1 Peter 2

Ghita Mu Geala Da Ngagungagu Ghini Ia Hohoghonana Saoro Ka God

1O va kalasa ghau taghomu ka ira vahina muko nga. Oka sesebo ghu, tatangana kobiri ghu, kakabai ghu, ba turi ghidi va muko ghu ira keha noni, e ghua. 2E veha ka ghau ta hagalai namaha ghinina ia Saorona God ta hohoghona malanana ira dolimu, taghe ia rekaha gogoso ta bake doli mo ta kabai puti, o ghua. Ianimu e age toka ghini ghau kodolona, ta age hioina ghu ia hio va doli. 3Taghe neke kaheio ka ira Kakangava sepa Ta Maduana, “Ghau noto hadu kavei ka taghomughi ia veveha ka ia Lod Zisas,” ia ta ghua.

Geala Ghita Da Riva Ghidi Ira Veala Ta Veha Vanani God

4Ghau mu to meha ka Zisas Kraes. Manei mu ia ghahipa dolina dike sokeio ira tehi noni. Ghe God neke faeti manei taghe ta toraina ghahipa dolinana mala riva ghinina ia nona suga. Manei mu e puina namanama ghu ka God. 5Ghau mu ira ghahipa dolidi ta mala riva God, mala riva ghinina suga beana ianimu ka taghonai. Leleghonana mu, God neto va kaike pukuna hiama ghau. Nia ghau no rivai veala ka hihingomu nira e ghua. Veala iranimu ghu mu e veha vanani God, vununa ghini Zisas Kraes ia ghahipa dolina, ta namanama ka ira nahalina taghonai. 6Taghe ia ta kahei la ka ira Kakangava sepa Ta Maduana,
“Ara mu na naini ia ghahipa aianihi Zerusalemu,
ia ghahipa tongovonana ta au lighorona,
nia hei noni ta va hohoghonaina manei,
e deo ge age haghava ghena ghu.” ▼

▼2:6 Aesaea 28:16

7Manei mu e toraina au lighorona mamu ka ghau ira ta va hohoghona ka manei. Nga ka ira ta sokei manei mu,
“Ia ghahipa dike sokeio ira ta rivai suga mu
neto ke toraina meha ghahipa tongovonana ta va gimai ia suga.” ▼

▼2:7 Samu 118:22

8nia,
“Manei mu ia ghahipa ta va sinabereri ira noni,
ia mafara ta age va riufuri.” ▼

▼2:8 Aesaea 8:14

Maneri di sinabere vununa maneri dike pake ghedi nomohina ia saorona God, ne ghua mamu ghe neke dufu nga ka maneri ianimu.

9Ghe ghau mu e deo go ghua ghu ianimu, vununa ghau mu ira noni faetaidi. Ghau mu ia ravutuna ira hiama, ira noni beana ka God ta torai taghori taghonai. Iahi mu, o boka mala kahe va podoli ghu ghau ira veha ka God ka ira keha noni, vununa manei neke kudo kaveigho ka ia nagoromo, noke haghele ghu gilio agho ka ia nona fegala ta namanama. Ira Kakangava sepa Ta Maduana di kaheina,
10“Sepao ghau e deo goke nona noni ghu manei;
nga ghatunaina mu ghau to nona noni God.
Sepao ghau e deo goke hioi ghu ia dudumana ka God;
nga ghatunaina mu ghau noto hioi ia dudumana ka manei.”

Ghita Geala Da Au Ka Ia Ghaghahena Tadi Mala Age Va Hohoghonai Nia Heluhelu Ghini God Heiri Ira Ta Deo Gedi Avohi Ghu Manei

11Ghau taremehaguro, ghau mu taghe noni mehamu e ghua, vununa ia toraina malaumu ghau mu ka malauo God fate. A va kahe ghini ghau ghu ara, o au va takale ka ira ngagungagu ta muko vununa edi huhari torai tarungamu nira ghau. 12O banabana ghini ghau ghu taghomu ka ira dolimu ka hoatadi ira noni taka va hohoghona ghu ta au taremehadi ghau. Ne muko ta riva ghidi nira ghau geta ghua ghu maneri ghe, maneri ghatu edi age fini avohi mo ia doli ta va vonavona ka ghau, edi age va hohoghona ghu heluhelu ghinina God ka ia ke la leghu mehana Kraes fateina malau iahi peka.

