1Pe 3:13-5:14 | KjiSC | STEP | Dito au va gima la ira hihingomu ka ia rivai veha, e marutana vanadi ira tehi noni ta va vavahagala ghauna ka ianimu.

1 Peter 3:13-22

Va Litona Pagahaina: Heiri Ira Tadi Va Hohoghona Mu Edi Age Vavahagala Vununa Ira Noni Di Ngovangovalari

3:13–5:14

Ia Ghaghahena Ta Mala Au Ghita Ka Ia Fafata Vavahagalada

13 Dito au va gima la ira hihingomu ka ia rivai veha, e marutana vanadi ira tehi noni ta va vavahagala ghauna ka ianimu. 14 Geta vavahagala ghini mo riva ghinina ia ta veha ghe, God e age va beana ghau ma e lao ghu ghatu. Oka maughemu la ghu nia oka anga ghemu la ghu. ^{▼▼3:14 Aesaea 8:12} 15 Nga o toraina va totoana ghini Kraes taghe ia Lod na ira dolimu, o ghua. Nia dito notoho ghau la ghinina ia nomu rangerange ka Kraes, o va tana tudu ma mala va fafahakina. 16 Ghe o riva ghini ka ia leo ta veveha nia va vonavona e ghua, va kalasari tudura nganganamu nira. Mala dito ungene va muko ghau la ira noni ka ira puhimu ta veha vununa ta leghui nia ghau Kraes, maneri edi age haghava ghedi ghatu ka heve dike va kahe ghini ghauro. 17 Neto lao nanafa la ka God ta mala vavahagala ghidira ira riva ta veha ta riva ghidi ghau, ianimu e veha fuludu laori ira vavahagaladi ira riva ta muko ta riva ghidi ghau.

Zisas Neke Vavahagala Molamo

18 Iahi mu e hohoghona vununa Kraes neke vavahagala molamo ka ia neke lemeo manei ghidira ira leghu sasake nga kaike fafata mo malana ia kamotona fafata. Manei e deo kaike fafata tei neke rivai sasake ghu, ghe manei neke leme vanadi leghu noni nga vununa maneri haroharo dike au sasakedi. Kraes neke riva ghini iahi mala hio ghau laona ka God. Maneri dike va lemei ia tinina, ghe ia tinina neke doli leghu taremehana ia tarungana manei.

19 Ianimu tuna ghe neke la turi kavei nga Kraes ka ira tarungadi ira noni ta leme ka ia pipiliga aianihi Gehena ghinina ia vari paufu ka God. 20 Maneri dike huhughi God sepao laoni ka ia fafata Noa. Ka ia riva ghini ia vaka ka manei, God neke au afa ghidi ira noni mala taghuru kairira ira sasakedi. Ka ia va nanarei God, keha nonira lama dike haghera ka ia vaka. Taghe hana noni mo ghu neke hio va dolirira God ka Kolo. 21 Heve neke dufu ani ka maneri mu taghe seselebeana ia ta hio va doli ghau ghatunaina, ka ia manana ia tetuleghu ka Zisas Kraes e ghua. Seselebeana mu eka ghua ghu ia guranga kai sota ka ia tini, nga kaike fanga lao ka God mala va mamalahurira ira nganganamu. 22 Ghatunaina mu Kraes neto lao ka malauo God fate. Nia manei ne nohe gheremena God ka ia nonohe papala ta mana. Nia ira leghu engizeli nga, nia ira ta auri mana mala babatu nia ira ta gigima e ghua, edi au haro ka pekana ia mana mala kopu manei.

