1Th 3 | KjiSC | STEP | Va nonoghanana, ka ia hangapuaha ghini kabai nomohina ia doli ka ghau, ghai nake nai ghini ngangana ta mala au kakaikena ghai aiahi Atenisi,

1 Thessalonians 3

1 Va nonoghanana, ka ia hangapuaha ghini kabai nomohina ia doli ka ghau, ghai nake nai ghini ngangana ta mala au kakaikena ghai aiahi Atenisi, 2 nake tuhu agei ghu mane Timoti ini mo, neke age sigho ghini ghauna. Manei mu nomai mane e riva taremehamai haroma vananina God, nia tahimai mane e ghua, ka ia va ongahi ia Nonomoho Ta Veha ka Kraes. Nake tuhu agei ghu manei mala va gigima ghauna, nia mala toka ghini ghauna e ghua ka ia nomu va hohoghona, 3 eka ke gora ghau la ghu ira mamarutana ta hagheleri ghau. Ghe e hohoghona mamu e ghua, ghau to avohori kokolodi mamarutana ta ghuara irahi, edi age dufu ghita tudu ma ghita ira noni kiloau. 4 Ka ia fafata au tamuni ghai, nake kusu va kahe ghini ghau ghu, ghidira ira mamarutana tato zukuru meha, to avoho va vehari ghu ghau mu, tato dufura leghutau irahi.

Ia Tuturi Ta Veha Ka Timoti Ne Va Gigimai Polo

5 Ianimu la ghe, nake va agei nga Timoti ka ia hangapuaha ara, e mala age hadu kavei ghu manei ia va hohoghona ka ghau, ne gigima nga, ba deo, ta ghuana. Ara nake maughini ghegu, geto auau ghau la Satana, geto age deo lighorodi ghu ira riva baelu ka ghai, nake ghua. 6 Ghatunaina mu, Timoti bake ke la leghu meha mo hio mehaina ia nonomohomu ta veha ghau, ghini ia va hohoghona, nia ia namaha e ghua ka ghau ta gigima tudu ma ta auna ghu. Ne meha turi vanamaina manei mu, ghau no nganai nia va manemane ghini ma no au ghu, ia age sigho ghini ghau ghai, nia ta kabai fini ghai harona e ghua, taghe ta ghua ini la ghai ta puina kabai fini ghau haro ini. 7 Ghau tahimairo, ghai na puina age va kakapoto ka ira leghu nomai mamarutana nga, nia vavahagala nga e ghua, vununa ghau no au va gima ma no au ghu ka ia nomu va hohoghona. 8 Ka ia avoho ghau ta tetu va gima ma ta au nia ghu ghau ka ia Lod, ne va gigima laoini ia doli ka ghai.

9 Ghatunaina ghai a boka mo ghu kudo vehaina God ghini ghauna ghau. Ghai na kudo vehai ghu manei, ghinina ia va ghazaghaza ta au ghai ka kenuna manei, vununa ghini ghauna ghau. 10 Redu ravata, ghai na tarai va tutugu vanamu ghau, na fangai ghu God ta va malumu ghaina mala ke fini leghu ghaunani, nia toka ghini ghauna ta gigima laonani e ghua, ka ia nomu va hohoghona ka Zisas.

Polo Ne Kabai La Sigho Ghidi Ira Noni Kiloaudi Tesalonaeka

11 Ghai na tarai fangai ghu taghonai God ia noda Mama, nia ia noda Lod Zisas e ghua, ta mala va kalasa vanamaina ia hangana, ta agena ghu ghai ka ghau. 12 Nia ghai na tarai fangai haro ia Lod ta va kodolina ia nomu namaha, e vuhai age losa kakai ghu ka vari taghomughi, nia ka heiri haro e ghua, taghe ta ghua ini la namaha ini ka ghai ta losa kakai age nia ka ghau. 13 Leleghonana mu, Kraes e age va gigimari ira hihingomu, o age kalasa nia beana o ghua ghu ghau, ka ia age tetu ka kenunao God ia noda Mama, ka ia ravata ta ke la mehao ia noda Lod Zisas, taremehadi heiri haroharo ira ta nona manei. ^{▼▼3:13Ka papaguaina iahi mu “heiri haroharo ira ta nona manei” ta ghua iahi mu, haeba palu fafahakana. Va kenunana mu ne turi ghidi bana nga heiri ira ta va hohoghona ka Zisas. Va palunana mu ne turi ghidi bana nga ira engizeli. Haeba e boka haroma ta turi ghidira palu irahi.}