Va Paluna Pagahaina: Heiri Ira Tadi Va Hohoghona Edi Torai Heluhelu Ghidi Ira Ta Kururi Mana Mala Kopu (2:13–3:12)

O Va Vonavonari Ira Ta Riva Ka Ia Gaumani

13Vununa ghau no va hohoghona ka ia Lod, o toraina va vonavonari ira noni ta auri mana mala kopu, sughavona ghu ia mane ginitaukela ia ta kopunai ghidi ira noni haroharo. 14Ghau o toraina nomohori haroma ira mane gavana, vununa maneri mu neke varituhu ghidi ia Mane Ginitaukela ta mala va vavahagalarira ira ta riva va muko nia ta mala vonavonarira ira ta riva va veha, e ghua. 15Keha noni ta kingora, no riva va muko ghau edi ghua zeadira edi makutu ghau ghu. God ne kabai ghini ghau ta riva ghidira ira riva ta veha mala va nodorira ira kokolodi ngengene ta muko ta va kahe ghini ghau maneri. 16Au taghe ira noni ta kalasa ira taka noni mala varituhu ghu ka ira keha noni, o ghua. Ghe ia kalasa ka ghau mu, eka mala riva ghidi ghu ira puhi ta muko. Nga o au taghe nona noni mala varituhu God o ghua. 17Ghau o va vonavonari ira leghu noni nga, namaha ghidi ira keha noni kiloau, heluhelu ghini God, nia va vonavonai ia mane ginitaukela, e ghua.

Ia Nai Malaba Ka Ia Vavahagala Kraes

18Ghau taka kalasa ghu vununa ta noni mala varituhu nia ghau ka ira keha noni mu, o toraina nomohori ira nomu manefaa nia o va podolo vanadi tudu ia va vonavona, e ghua. Riva ghini iahi, eka ghua ghu ma ka ira ta sute ghau nia ngana heta ghau e ghua, nga ka ira ta ngovala ghau, haro. 19God ne va manemane ghini ghau, vununa ghau no ngana hetai taghonai, ka ia au vanemoho ma ta taga teturi ghu ira vavahagala ta faa fuludu, geta deo mo heve leghutau ta muko noke riva ghinina ghau. 20Dito ruza ghau la ka ira rivai puhi ta muko, e deo vehana va fafahaka ka God ta mala va vonavona ghauna ghinina ia vavahagala ka ghau, geta au vanemoho ghu ghau. Nga noto vavahagala ghini la ia riva ta veha, noto au vanemoho ghu ka ia ruza ghau maneri, God e age va manemane ghini ghau mo.

21Vavahagala iahi mu e taremehana haroma ia kudo ghau God. Kraes neke vavahagala vanamu harono ghau mu, neto nai vanamu malaba ghau, o leghuri ghu ira malabana manei. 22Iahi mu e leghui heve neke kaheio sepao Aesaea ia porofeti ghinina Kraes, “Manei mu neke deo sasakena, nia e deo kaike fafata neke sekesekei ghu,” ▼

▼2:22 Aesaea 53:9

ia ta ghua. 23Manei e deo geke ungene va mukori ghu heiri dike kahe va mukoio manei. Ira noni dike va vavahagali manei, ghe manei e deo geke va mamaghu leghuri ghu. Puhi iahi neke nakai laoi manei ka ira kamena God, ia mane varifate ta lotoro. 24Kraes neke vavahagala ka ia hekefalahata neke vuhai leme ghu, mala da boka nodo ghu auna ghita ka sasake, da au ghu ka ia doli ta lotoro. !Ka ira bakorana neto va veha ghau ghu manei! 25Vununa sepao ghau noke ghahe lao meha taghe sipisipi ta ghahe va zea nira noke ghua. Nga ghatunaina mu, ghau noto fihiki lao ka Zisas ia Mane Kopunai Sipisipi, ta Kopu ghidi tarungamu nira.