1Th 2 | KjiSC | STEP | Ghau tahimairo, ghau to avohi ma ia age sigho ghini ghau ghai, neke au lighorona.

1 Thessalonians 2

Ia Riva Beana Ka Polo Aianihi Tesalonaeka

1 Ghau tahimairo, ghau to avohi ma ia age sigho ghini ghau ghai, neke au lighorona. 2 Ghau to avohori ira muko dike va saru ghini ghairo ira tanidi Filipae ghe nake ageo nga ghai ka ghau, nia heve vavahagala nake dufuriro aianimu, e ghua. Neke ghua mo ianimu ghe, God neke vanamai ia gigima ta toraina mala turi ghini kavena ghai ia nona Nonomoho Ta Veha ka ghau, geta au ghu ghai ka vari hoataidi ira tehi noni dike gora ghairo. 3 Ta fininina ghau mu, ghai nake deo gake tuturi beana ghu ka ia sesebo, ba ka ia ngangana ta muko, ba ka ia sekesekei.

4 Nga ghai mu, na ngengene taghe ira mane ta va hesiri God neke faeteriro ghu a ghua ma, mala tuturi beana ghinina ia Nonomoho Ta Veha ka ia hohoghona. Nganganana riva ini ka ghai mu, e mala veha vanani ghu God ia ta fini avohori ira hihingoda ghita, nga eka mala veha vanani ghu ia noni. 5 E deo nga kaike fafata nake va sisiva turi va lomolomoso ghau ghu mala hio haghele ghauna, taghe tato puina avohi nia lama ghau. !God e avohi haroma ta hohoghomaina ghai, deona gake baere sebo ghau ghu taghe mala vanamai rongona! 6 Ghai e deo ghe gake fanga ghau ghu ghau, ba ira keha noni ta mala helahela ghini ghaina. 7 Vununa ghai mu nona mane nonomoho Kraes, a au ghu ka ia papala fateni, geala a boka mo ghu ta fanga ghauna ka heve ta kabai ghinina, ghe ghai nake au unuhu taremehamu taghe ta ghua niala kaike uke, ta hio suteri ira nona rekaha nake ghua ghini ghau. 8 Eka ghua ghu ma ia Nonomoho Ta Veha ka God mu, nake vanamuna ghai ka ia namaha ghini ghau fuludu, nga ira dolimai haro, vununa ghau mu noke toraina kenu ka ira hihingomai.

9 ?Ghau tahimairo, e deo ma ghe go ngana leghuri ghu ira rigete nake age riva ghidiro ka ia fafata age au taremehamu? Redu ravata ghai nake riva mala hio rongo mala toka ghini ghaina taghomai, e mala deo ghu ga va rugusi ghau ghu ka ia fafata tuturi beana vanamu ia Nonomoho Ta Veha ka God, nake ghua. ^{▼▼2:9Polo mu kaike mane neke rivai suga tapole taremehadi Pirisila ghe Akuila aianihi Koriniti mala hio rongo, ta toka ghinina ghu taghonai ka ira nona riva. Fini Ira Riva 18:3.} 10 Taghomughi nia God e ghua noke to finini, o boka kahei mo ghu ghau to beana ghemaina ghai, lotoro ghemaina, nia kalasa ghemaina e ghua, ka ghau ira noni haroharo ta va hohoghona. 11 Nia ghau to avohi ma ia varisute nake va riva ghini ghauo, taghe ta ghua nia ia varisute ka ia mama ta vanadi ira nona rekaha, nake ghua ghini ghauo. 12 Ghai nake va gigimari ira nganganamu, va vehari ira hihingomu, nia nake va kahe ghini ghau tudu ma e ghua, ta mala auna ghau ka ia kokolona doli ta veha vanani God, ia ta kudo haghele ghau ka ia nona Ravutu, mala hio tufana ka ia nona pelarana varanga.

13 Ghai na kudo vehai tudu ma God, vununa ka ia fafata age tuturi beana ghini ghai ia nona nonomoho manei ka ghau, ghau noke nomohi, noke hioi ghu tuturi iahi, taghe taka tuturina ghu ka ira noni, nga taghe nona nonomoho God mo, e toraina hohoghona ghu mamu, e ghua. Ghatunaina mu nonomoho iahi e riva tudu ma ghu ka ghau ira ta va hohoghona.

14 Ghau tahimairo, ghai nato finini ta toraina rivana iahi ka ghau, vununa ira torai leghutau dike dufu ghauro lama ghau, neke dufu harora ka ira nona noni God ta va hohoghona ka Kraes Zisas, ka ia Babarana Zudia. Noke vavahagala ghidi harora ghau ka ira nomu noni taghomu mu, ira toraina vari ngovala dike vavahagala ghidiro lama maneri ka ira nodi noni taghodi ira Ziu, 15 dike atungio ghu ia Lod Zisas nia ira porofeti, e ghua, bozo kave ghai harona ghai. Maneri di va muko hihingoi God nia gorari leghu noni nga e ghua, 16 ka ia ghorevaha ghini va nodo ghaina, ta tuturi beana ghinina ia Nonomoho Ta Veha ka ira noni taka Ziu ghu, mala hioina maneri ia hio va doli ka God. Ka ia riva ghini iahi, ira muko ka ira noni Ziu dito vari papauku laoni. Ghe va nonoghanana, God neke hali ka maneri, e age va vavahagalari ghu ghatu.

Polo Ne Kabai Ke Sigho Ghidini Ira Noni Kiloaudi Tesalonaeka

17 Ghau tahimairo, ka ia birusuna fafata leghuna ia vari ghahe kaida, ghai nake puina va sisiva ta ke leghu agena, vununa ghai na hagala ghini ka boka ghu ta ke age fini ghaunani. Ghe ka ira hihingomai, ghai na au tamu ma na au ghu. 18 Nake puina hagala ghini fuludu ta mala agena, nake va sisiva tudu ma ghu nake au ghu ara Polo, ghe Satana neke gora ghaina. 19 ?Ka ia va nonoghana, heve mu ta age vanamai rangerangena nia va ghazaghazana, nia heve tabara ta age hadu ghini varangana ghai ghatu, e ghua? !Ghau lamu! Uve, ghau lamu ta vanamaina ia leghahai va ghazaghaza ka ia age tetu varigharada ka ia kenuna ia noda Lod Zisas, ka ia ke leghu mehana manei ghatu. 20 Hohoghona fuludu, ghau lamu ghu mu fafahakanana va varavaranga, nia va ghazaghaza ini ka ghai.