1Pe 3 | KjiSC | STEP | Taghe ianimu e ghua haro ka ghau ira ghaseboro. Nomohori ira babatu ka ira keramuau. Geta deo ghu ghedi leghui ghu ia saorona God kehara ka ira keramuau ghe, ghau geala o nomohori, e mala age koroho hagheleri ghu va hohoghonaina God ka ira dolimu ta veha ghau ta veha vanani God, ia ta age ngengene va veha laoni ka maneri, fuludu laorira leghu ngengene nga. Ianimu e age koroho hagheleri ghatu ira keramuau,

1 Peter 3

O Vari Va Vonavona Ka Giliona Varihio

1 Taghe ianimu e ghua haro ka ghau ira ghaseboro. Nomohori ira babatu ka ira keramuau. Geta deo ghu ghedi leghui ghu ia saorona God kehara ka ira keramuau ghe, ghau geala o nomohori, e mala age koroho hagheleri ghu va hohoghonaina God ka ira dolimu ta veha ghau ta veha vanani God, ia ta age ngengene va veha laoni ka maneri, fuludu laorira leghu ngengene nga. Ianimu e age koroho hagheleri ghatu ira keramuau, 2 ka ia finini ia doli ta mamalahu ta va vonavonai God. 3 E deo ge tongovona ghu ta va vevehaighona taghoughi peghuru. Ia veveha ta hohoghona mu eka la meha ghu ka ikuiku kala, ka golu mala va vovona, ba ka ira poko e ghua. 4 Nga veveha mu e leghutauna gilio ta deo ge boka va mukoi ghu. Veveha mu e va podoli taghonai ka ia puhi ta vari arehai nia unuhu e ghua, e namanama ira ta ghua ghidi God. 5 Ka ghaghahena ianimu dike va veveharira taghodi ira fotati beanadi sepao laoni. Maneri dike rangerange ka God dike nomohori ghu ira babatu ka ira keradiau taghodi. 6 Taghe Sera la neke leghuio Ebarahamu ia keranau, neke va kudo ghini nona faghinao ghu. Ka ia deo go maughemu ghu ghau riva ghidira ira leghutau ta veha, ghau mu taghe ira tuunaghase manei e ghua.

7 Taghe iala o ghua ghau ira keradiau ira fotati geala o au taremehadi ghu ira keramuau ka ia ghaghahena ta va fafahaka, vununa maneri edi paeke hinae ka ghau. Nga o va vonavonari, vununa God ne vanadi haroma maneri ia kaikadolo ta vanamu niala ghau. Iahi mu ia varisute neke vanamu kakatono God ta vanamu doli hohoghona. O riva ghini iahi mala e deo ghu heve ta age va gogoharira ira nomu tarai.

O Va Vonavonari Ira Keha Noni Ka Ira Leghu Doli Nga

8 Va nonoghanana, ghau haroharo ta va hohoghona ka Kraes geala o kaike nganganamu ma foudu ghauna vari dudumanai, vari namahai taghe tatahina ta ghuana ka hihingo ta varisute. 9 Geala ghau oka lifu leghuri ghu ka muko ira noni ta va muko ghau, ba ira noni ta tibiri ghau ka tibiri. Nga o lifu leghuri ka ia va beanari mo, vununa God neke kudo ghau mala hio kadolina ia va beana neke naiungene ghinio ka heiri ira ta leghui manei. 10 Ne kahei ghu iahi ka ira Samu,
“Hei ia ta kabai ghini ia doli ta au va manemane nia ira ravata ta veha,
manei e toraina posi va gimai ia lalamena ka ira ngengene ta muko
nia e toraina posi kaputuri ira pepeuna ka ia turi sebo, e ghua.
11 Manei e toraina fihiki kaini ia muko, eke riva va veha ghu.
Manei e toraina riva va gigima e au ghu ka ia bule taremehadi ira keha noni.
12 Ia Lod e fini kopu ghidi ira ta riva va veha,
e nomohori ghu manei ira nodi tarai.
Nga ia Lod mu e huhari
ira ta rivai muko.” ^{▼▼3:12 Samu 34:12-16}

Va Litona Pagahaina: Heiri Ira Tadi Va Hohoghona Mu Edi Age Vavahagala Vununa Ira Noni Di Ngovangovalari

3:13–5:14

Ia Ghaghahena Ta Mala Au Ghita Ka Ia Fafata Vavahagalada

13 Dito au va gima la ira hihingomu ka ia rivai veha, e marutana vanadi ira tehi noni ta va vavahagala ghauna ka ianimu. 14 Geta vavahagala ghini mo riva ghinina ia ta veha ghe, God e age va beana ghau ma e lao ghu ghatu. Oka maughemu la ghu nia oka anga ghemu la ghu. ^{▼▼3:14 Aesaea 8:12} 15 Nga o toraina va totoana ghini Kraes taghe ia Lod na ira dolimu, o ghua. Nia dito notoho ghau la ghinina ia nomu rangerange ka Kraes, o va tana tudu ma mala va fafahakina. 16 Ghe o riva ghini ka ia leo ta veveha nia va vonavona e ghua, va kalasari tudura nganganamu nira. Mala dito ungene va muko ghau la ira noni ka ira puhimu ta veha vununa ta leghui nia ghau Kraes, maneri edi age haghava ghedi ghatu ka heve dike va kahe ghini ghauro. 17 Neto lao nanafa la ka God ta mala vavahagala ghidira ira riva ta veha ta riva ghidi ghau, ianimu e veha fuludu laori ira vavahagaladi ira riva ta muko ta riva ghidi ghau.

Zisas Neke Vavahagala Molamo

18 Iahi mu e hohoghona vununa Kraes neke vavahagala molamo ka ia neke lemeo manei ghidira ira leghu sasake nga kaike fafata mo malana ia kamotona fafata. Manei e deo kaike fafata tei neke rivai sasake ghu, ghe manei neke leme vanadi leghu noni nga vununa maneri haroharo dike au sasakedi. Kraes neke riva ghini iahi mala hio ghau laona ka God. Maneri dike va lemei ia tinina, ghe ia tinina neke doli leghu taremehana ia tarungana manei.

19 Ianimu tuna ghe neke la turi kavei nga Kraes ka ira tarungadi ira noni ta leme ka ia pipiliga aianihi Gehena ghinina ia vari paufu ka God. 20 Maneri dike huhughi God sepao laoni ka ia fafata Noa. Ka ia riva ghini ia vaka ka manei, God neke au afa ghidi ira noni mala taghuru kairira ira sasakedi. Ka ia va nanarei God, keha nonira lama dike haghera ka ia vaka. Taghe hana noni mo ghu neke hio va dolirira God ka Kolo. 21 Heve neke dufu ani ka maneri mu taghe seselebeana ia ta hio va doli ghau ghatunaina, ka ia manana ia tetuleghu ka Zisas Kraes e ghua. Seselebeana mu eka ghua ghu ia guranga kai sota ka ia tini, nga kaike fanga lao ka God mala va mamalahurira ira nganganamu. 22 Ghatunaina mu Kraes neto lao ka malauo God fate. Nia manei ne nohe gheremena God ka ia nonohe papala ta mana. Nia ira leghu engizeli nga, nia ira ta auri mana mala babatu nia ira ta gigima e ghua, edi au haro ka pekana ia mana mala kopu manei.