1 Peter 4

Da Banabana Ka Ia Au Vavahagala Ghita

1 Vununa Kraes neke vavahagala ka ia tini, o toraina va gigima ghau haro ghu molamo taghomu, taghe manei ta ghuana ka ira nganganamu, o toraina va tanai vavahagala haro ghu molamo. O oho’oho ghu mala vavahagala taghe Kraes ta ghuana, vununa neto oho’oho la hei noni mala vavahagala vananina Kraes, manei neto nai hihingona ta nodona ka ia rivai sasake ka ia ghaghahena ta fani sasake manei. 2 Ghatunaina e vai vona ghu mu, ghau o toraina au ka ia kamotona dolimu ta leghui ghau God ka malau iahi peka, leghuina ia lao nanafa ka taghonai, nga eka ghua ghu ira lao hihingo ta muko ka noni. 3 Sepao mu ghau noke pepesana ghidi ira nomu fafata, riva ghidira ira riva ta kabai riva ghidi ira noni bongihehe. Sepao ia doli ka ghau noke au ka ia doli ta muko, kikirase, ketuhu gogosu, mahai varighara mala ketuhu gogosu nia zave lao meha nia va totoana ghidi ira nguzunguzu, ira ta ghua. 4 Ghe ghatunaina mu ira noni taka va hohoghona ghu, di ungene va muko ghau, vununa di puina nodi fere ta deo nia goke la holara taremehadi ghu ka ira leghutau ta muko ta riva ghidi maneri. 5 Maneri ghatu edi la turi kaveri ira puhidi ka ia mane varifate ta va tanai fateri ira leghu noni ta doli nga nia ta leme nga, e ghua. 6 Keha nonira dike va hohoghonai ia Nonomoho Ta Veha ghinina Zisas ghe dike leme nga. Ia Nonomoho Ta Veha mu neke tuturi beana ghini ka ira noni ghe dike lemena, mala ira tarungadi edi au taghe ia au ka God edi ghua ghu, geta leme ghu ira tinidi vununa ka sasake.

7 Malau iahi peka mu, to namo meha ka ia va nonoghana. Ianimu la ghe, go toraina ngangana va veveha nga, nia banabana ghini ghau taghomughi go ghua haro nga, o mala age boka tarai va veha ghu. 8 Ta tongovona fuludu laonani mu, o toraina vari namahai ghemu tudu ma ka ira hihingomu kamoto, vununa namaha mu e toufu kaputuri tehi sasakeni. 9 O vari hio namahai ka giliodi ira nomu suga taremehana va manemane ka ia lao hihingo, deona go ngunungunu ghu. 10 God neto sopai vanamu kaikadolo ka ira tehi nona kaikadolo, vununa ka ia nona varisute ta vanada kakato. O va rivari ghu ka ia veha ira kaikadolo ka ghau mala vari tokaina. 11 Heiri ira ta kururi ia kaikadolo mala tuturi beana mu, geala taghe kaike noni ta tuturi beana ghidi ira ngengenena God ta hohoghodi edi ghua. Heiri ira ta kururi ia kaikodolona toka mu, geala maneri edi toka ghidi ira noni ka ia gigima ta vanadi God. Ka ghaghahena iahi, ira vahina leghutau ta riva ghidi nga ghau, God e age hio ghidi varanga ka Zisas Kraes. Ira varanga nia gigima e ghua mu, nona Kraes ia ta au toghunai. Amen.

12 Ghau taremehaguro, oka nomu fere ghu vununa ia vavahagala taghe ia ngizalana totoi ia ta ghua mu, to dufu ka vari hoataimu ghau. Oka nganai la ghu, haghelina iahi mu eka fata ghu ka ira noni ta va hohoghona ka Zisas ta ghuana. Vavahagala ianimu ghu mu e mala va sisiva ghini ghau ma. 13 Ghau o va ghazaghaza ka ia va vavahagala ghau ira noni, taghe neke vavahagalao la Kraes sepao. Nia ka ia ke la leghu mehana Kraes ka ia nona varanga, ghau o age puina va ghazaghaza laoni. 14 Dito ungene va mukoigho la maneri ka ia leghui agho Kraes, agho mu noto beana gheu. Iahi e va podoli ia Tarunga Ta Maduana ka God ta varanga ne au taremehau agho. 15 Kaike noni ka ghau neto atungi la ia keha noni, ba sisiko la, ba va mukoi la ia vetula, ba hirihoghona la ka ira nodi puhi ira keha noni, ianimu ira noni haeba edi boka va vavahagali mo. Noni ta ghuana ka ghau geala oka riva ghini la ghu. 16 Nga eka hahaghavana ghu mu dito va vavahagala ghau la ira noni, vununa ghau no leghui Kraes. Helahela ghini God, vununa agho mu kaike noni no leghui Kraes dito kahe ghua ghinigho la ira noni. 17 Ia fafata mala varifate neto dufu, e toraina kusu tataniga ghu ka ira nona rekaha taghonai God. Neto tatanigai la ka ghita ira nona noni God ia varifate, o ngana laoi taghe heve e age ghua toraina mamaghuanana ka heiri ira ta deo gedi va hohoghonai ghu ia Nonomoho Ta Veha ka God. 18 Nia ira Kakangava sepa ta Maduana di kaheina,
“?Neto mamarutana la ka ira noni ta lotoro hioina ia doli soduai,
heve mu ta age dufuna ka ia noni ta huhughi God ta va mukoi ma ta au ghu ia vetula ka manei.?” ^{▼▼4:18 Tatangana 11:31}

19 Noto vavahagala la ghau leghuina ia lao hihingo ka God, o riva leghui tudu ia ta veha, nia nai lao ghau taghomu ka God neke va vuha ghauno, e ghua, vununa manei e deo ge boka va deo ghau ghu.

