1 Peter 1

Va Kenuna Pagahaina: Zisas Ne Hio Va Doliri Ira Tadi Va Hohoghona Ka Manei (1:1–2:12)

Ira Ungene Veha Ka Pita

1Leta iahi mu sipana ka ara Pita, ia mane nonomoho ka Zisas Kraes.

Ara mu na kakangava vanamu age ghau, ira nona noni God ta au birusuna lao ma ka malau iahi peka, ta pirara lao meha ghu ka ira babaradi aiamuhu Ponitasi, Galesia, Kapadosia, Esia, nia Bitinia, e ghua. 2God ia Mama neke faete ghau sepaoni ta mala au taremehana fuludaina, neto va maduana ghau ghu ka ia Tarunga. Ianimu la ghe, no leghui nga ghau Zisas Kraes, ne va mamalahu ghau ghu ira sasakemu ka ia busakana.

Ara na tarai fangai ia bule nia ia nona varisute ta va meha kakatoi God, e toraina vanamu va faa ma e lao ghu.

Ia Hio Va Doliri Ira Ta Va Hohoghona (1:3-12)

Ia Doli Ta Au Toghunai Mu Kaike Rangerange Ka Ghita Malana Fugho Nariha

3Helahela ghini God, ia nona Mama noda Lod Zisas Kraes. Vununa ka ia nona dudumana leghaha taghonai neke vanada ghu ghita ia doli foforu ka ia va tetuleghui Zisas Kraes ka ia leme. Iahi lama mu, ne va foudu ghitana ka ia rangerange ta au toghunaina, 4ianimula ghe, na fini kenui nga ghai ta age hio kadolorira ira va beana ta namanama ta suteri God maladi ira nona rekaha. Manei ne sute vanamu ghau ka malaunao fate, ka ia ta deo boka boedira, mukodira, ba dakodira.

Ghita Da Au Ghita Va Ghazaghaza Vununa God Neto Hio Va Doli Ghita, Geta Au Ghita Mo Ghu Ira Mamarutana Ghatunaina

5Nia God, ka ia nona gigima leghaha, e kopu ghini ghau ma o vuhai age hioi ghu ghau ia hio va doli, vununa ghau no rangerange ka manei. God ne au va tana mala va podolo kaveina ia namanamana ia hio va doli ka ghita ka ia ravata va nonoghana ka ia leghu mehana Kraes. 6Ghau no puina va manemane ghidi leghu irahi nga geta age vavahagala ghu ghau ka ira sopai kokolodi mamarutana. 7Vavahagala irahi mu mala va sisiva ghini ma ia nomu va hohoghona, mala va podolina ne toraina hohoghona mamu ta ghuana. Iahi mu taghe ira noni ta va sisiva ghini ia golu ka totoi mala hadu kaveina ne toraina golu mamu ta ghuana. Ia torai va hohoghona mu e au ma e au ghu ka ia fafata va sisiva ghini ka vavahagala. E tongovona fuludu laoi ghu ia golu taka au soduai ghu. Neto au va gima la ia va hohoghona ka ghau ka giliodi ira va sisiva ta mamaghuana, Zisas Kraes e age vanamu ghatu ia helahela, varanga nia ia va vonavona e ghua, ka ia ravata ta ke la podolo mehao manei ka malau kamoto iahi peka.

8Geta to deo mo toraina fininimuna manei ghe, o namaha ghini. Geta deo ghu go finini ghu ghatunaina ghe, o va hohoghona lao ka manei. O toraina va manemane ghu ka ia varangana va ghazaghaza ia ta toraina faa fuludu, ia ta deo ge boka turi va fafahaki ghu. 9Ghau no au ghau varangana va ghazaghaza ianimu, vununa ghau no hioi ia leghutau noke va hohoghonaio mala vanamuna God. Iahi mu ia neke hio va dolirio tarungamu nira manei.

Sepao Laoni Ira Porofeti Dike Kusu Kahe Kenui Ghinina Vari Va Doli Ta Mala Age Vanada Iahi God Ghatu

10Ira porofeti to kusu kahe kavei ia ghaghahena ta mala sute ghau God ghatu, dike hadu va gigima ghu mala hadu kave laoinani ia ghaghahena ta age hio va doli ghau. 11Ia Tarungana Kraes neke au ka maneri neke va kahe vanadi ghu ia ghaghahena ta age vavahagala Kraes nia age vanani tuna ira leghahaidi varanga ta pelara, ia ta ghua. Maneri dike hadu va gigima ghu mala toraina hadu kaveina hei mu Kraes na nia niha ta age dufuna iahi, e ghua.

