1Th 1 | KjiSC | STEP | Leta iahi mu nake kangavi ara Polo, taremehadi Saelasi ghe Timoti, Vanamu ghau ira noni kiloau aiamuhu Tesalonaeka, ta nona noni haro God ia noda Mama, nia ia noda Lod Zisas Kraes, e ghua. Ghai na tarai fangai ghu God ta vanamuna ia nona varisute ta va meha kakatoi nia ia bule.

1 Thessalonians 1

Polo Ne Ungene Vehari Ira Noni Kiloaudi Tesalonaeka.

1 Leta iahi mu nake kangavi ara Polo, taremehadi Saelasi ghe Timoti,

Vanamu ghau ira noni kiloau aiamuhu Tesalonaeka, ta nona noni haro God ia noda Mama, nia ia noda Lod Zisas Kraes, e ghua.

Ghai na tarai fangai ghu God ta vanamuna ia nona varisute ta va meha kakatoi nia ia bule.

Kudo Veha Ghini Ia Va Hohoghona Ka Ira Noni Kiloaudi Tesalonaeka

2 Leleghu fafata ghai na kudo vehai God ghini ghauna ghau haroharo, kahe ghau tuduna ka ira nomai tarai. 3 Ka ira nomai tarai fanga ka God ia Mama ghini ghauna ghau, ghai na nganai ia nomu riva ta hohoghona, nia ia ghaghahena nomu riva ka ia namaha ghidi ira keha noni, e ghua. Nia ghai na nganai haro molamo ghini ia tetu va gima ka ghau ka giliodi ira ngovangovala ghau, vununa ka ia toraina va hohoghonai ghau ia leghu meha ka ia noda Lod Zisas Kraes.

4 Ghau ira tahimai, ghai na avohi mo ta namaha ghini ghauna God, to faete ghau ghu ta mala nona nonina taghonai. 5 Vununa ka ia fafata hio agei ghai ia Nonomoho Ta Veha ka ghau, eka meha mo ka ia ngengene kakato, nga neke taremehana mana haro, vununa ia Tarunga Ta Maduana neke toraina va avoavoho ghauna, ghe noke avohi nga ta hohoghonana heve nake kaheriro ghai. Nia ghau to avohi ia aꞌauna doli ka ghai, vari hoataimu ghau ne va podoli ta hohoghonana ia nonomoho ka ghai. 6 Dike au mo ira vavahagala ta toraina muko ghe, ghau noke hioi mo ia nonomoho taremehana ia va ghazaghaza, ta meha ka ia Tarunga Ta Maduana. Ka ghaghahena iahi, ghau noke deke leghu ghai, nia ia Lod, e ghua. 7 Taghe leleghonana mu, ghau dike mala age fini leleghu haroma ka ira leghu noni nga ta va hohoghona ka ia Babarana Masedonia, nia ka ia Babarana Akaea, e ghua. 8 Ghatunaina mu ia nonomohona ia Lod, ne sipa ghu ka ghau, ne ongaha kave lao ghu ka ira noni hae ghe hae ghu, fuludu laoina Masedonia nia Akaea, e ghua. Vununa hae tei ta laona ghai, na nomohori ira noni, di turi vanamai ghinina ia nomu va hohoghona ghau ka God. Geta deo mo va kahe ghidira ghai ghe, 9 to turi ghini tudu ma to au ghu maneri, ia vari va sabara ta namanama noke vanamaio, nia ka ia fihiki kairi ghau ira nomu sesebodi god, tato riva vananina ghu ia God ta doli nia hohoghona, e ghua. 10 Maneri di turi ghini molamo ta au afa ghinina ghau ia leghu meha ka ia Tuuna God, ka malauo God fate; Zisas neke va tetu leghuio God ka ia leme, mala hio va doli ghitana ka ia varifate ta mamaghuana ta la meha ghatu.