1 Peter 5

Ia Tatangana Maladi Ira Ta Babatu Ka Ia Suga Tarai

1 Ghatunaina ara na kuruau leghutau ta mala kahe vanamuna ghau ira ta babatu ka ia suga tarai. Taghe ghau la a ghua mu ara, a mane babatu haroma ghu. Ara mu nato finiri ghu ira vavahagala ka Kraes. Nia ara a age hioi ghatu ia tufagu ka ia varanga God ka malaunao fate ia ta age va podolo vanada. Ara na fanga ghau ghu, 2 ta kopu ghini va vehana ia pukuna noni ka God ta au ka pekana ia kopu ghau, taghe ta ghua la ira mane ta kopu ghidi ira sipisipi o ghua. Oka va tutuufu ghini ghau ghu taghomu, ka ia fini kopunai ghidi ira noni, nga o fini kopu ghidi ka ira hihingomu ta oho’oho. Oka riva ghidi ghu ma ira nomu riva vununa ka ia hagalai hio tabara, nga vununa no toraina lao hihingomu ta riva vananina God. 3 Oka faghina kaputuri ghu noni ta kopu ghidi nira ghau, nga o va podolo vanadi ia ghaghahena ta mala deke leghui maneri. 4 Nia ka ia leghu mehana Kraes ia paudi ira ta Kopunai Sipisipi, ghau o age hioi ghatu ia nomu tarapaena varanga ta deo ge boka dako ghu.

Ghau Geala O Au Unuhu

5 Ghau ira noni foforu, o au unuhu ka ia mana mala kopu ira ta manefaa. Nia ghau haroharo ta va hohoghona go toraina vari tokai ghemu ghu ka ia au unuhu e ghua, vununa
“God e tetu kaputuri ira ta hadu varanga,
nga manei e toka ghidi ira ta unuhu.” ^{▼▼5:5 Tatangana 3:34}

6 O au unuhu ka pekana ia mana ta gigima God. Noto riva ghua la ghau ianimu, manei e age va vonavona ghau ka ia fafata avohi manei ne lotoro mamu ta ghuana. 7 Vanani lao God ira leghutau haroharo ta hangapuaha ghidi ghau, vununa manei e sute ghau mo ka heve ta dufu ghaura.

O Banabana Ghini Ghau Taghomu Ka Satana

8 !O banabana! O mato va veha ghau ghu taghomu. Ia kana ka ghau, Satana mu, taghe kaike laioni ta urungu va fafaa lao meha e ghua, zorapina hei ta boka toraina va muko kainina. 9 Ghe ghau oka va malumi ghu Satana ta ngovala va muko ghauna, o tetu va nadu ghu ka ia nomu va hohoghona. Ghau no avohori mo ira keha noni ka malau iahi peka ta va hohoghona edi dufui molamo kokolona vavahagala iahi.

10 Leghuna ia vavahagala ka ghau ka birusuna fafata tei ma, God e age va foforu ghau, va gigima ghau, va nadui ia nomu va hohoghona nia e age va tetu nadu ghau, e ghua. Ka ia nona varisute ta vanada kakato, God neke kudo ghau ta mala hio tufana ka ia nona varanga, vununa ka ia au vari parekete varighara taremehana Kraes ghau. !Ia varanga ka manei mu e deo va nonoghana, 11 nia ia leghahai mana ka manei e au toghunai! Amen.

Ira Va Nonoghadi Ungene Veha Ka Pita

12 Ara nake kangava vanamu ghau ponoena leta iahi, taremehana ia toka ka Saelasi ia ta torai rangerangei ara. Manei mu tahida ka Kraes. Ara nake kangavi mala va gigima ghauna, o mala avohi ghu ghau heve tato kangava age ini ara ka ghau mu, ia hohoghona. Tetu va gima ka varisute neke vanamu kakato ianimu.

13 Ira noni aiahi Babiloni ta va hohoghona di va ghahe ageri ira nodi ungene veha ka ghau. God neke faeteri maneri taghe neke faete ghauno la ghau. Maki, taghe kaike tugu mane ia ta ghua ghini ara, ne va ghahe age nona ungene veha haro ka ghau. 14 Ka ia finiri ghau ira keha ta va hohoghona, o kubaeri mala va podolina ta vari namahai ghemuna.

Ara na tarai e age vanamu bule ghu God ghau haroharo ta au ka Kraes.