12God neke va podolo vanadi ira porofeti ghidira ira leghutau dike to kaheriro mu, eka maladi ghu ma ira veha ka taghodi, nga neke malamu ghau mo. Heve dike to kaheriro ira porofeti mu, to va podolo vanamu ghau ghatunaina ira dike va ongahio ia Nonomoho Ta Veha vari hoataimu ghau ka ia Tarunga Ta Maduana neke tuhu hinae mehaio ka malauo God fate. Irahi mu ira leghutau geta ghua ghu ira engizeli ghe edi kuhana ghini mala matori ta va fafahakina ghu.

God Ne Holarari Ira Dolidi Ira Ta Va Hohoghona (1:13–2:12)

Geala Ghita Mu Da Maduana

13O ngangana va veveha nia banabana ghini ghau taghomughi, e ghua. O nai laori ira leghu nomu rangerange nga ka ira leghutau ta veha ta age vanamu ghatu God ka ia nona varisute. Manei e age vanamu ghau leghutau iranimu ka ia fafata podolona Zisas ka ia leghu mehana. 14O leghui God vununa ghau mu nona rekaha manei. Oka ke riufu leghu lao ghu riva ghidira ira nomu puhi sepa ta muko ta puina kuhana ghidi fuludu ghau; ka fafata iranimu, ghau e deo nga goke avohi ghu ia Nonomoho ta Veha ghinina Zisas Kraes. 15God neke faete ghauo mala meha nona rekahana taghonai mu, e maduana, o toraina maduana taghe manei o ghua ghu ka ira vahina leghutau ta riva ghidi nga ghau, 16vununa God neke kahei ka ira Kakangava sepa ta Maduana, “Ghau o toraina maduana, vununa ara na maduana,” ▼

▼1:16 Hiama 11:44,45; Hiama 19:2; Hiama 20:7

neke ghuao.

17Ghau no tarai lao ka God no va kudo ghini nomu Mama ghu, ghe God mu e deo ge kaike pelo ghu ka ia varifate manei. Manei e sopai fateri ira noni haroharo ka ira heve ta riva ghidi maneri. Ka ia fafata ta au nga ghu ghau ka malau iahi peka mu, geala ghau o au ka ia heluhelu ghini God. 18Au taghe nomu Mama o ghua, vununa ghau no avohi mo God neke tabara kave ghauo, mala hio va doli ghauna ka ia doli ta deo lighorona neke la pagusu mehao ka ira faamu. Nia ia tabara neke tabario manei mu, eka ghua mo ka golu ba siliva ia ta boka va mukoi. 19Manei neke tabara ghau ka ia busakana Kraes ta puina namanama, taghe kaike rekahana sipisipi mala veala ta toraina mamalahu nia ta deo ge kuru sotana ghu ba lelemeanana ghu, e ghua. 20God neke nai hihingona sepaoni ta mala tuhu mehaina Kraes malana mamu riva iahi, ghe neke va vuhai nga malau iahi peka. Nga ghatunaina ka va nonoghadi ravata irahi mu, manei neto tuhu mehai malana ia veha ka ghau ka malau iahi peka. 21Ka Kraes noto meha va ghighiu lao ghu ghau ka God. Nia vununa God neke va tetu leghui Kraes ka ia leme nia vanani varanga leghaha neke ghua, o boka nai laori mo ghu ghau ka God ia nomu va hohoghona nia rangerange, e ghua.

Ghita Mu Geala Da Vari Namahai

22Ira tarungamu ta au sasakedi dike va mamalahuri ka ia hioi ghau ia hohoghonana ia Nonomoho Ta Veha. Leleghonana iahi mu, ghau no vari namahai taghe ira tatahina mane ghase no ghua. O toraina namaha ghidi ghu leghu noni nga vari hoataimu ghau ka ira hihingomu kamoto. 23Riva ghini iahi vununa ghau mu noto uraha leghu. Ghau e deo goke hioi ghu foforuna doli iahi ka ira leghutau ta boka va mukori. Nga noke hioi ghau ka ira leghutau ta deo ge boka va mukori ghu. Taghonai leghutau ianimu lamu ghu mu ia saorona God ia ta au toghunai. 24Ira Kakangava sepa Ta Maduana di kahe ghua iahi,
“Noni mu taghe ia sesehu ta leme edi ghua;
ia veveha ka maneri e magali ma e age dako ghu, taghe ia veveha ka ira havoro mauke, e ghua.
Ia sesehu e leme, nia ira havorodi edi lufuru.
25Nga ia saorona ia Lod mu e au toghunai.” ▼

▼1:25Aesaea 40:6-8

Nia saoro iahi lamu ghu mu ia Nonomoho Ta Veha neke tuturi beana ghinino vanamuna ghau.