Mane God ta ghuana. Va kenunana mu ia kolona sesele beana, vununa ka ia sesele beanana Zisas God neke kahei “Iahi mu Tuugu Mane Ara,” neke ghua. Ia va paluna mu ia busakana manei neke oraha kaveo ka ia hekefalahata. Leghuna ia lemena Kraes ka ia hekefalahata maladira ira sasakeda ghita, God neke kahe kavei Zisas mu ia Tuuna Mane taghonai neke ghua, ka ia ke tetuleghuna manei ka ia leme. Va litonana mu ia Tarunga Ta Maduana ta va kahe ghini ghita ka hihingoda nganganada idi, dike toraina dufura leghutau irahi, nia ta Tuuna Manena God mu Zisas, e ghua.} 9 Dato va hohoghonai la ghita ia tuturi ka noni, ge heve soni mu va hohoghonaina ghita ia tuturi ta gigima fuludu laoni ta sipa meha ka God. God lamu ghu mu neke turi ghini kavena mu ia Tuuna taghonai. 10 Heiri haroharo ira ta va hohoghona ka ia Tuuna God mu, edi avohi ghu ka ira hihingodi ta hohoghonana tuturi iahi. Nga ira noni taka va hohoghonai ghu tuturi iahi mu, di toraina kahei, God ne sesebo di ghua, vununa maneri deo gedi va hohoghonai ghu heve neto ke turi ghinio God ghinina ia Tuuna.

11 Iahi ghu mu neto ke turi ghini kavena God: God neto ke vanada ia doli soduai, e meha ghu ka ia Tuuna manei mu doli iahi. 12 Hei ia ta au parekete lao ka ia Tuuna mu, e kurui doli iahi; nga hei ia ta deo ge parekete lao ghu ka ia Tuuna God mu, e deo ge aui ghu doli soduai iahi.

Ia Doli Soduai

13 Ara mu na kangava agei iahi ka ghau ira ta va hohoghona ka ia babaolona ia Tuuna God, o mala avohi ghu ghau ta kuru ghauna doli soduai. 14 Ghita da avohi ta age nomoho ghitana God, dato fangai la ghita manei ia heve leghutau ta lotoro taremehana ia lao nanafa ka manei. 15 Nia vununa ghita da avohi mo ta nomoho ghita mehana manei ka ia fafata tarai fanga lao ghita, da avohi ghu molamo ta age vanadana manei ghatu heve da fangaina ghita.

16 Noto fini la ghau ia noni ta va hohoghona ta rivai sasakena, ghau geala o fangai God mala hio va dolinina noni ianimu. Ianimu tuna ghe ge age vanani doli nga God noni ianimu. Ghe ara e deo ga turi ghidi ghu ira ta taghuru kaini kamoto God. Kokolona sasake ianimu ghu mu, e age fota fuludaini ka God noni ianimu. Ara e deo ga kahei ghu geala ghau o fangai God mala hio va dolinina ia keha noni ta riva ghini kokolona sasake ianimu, ta ghuana. 17 Vahina riva ta zea nga mu edi sasake haroma, ghe eka ghua ghu ira leghu sasake nga mu ta fota fuludainina ia noni ka God.

18 Ghita mu da avohi mo ta deona ira rekaha ka God rivai sasake ma ta laona ghu, vununa ia Tuuna God ne kagara ghidira maneri, e deo ghu ia ginitauna ia muko boka ngovalarira. 19 Ghita da avohi mo ta nona rekahana God mu ghita, geta au ghu malau kamoto iahi peka ka pekana ia kopu ia ginitauna ia muko. 20 Nia ghita da avohi ia Tuuna God neto ke mehana, neto ke vanada avoavoho ghu mala boka avohina ghita ia God ta hohoghona. Nia ghatunaina tuna gada to au parekete taremehana ghu ghita ia God ta hohoghona e ghua, vununa ghita da au parekete taremehana Zisas Kraes ia Tuuna manei. Iahi lamu ia God ta hohoghona, nia iahi lamu ia doli soduai, e ghua.

21 Ghau tuguro, o banabana ghini ghau taghomu, oka va totoana ghidi la ghu ira leghutau, god ira ta ghua ghidi ira noni, ghe ira taka God hohoghodi ghu.